Enter your Email Address to subscribe to our newsletters
नवदिल्ली, ०९ अप्रैलमासः (हि.स.)। विश्व-होम्योपैथी-दिवसस्य उपलक्ष्ये आयुष-मन्त्रालयेन द्विदिवसीया संवादात्मक-संगोष्ठी आयोजयितुं निर्णयः कृतः। शुक्रवासरे विज्ञान-भवने आयोज्यमाने अस्मिन् कार्यक्रमे प्रमुख-नीतिनिर्मातारः, अनुसन्धानकर्तारः, चिकित्सकाः तथा प्रतिनिधयः एकत्र आगत्य सतत-स्वास्थ्य-प्रणालीनां निर्माणे होम्योपैथ्याः उद्भवमानां भूमिकां विषये विचार-विमर्शं करिष्यन्ति। अस्याः संगोष्ठ्याः विषयः “सतत-स्वास्थ्याय होम्योपैथी” इति अस्ति। अस्मिन् कार्यक्रमे आयुष-राज्यमन्त्री (स्वतन्त्र-प्रभारः) तथा स्वास्थ्य-परिवार-कल्याण-राज्यमन्त्री प्रतापराव-जाधवः, आयुष-मन्त्रालयस्य सचिवः वैद्य-राजेश-कोटचः, देशस्य विभिन्न-भागेभ्यः वरिष्ठ-सर्वकारी-अधिकारिणः तथा प्रख्यात-विशेषज्ञाः उपस्थिताः भविष्यन्ति।
आयुष-मन्त्रालयेन उक्तं यत् अस्य वर्षस्य आयोजनं होम्योपैथ्याः क्षेत्रे स्वास्थ्य-सेवायै समग्रं, न्यून-व्यययुक्तं तथा पर्यावरण-उत्तरदायि दृष्टिकोणं प्रदर्शयति। केन्द्रीय-होम्योपैथी-अनुसन्धान-परिषद् (सीसीआरएच) द्वारा आयोजिते अस्मिन् कार्यक्रमे होम्योपैथ्याः क्षेत्रे प्रमुख-अनुसन्धान-प्रगतयः, जन-स्वास्थ्य-प्रयत्नाः तथा नीतिगत-विकासाः प्रदर्शिताः भविष्यन्ति। अत्र वैज्ञानिक-मान्यता, नैतिक-मानकानां सुदृढीकरणं तथा होम्योपैथ्याः स्वास्थ्य-प्रणालीषु मुख्यधारायां समन्वयः इत्यादिषु अपि विचार-विमर्शः भविष्यति।
विशेष-सत्रेषु निवारक-संवर्धक-स्वास्थ्य-परिचर्या, जीवन-शैली-सम्बद्ध-दीर्घकालिक-रोग-प्रबन्धने होम्योपैथ्याः भूमिका तथा पारम्परिक-औषध-चिकित्सायाः आश्रयस्य न्यूनीकरणे अस्याः योगदानम् इत्यादिषु चर्चा भविष्यति। सहैव पर्यावरण-अनुकूल-औषध-पद्धतिनाम्, जैव-विविधता-संरक्षणस्य तथा आधुनिक-वैज्ञानिक-अनुसन्धानस्य सह पारम्परिक-ज्ञानस्य समन्वयस्य महत्त्वे अपि विचार-विमर्शः क्रियते।
हिन्दुस्थान समाचार / अंशु गुप्ता