मदुरै-नगरम्, ०१ मईमासः (हि.स.)। विश्व-प्रसिद्धे मदुरै-चिथिरै-उत्सवे प्रमुख-आयोजने शुक्रवासरे प्रातःकाले स्वर्ण-अश्वे आरूढः हरित-रेशम-वस्त्रं धारयन् भगवान् कल्लाझगरः वैगई-नद्यां अवतीर्णः। तस्य दर्शनार्थं विशाल-संख्यया श्रद्धालवः उपस्थिताः आसन्। वैगई-नद्याः उभय-तीरयोः दशलक्षाधिकाः श्रद्धालवः भक्तिभावेन कल्लाझगरं स्वागतम् अकुर्वन्।

वस्तुतः कल्लाझगरः तमिलनाडु-राज्यस्य मदुरै-नगरस्य समीपे स्थिते अलगर-कोइल-नाम्नि प्राचीन-प्रसिद्धे विष्णु-मन्दिरे प्रतिष्ठितः अस्ति। तल्लाकुलम्-करुप्पणसामी-मन्दिरात् तस्य मूर्तिः अद्य प्रातःकाले “सहस्र-स्वर्ण-पालकी” इत्यस्यां यात्रायां प्रस्थितवती। अनन्तरं प्रातः ५:५० वादने हरित-रेशम-वस्त्रं धारयन् स्वर्ण-अश्व-वाहनेन वैगई-नद्यां अवतीर्णः। यदा सः नद्यां प्रविष्टः, तदा तत्र उपस्थितानां लक्षशः श्रद्धालूनां “गोविन्द… गोविन्द…” इति घोषेण आकाशः निनादितः। श्रद्धालुभिः जलं प्रक्षिप्य तस्य स्वागतं कृतम्। हस्तेषु दीपकान् धारयन्तः श्रद्धालवः नदी-तीरे आयोजितेषु पवित्र-अनुष्ठानेषु श्रद्धया सहभागीभूताः, पूजार्चनां च अकुर्वन्। जनविश्वासः अस्ति यत् यदि कल्लाझगरः हरित-रेशम-वस्त्रं धारयन् नद्यां अवतरति, तदा तस्मिन् वर्षे देशे समृद्धिः भवति।

वैगई-नद्यां प्रातः ७:२५ वादनपर्यन्तं श्रद्धालुभ्यः दर्शनं दत्त्वा कल्लाझगरः मध्याह्ने १२ वादने रामरायर-मण्डपं प्राप्तवान्। तत्र श्रद्धालुभिः अङ्ग-प्रदक्षिणा-कार्यक्रमः कृतः। ततः अद्य रात्रौ ९ वादने सः वण्डियूर-वीरराघव-पेरुमाल-मन्दिरं गमिष्यति, यत्र सः रात्रि-विश्रामं करिष्यति तथा श्वः प्रातःकाले श्रद्धालुभ्यः एकान्त-सेवां दास्यति। श्वः मध्याह्ने थेनूर-मण्डपे मण्डूक-मुनेः शाप-मोचनस्य महत्त्वपूर्णः कार्यक्रमः भविष्यति। उत्सवस्य अन्यः प्रमुखः कार्यक्रमः ‘दशावतार-दर्शनम्’ श्वः मध्यरात्रौ रामरायर-मण्डपे आयोज्यते।

अद्य १ मईमासे श्रमिक-दिवस-निमित्तं अवकाशः सन् अभूतपूर्व-संख्यया श्रद्धालवः मदुरै-नगरं प्राप्तवन्तः। श्रद्धालूनां सुरक्षा-सौविध्ययोः कृते पञ्चसहस्राधिकाः आरक्षक-कर्मचारिणः नियुक्ताः। आरक्षक-विभागः ड्रोन-यन्त्रैः अपि सम्मर्दस्य निरीक्षणं करोति। समग्र-क्षेत्रे पेयजल-स्वास्थ्य-सौविध्यानां व्यवस्थापनार्थं नगर-निगम-प्रशासनेन व्यापकाः व्यवस्थाः कृताः।

हिन्दुस्थान समाचार / अंशु गुप्ता