Enter your Email Address to subscribe to our newsletters
मीरजापुरम्, 06 अप्रैलमासः (हि.स.)।
उत्तरप्रदेशस्य मीरजापुर-जनपदे अदलपुरा-स्थिते बृहन्माता-शीतला-धाम्नि रविवासरस्य रात्रौ आस्थायाः अद्भुतं दृश्यं दृष्टम्, यदा काशी-नगरात् सहस्रशः भक्ताः “बधावा” नाम उपहारं गृहीत्वा मातुः मंडपं प्राप्तवन्तः।
रात्रेः ११ वादनात् आरभ्य प्रभातकालपर्यन्तं श्रद्धालूनां दीर्घाः पङ्क्तयः मन्दिरं घाटं च यावत् दृष्टाः।
ढोल-नगाडानां निनादेन, डीजे-वाद्यस्य ध्वनिना, मार्गदीपानां च प्रकाशेन सह नृत्यन्तः गायन्तश्च श्रद्धालवः “जय माता शीतला” इति घोषं कुर्वन्तः धाम प्रति अग्रसरन्ति स्म।
हस्ताभ्याम् उन्नीतान्-ध्वजान् दीपांश्च धारयन्तः स्त्री-पुरुष-भक्तानां समूहाः समग्रे मार्गे भक्तौ निमग्नाः दृश्यन्ते स्म।
अदलपुरा-शीतला-घाटः फरहरा-ध्वजैः पूर्णतया आच्छन्नः आसीत्, यत्र सर्वत्र वर्णविचित्राः ध्वजाः भक्तेः उत्साहश्च दृष्टः।
भक्ताः गङ्गायां स्नानं कृत्वा मातुः दरबारं गत्वा विधिविधानपूर्वकं पूजामर्चनां कृत्वा “बधावा” अर्पयन्ति स्म।
समग्रां रात्रिं यावत् मन्दिर-परिसरे श्रद्धालूनां सम्मर्दः अवस्थितः आसीत्।
भक्तेः, संगीतस्य, आस्थायाश्च संगमेन अदलपुरा-शीतला-धाम पुनरपि श्रद्धायाः महाकुम्भत्वं प्राप्तम्, यत्र प्रत्येकं भक्तः मातुः दरबारं प्राप्त्वा धन्यताम् अनुभूतवान्।
---------------
हिन्दुस्थान समाचार