Enter your Email Address to subscribe to our newsletters
श्रीनगरम्, 10 मईमासः (हि.स.)।
मुख्यमन्त्री उमर अब्दुल्ला रविवासरे उक्तवान् यत् सरकारः कश्मीरप्रदेशं प्रमुखं गोल्फ-क्रीडागन्तव्यस्थानरूपेण प्रवर्धयितुं राष्ट्रियस्तरस्य आयोजनानि करिष्यति। उपत्यकायाः गोल्फ-क्रीडाङ्गणानि देशस्य श्रेष्ठतमेषु गोल्फ-क्रीडाङ्गणेषु गणितानि भवन्ति। मुख्यमन्त्री रॉयल् स्प्रिङ्ग्स् गोल्फ-कोर्से “इण्डिया गोल्फ कार्निवल् २०२६” इत्यस्य उद्घाटनानन्तरं माध्यमैः सह चर्चायाम् एतत् उक्तवान्।
मुख्यमन्त्री उमर महोदयेन उक्तं यत् कश्मीरस्य गोल्फ-क्रीडया सह दीर्घः ऐतिहासिकः च सम्बन्धः अस्ति तथा अत्र विश्वस्तरीयं गोल्फ-क्रीडासम्बद्धं आधारभूतसंरचनम् अस्ति। तेन उक्तं यद् “गोल्फ-क्रीडया सह कश्मीरस्य अत्यन्तं प्राचीनः सम्बन्धः अस्ति। यदि भवन्तः देशस्य सुन्दरतमेषु गोल्फ-क्रीडाङ्गणेषु पश्येयुः, तर्हि श्रीनगरस्य, गुलमर्गस्य, पहलगामस्य च कश्मीरीय-गोल्फ-कोर्साः सहजतया तेषु गणनीयाः स्युः।”
मुख्यमन्त्री उक्तवान् यत् सरकारः स्थानीयगोल्फ-क्रीडकान् प्रोत्साहयितुं विशेषं ध्यानं ददाति तथा जम्मू-कश्मीरप्रदेशे पर्यटनस्य संवर्धनार्थं अस्याः क्रीडायाः उपयोगं करोति।
तेन उक्तं यत् एषः प्रतियोगितोत्सवः कश्मीरप्रदेशे गोल्फ-क्रीडायाः प्रोत्साहनस्य दिशि अपरं चरणम् अस्ति। “वयं स्वदेशीयगोल्फ-क्रीडकान् प्रोत्साहयितुम् इच्छामः तथा नवयुवक-क्रीडकानां नवीनां पीढीं अस्यां क्रीडायाम् प्रवर्तयितुम् अपि प्रेरयितुम् इच्छामः।” उमर महोदयेन उक्तं यत् अस्मिन् प्रतियोगितायां देशस्य विभिन्नप्रदेशेभ्यः आगताः प्रतिभागिनः सहिताः शताधिकाः गोल्फ-क्रीडकाः सहभागित्वं कुर्वन्ति।
उमर महोदयेन उक्तं यत् जम्मू-कश्मीरप्रदेशस्य बहिःस्थिताः गोल्फ-क्रीडकाः दीर्घावकाशदिवसेषु विशेषतया गोल्फ-क्रीडनार्थं श्रीनगरं आगच्छन्ति। तेन आशा व्यक्ता यत् एतादृशाः क्रीडासम्बद्धाः क्रियाकलापाः पर्यटनक्षेत्रं अधिकं सुदृढं करिष्यन्ति। तेन उक्तं— “यदा यदा उत्तरभारते दीर्घावकाशः भवति, तदा अनेकाः गोल्फ-क्रीडकाः केवलं गोल्फ-क्रीडनार्थं श्रीनगरम् आगच्छन्ति। अस्माकं विश्वासः अस्ति यत् अस्य लाभः पर्यटनक्षेत्राय निश्चितरूपेण भविष्यति।
हिन्दुस्थान समाचार