बेंगलुरुः, 10 मईमासः (हि.स.)।

प्रधानमन्त्री नरेन्द्रमोदी रविवासरे बेङ्गलूरुनगरे कनकपुरारोडस्थिते आर्टऑफलिविङ्गफाउण्डेशनस्य आश्रमे नवनिर्मितस्य ध्यानमन्दिरस्य उद्घाटनं कृत्वा विविधोपक्रमाणामपि शुभारम्भम् अकरोत्। अस्मिन् अवसरे प्रधानमन्त्रिणा आध्यात्मिकता, युवाशक्तिः, पर्यावरणसंरक्षणम्, प्रौद्योगिकीविकासः तथा समाजस्य भूमिका इत्यादिषु विषयेṣu विस्तरेण स्वविचाराः प्रस्तुताः।

प्रधानमन्त्री नरेन्द्रमोदी अवदत् यत् समाजस्य शक्तिः एव राष्ट्रनिर्माणस्य वास्तविकः आधारः अस्ति। केवलं सरकाराः देशं परिवर्तयितुं न शक्नुवन्ति। यदा समाजः सक्रियतया सहभागित्वं करोति तदैव राष्ट्रं नूतनाः उन्नतयः प्राप्नोति।

प्रधानमन्त्री मोदी उक्तवान् यत् अद्यतनप्रभातः मम कृते विलक्षणमनुभवं समानीतवान्। बालकैः वैदिकमन्त्रैः कृतं स्वागतं, गुरुदेवस्य आशीर्वादः तथा आर्टऑफलिविङ्गस्य सेवापरम्परा एते सर्वे क्षणाः मम स्मृतिषु सदा स्थास्यन्ति।

बेङ्गलूरुनगरं केवलं प्रौद्योगिकीनगरं नास्ति इति विशेषतां वर्णयन् प्रधानमन्त्री उक्तवान् यत् बेङ्गलूरुनगरं सम्पूर्णविश्वे स्वस्य सॉफ्टवेयरसेवानां कृते प्रसिद्धम् अस्ति, किन्तु एतदेव नगरं भारतस्य आध्यात्मिकचेतनां सांस्कृतिकपहिचानं च नूतनाभ्यः उन्नतिभ्यः नयति। तेन उक्तं यत् प्रौद्योगिक्याः आध्यात्मिकतायाश्च अद्भुतः समन्वयः एव बेङ्गलूरुनगरस्य महान् परिचयः अस्ति।

आर्टऑफलिविङ्गस्य सेवाकार्याणां प्रशंसां कुर्वन् सः उक्तवान् यत् “यदा संकल्पः स्पष्टः भवति तथा कार्यं सेवाभावेन क्रियते तदा प्रत्येकः प्रयासः सकारात्मकपरिणामान् ददाति।”

समाजस्य भूमिकायाः विषये बलं दत्त्वा प्रधानमन्त्री मोदी उक्तवान् यत् अहं सदा मन्ये यत् समाजः सरकारेभ्यः अधिकशक्तिशाली भवति। कश्चन अभियानः तदैव सफलः भवति यदा तस्य पृष्ठतः समाजस्य शक्तिः तिष्ठति।

प्रधानमन्त्री देशस्य युवानां उपलब्धीनां उल्लेखं कुर्वन् उक्तवान् यत् अद्य विश्वे विज्ञानप्रौद्योगिकीक्षेत्रे तीव्राः परिवर्तनाः दृश्यन्ते। भारतं केवलम् एतेषां परिवर्तनानां भागः नास्ति, अपितु अनेकेषु क्षेत्रेषु नेतृत्वमपि करोति। तेन उक्तं— “भारतस्य डिजिटलक्रान्तिः देशं डिजिटलभुगतानक्षेत्रे वैश्विकनेतारं कृतवती अस्ति। देशे अद्भुतवेगेन आधारभूतसंरचनायाः विकासः भवति तथा भारतं नवाचारक्षेत्रे विश्वस्य तृतीयं महत्तमम् इकोसिस्टम् अभवत्।”

युववैज्ञानिकानां उपलब्धीनां विषये प्रधानमन्त्री उक्तवान् यत् अद्य अस्माकं युवानः स्वोपग्रहान् अन्तरिक्षे प्रेषयन्ति। एतासां उपलब्धीनां पृष्ठतः युवाशक्तिः तथा जीवनजीवनकलायाः प्रेरणा अस्ति।

पर्यावरणसंरक्षणस्य विषये विशेषबलं दत्त्वा प्रधानमन्त्री उक्तवान् यत् रासायनिकउर्वरकाः अस्माकं भूमिं कृषिक्षेत्राणि च हानिं प्रापितवन्तः। धरित्रीमातरं रसायनेभ्यः रक्षितुं अपि जीवनजीवनकलायाः अंशः अस्ति। तेन ‘एकः वृक्षः मातुः नाम्ना’ इति अभियानं अधिकव्यापकं कर्तुं आह्वानं कृतम् तथा उक्तं यत् पर्यावरणसंरक्षणे समाजस्य भूमिका अत्यन्तं महत्त्वपूर्णा अस्ति।

प्रधानमन्त्री उक्तवान् यत् पर्यावरणं अर्थव्यवस्था च पृथक् कर्तुं न शक्येते। जलस्य प्रत्येकं बिन्दुं रक्षितुं अस्माकं दायित्वम् अस्ति। तेन उक्तं यत् ‘पर ड्रॉप मोर क्रॉप’ योजनायाः माध्यमेन कृषकाः जलस्य समुचितोपयोगस्य विषये जागरूकाः क्रियन्ते।

प्रधानमन्त्री मोदी उक्तवान् यत् प्रकृत्या सह सन्तुलनं स्थापयित्वा जीवनं यापयितुं प्रेरणां ददाति यः आन्दोलनः स एव मिशनलाइफ अस्ति। एषः उत्तरदायी जागरूकजीवनशैल्याः सन्देशं ददाति। तेन उक्तं यत् मम दृष्ट्या मिशनलाइफ अपि आर्टऑफलिविङ्गस्य प्रत्यक्षस्वरूपम् अस्ति।

कार्यक्रमे श्रीश्रीरविशङ्कर सहिताः अनेकाः गणमान्यव्यक्तयः उपस्थिताः आसन्। बालकैः वैदिकमन्त्रौच्चारणेन सह प्रधानमन्त्रिणः स्वागतं कृतम्। श्रीगणेशस्य दर्शनानन्तरं प्रधानमन्त्रिणा ध्यानमन्दिरस्य उद्घाटनं कृतं तथा आश्रमस्य आध्यात्मिकवातावरणस्य प्रशंसा कृता। कार्यक्रमे सहस्रशः श्रद्धालवः, स्वयंसेवकाः तथा गणमान्यजनाः सहभागित्वं कृतवन्तः। ध्यानमन्दिरस्य उद्घाटनानन्तरम् आश्रमपरिसरः आध्यात्मिकोत्साहेन ऊर्जया च परिपूर्णः अभवत्।

---------------

हिन्दुस्थान समाचार