Enter your Email Address to subscribe to our newsletters
बरेलीनगरम्, ०७ अप्रैलमासः (हि.स.)। विश्व-स्वास्थ्य-दिवसस्य उपलक्ष्ये इण्डियन-मेडिकल-एसोसिएशन (आईएमए) बरेली-संघेन मङ्गलवासरे प्रातःकाले सायकिल-शोभायात्रा आयोजिता। अस्याः शोभायात्राया: उद्देश्यं जनान् स्वस्थ-जीवन-शैलीं स्वीकर्तुं, नियमित-व्यायामं कर्तुं तथा पर्यावरण-संरक्षणं प्रति जागरूकतां वर्धयितुं आसीत्। अस्यां शोभायात्रायां बहुसंख्यकाः चिकित्सकाः नगर-निवासिनः च सहभागीभूताः।
प्रातः षट्वादने सिविल-लाइन्स-स्थितात् आईएमए-भवनात् शोभायात्रा आरब्धा। सा श्यामगंज-उड्डयन-सेतुः, केशलता-चिकित्सालयः, धरम-काँटा-चतुष्पथः, महादेव-उड्डयन-सेतुः तथा चौकी-चतुष्पथं गत्वा पुनः आईएमए-भवनम् आगत्य समापितम्। सम्पूर्णे मार्गे सहभागिनः जनान् स्वास्थ्यं प्रति सजगत्वस्य सन्देशं दत्तवन्तः। अस्मिन् अवसरे “स्वास्थ्येन सह, विज्ञानेन सह स्थिताः भवाम:” इति विषयः अपि प्रमुखतया प्रतिपादितः।
चिकित्सकैः उक्तं यत् नियमितं द्विचक्रिका-चालनं, पादयात्रा तथा अन्याः शारीरिक-क्रियाः शरीरस्य स्वास्थ्य-रक्षणे महत्त्वपूर्णां भूमिकां निर्वहन्ति। तेन सह एतत् प्रदूषण-नियन्त्रणे अपि साहाय्यं करोति।
आईएमए-बरेली-संघस्य अध्यक्षः डॉ.अतुल-कुमार-श्रीवास्तवः अवदत् यत् स्वस्थ-समाजस्य निर्माणाय जनैः स्वस्य दिनचर्यायां व्यायामः अवश्यं समावेशनीयः। कम्युनिटी-सर्विस-चेयरमैन डॉ.प्रमेन्द्र-महेश्वरी, मानद-सचिवः डॉ.अंशु-अग्रवालः तथा मीडिया-सचिवः डॉ.कामेन्द्र-सिंहः अपि जनान् स्वास्थ्यं प्रति सजगत्वाय आह्वानं कृतवन्तः। शोभायात्रायां डॉ.डी.पी.गंगवार:, डॉ.राजीव-गोयल:, डॉ.सुमित-अग्रवाल:, डॉ.आलोक-सिंहः, डॉ. पंकज-कुमारः तथा डॉ.विभोर-प्रधानः इत्यादयः बहवः चिकित्सकाः उपस्थिताः आसन्।
हिन्दुस्थान समाचार / अंशु गुप्ता