शिमलानगरम्, ०७ अप्रैलमासः (हि.स.)। राजधानी-शिमलायाः राम-विपण-स्थिते ऐतिहासिक-राम-मन्दिर-परिसरे ११ अप्रैल-मासे प्रस्तावितस्य विशेष-समुदायस्य विवाह-समारोहस्य (निकाह) विषयं प्रति विवादः उत्पन्नः। मन्दिरस्य सभागृहे अस्य निकाह-कार्यक्रमस्य आरक्षणम् इति सूचना प्रकाशे आगतायां सति कानिचन हिन्दू-सङ्गठनानि आपत्तिं प्रकट्य विरोध-प्रदर्शनस्य सञ्चेतनां दत्तवन्तः। अस्मिन् विषये नगरे चर्चायाः वातावरणं जातम्।

हिन्दू-संघर्ष-समितेः संयोजकः विजय-शर्मा अवदत् यत् मन्दिर-परिसरस्य सम्पत्तौ एतादृशानि आयोजनानि धार्मिक-परम्पराणां अनुकूलानि न सन्ति। समित्या मन्दिरस्य संचालनं कुर्वन्तीं सूद-सभां ज्ञापनं दत्त्वा प्रस्तावित-कार्यक्रमस्य निरसनं याचितम्। सहैव सञ्चेतना दत्ता यत् यदि कार्यक्रमः आयोज्यते तर्हि मार्गेषु अवतीर्य विरोधः क्रियते। समितेः केचन पदाधिकारिणः प्रतीकात्मक-विरोध-कार्यक्रमाणाम् अपि आयोजनं कर्तुं उक्तवन्तः।

विवादस्य मध्ये मन्दिर-परिसरस्य संचालनं कुर्वती सूद-सभा स्थितिं गम्भीरतया गृह्णन्ती मङ्गलवासरे आपत्कालीन-सभां आह्वातुं घोषितवती। सभायाः अध्यक्षः राजीव-सूदः उक्तवान् यत् सर्वेषां पक्षाणां समुदायानां च भावनाः दृष्ट्वा एव निर्णयः क्रियते। तेन उक्तं यत् सूद-सभायाः प्रयत्नः सदा सामाजिक-सौहार्दस्य संरक्षणं कर्तुम् एव आसीत्, निर्णयः अपि तस्यैव भावनायाः आधारेण भविष्यति।

राजीव-सूदः एतत् अपि अवदत् यत् एषा प्रथमा वार्ता नास्ति यदा मन्दिरस्य सभागृहे अस्य समुदायस्य विवाह-समारोहस्य प्रस्तावः आगतः। तस्य अनुसारं गत-पञ्च-वर्षेषु पञ्चदशाधिकाः एतादृशाः विवाह-कार्यक्रमाः अस्मिन् एव सभागृहे आयोजिताः सन्ति। तेन एतत् अपि स्पष्टं कृतं यत् मन्दिर-परिसरे पूर्वमेव मांस-मीन-मद्य-उपयोगः निषेधः प्रवर्तते, धार्मिक- मर्यादानां विशेषतया पालनं च क्रियते।

ज्ञातव्यम् यत् राम-बाजार-स्थितं एतत् राम-मन्दिरं शिमलायाः प्राचीनतमेषु प्रमुखेषु च धार्मिक-स्थलेषु गणितः अस्ति। मन्दिरस्य बहु-तल-भवनं नगरस्य सामाजिक-धार्मिक-जीवनस्य महत्त्वपूर्णं केन्द्रम् अभवत्। अस्य ऊर्ध्व-तले भगवान्-रामः लक्ष्मणः सीता हनुमान् अन्ये देवताः च प्रतिष्ठिताः सन्ति, अधस्तलेषु निर्मितानि सभागृहाणि दीर्घकालात् विवाह-तथा सामाजिक-कार्यक्रमाणां कृते उपयुज्यन्ते।नगरस्य मध्ये स्थितस्य अस्य मन्दिरस्य नाम्ना एव राम-बाजार-क्षेत्रस्य परिचयः स्थापितः अस्ति।

हिन्दुस्थान समाचार / अंशु गुप्ता