रायपुरम्, ११ मईमासः (हि.स.)। मुख्यमन्त्री विष्णुदेव-सायः अद्य सोमवासरे राजधानी-रायपुरस्य महादेव-घाट-स्थिते हाटकेश्वर-महादेव-मन्दिर-परिसरे आयोजिते “सोमनाथ-स्वाभिमान-पर्व” कार्यक्रमे सहभागितां कृतवान्। अस्मिन् अवसरे तेन जनप्रतिनिधिभिः श्रद्धालुभिः च सह गुजरात-स्थितात् सोमनाथ-मन्दिरात् आभासीय-रूपेण सम्बद्धेन प्रधानमन्त्रिणा नरेन्द्र-मोदिना कृता पूजाऽर्चना अवलोकिता, तस्य सम्बोधनं च श्रुतम्।

प्रधानमन्त्री नरेन्द्र-मोदी अस्मिन् समये सोमनाथ-मन्दिरस्य स्वर्णिम-इतिहासस्य, विदेशीय-आक्रान्तृभिः कृतानाम् आक्रमणानाम्, मन्दिरस्य पुनर्निर्माण-यात्रायाः, वर्तमान-सर्वकारेण क्रियमाणानाम् आस्था-केन्द्राणां संरक्षण-संवर्धन-संकल्पस्य च विविध-विषयाणां विषये देशवासिभ्यः स्वविचारान् अवदत्।

मुख्यमन्त्री सायः कार्यक्रमं सम्बोधयन् प्रदेशवासिभ्यः “सोमनाथ-स्वाभिमान-पर्व” इत्यस्य शुभकामनाः अयच्छत्। तेन उक्तं यत् ७५ वर्षपूर्वम् अद्य एव सोमनाथ-मन्दिरस्य पुनर्निर्माण-कार्यं सम्पन्नम् आसीत्, अस्य ऐतिहासिक-अवसरस्य उपलक्ष्ये च देशव्यापी-रूपेण स्वाभिमान-पर्व आचर्यते।

तेन उक्तं यत् सोमनाथ-मन्दिरस्य उपरि अनेकवारं बाह्य-आक्रान्ताभिः आक्रमणानि कृतानि, किन्तु मन्दिरस्य आस्था-परम्परे च समाप्तुं न शक्येते। श्रीसायः उक्तवान् यत् प्रथम-आक्रमणस्य समये मन्दिरस्य पुजारिणः श्रद्धालवश्च मन्दिरं न त्यक्तवन्तः, अपितु स्वप्राणानां बलिदानम् अकुर्वन्। मुख्यमन्त्री उक्तवान् यत् तेषां त्यागः अद्यापि इतिहासे स्वर्णाक्षरैः अंकितः अस्ति।

श्रीसायः उक्तवान् यत् देशस्य स्वतन्त्रतायाः अनन्तरं तत्कालीन-गृहमन्त्री लौहपुरुषः सरदार-वल्लभभाई-पटेलः सोमनाथ-मन्दिरस्य पुनर्निर्माणस्य संकल्पम् अकरोत्। तेन उक्तं यत् तस्मिन् समये देशस्य प्रथम-राष्ट्रपतिः डॉ.राजेन्द्र-प्रसादः सर्वेषां विरोधानां चिन्तां विना सोमनाथ-मन्दिरं गत्वा पुनर्निर्मित-मन्दिरस्य लोकार्पण-कार्यक्रमे सहभागितां कृतवान्। श्रीसायः प्रधानमन्त्रिणः नरेन्द्र-मोदिनः प्रशंसां कुर्वन् उक्तवान् यत् तस्य नेतृत्वे देशस्य सनातनसंस्कृतिः आध्यात्मिक-परम्पराश्च नूतनं गौरवं प्राप्तवन्त्यः। तेन उक्तं यत् अद्य देशस्य प्रमुख-तीर्थस्थलानां, मन्दिराणां, धार्मिक-स्थलानां च तीव्रगत्या विकासः क्रियते। मुख्यमन्त्री उक्तवान् यत् वाराणस्याः काशी-विश्वनाथ-धामात् उज्जयिन्याः महाकाल-मन्दिरं यावत् सोमनाथ-मन्दिरं प्रति व्यापक-विकास-कार्याणि प्रचलन्ति।

मुख्यमन्त्री उक्तवान् यत् छत्तीसगढ-सर्वकारः अपि प्रदेशस्य धार्मिक-सांस्कृतिक-स्थलानां विकासाय निरन्तरं कार्यं करोति। तेन उक्तं यत् प्रदेशे देवी-मातॄणां मन्दिराणि शक्तिपीठ-योजनया विकसितानि क्रियन्ते। तथैव कबीरधाम-जनपदे स्थितस्य भोरमदेव-महादेव-मन्दिरस्य कृते स्वदेश-दर्शन-योजनायाः अन्तर्गतं १४८ कोटि-रूप्यकाणां स्वीकृतिः प्राप्ता अस्ति, अत्र पर्यटन-सुविधानां विस्तार-सौन्दर्यीकरण-कार्याणि च प्रचलन्ति। तेन उक्तं यत् छत्तीसगढः माता-कौशल्यायाः जन्मभूमिः भगवतः श्रीरामस्य मातुलगृहं च अस्ति। सनातनिभिः दीर्घ-संघर्षस्य अनन्तरं अयोध्यायाः मन्दिरे भगवतः श्रीरामललायाः प्राण-प्रतिष्ठा सम्पन्ना। मुख्यमन्त्री उक्तवान् यत् राज्यसर्वकारस्य “श्रीरामलला-दर्शन-योजना” इत्यस्य माध्यमेन अधुना यावत् ४० सहस्राधिकाः श्रद्धालवः अयोध्यां गत्वा प्रभोः श्रीरामस्य दर्शनं कृतवन्तः, एषा योजना च निरन्तरं प्रचलति।

मुख्यमन्त्री स्वसम्बोधनस्य अन्ते सर्वान् भ्रातृत्वस्य, सामाजिक-समरसतायाः, राष्ट्रस्य एकतायाश्च सुदृढीकरणस्य संकल्पं ग्रहीतुं आह्वानम् अकरोत्।

कार्यक्रमं सम्बोधयन् वनमन्त्री केदार-कश्यपः उक्तवान् यत् प्रधानमन्त्रिणः नरेन्द्र-मोदिनः नेतृत्वे देशव्यापीरूपेण सनातनसंस्कृतेः आस्था-केन्द्राणां संरक्षण-संवर्धन-कार्यं निरन्तरं प्रचलति। तेन उक्तं यत् अस्माकं मुख्यमन्त्री अपि प्रदेशे धार्मिक-स्थलानां संरक्षणेन सह विविध-योजनानां माध्यमेन जनान् आस्थया सह संयोजयति।

राजस्वमन्त्री टंकराम-वर्मा उक्तवान् यत् सोमनाथ-मन्दिरं देशस्य संस्कृतेः वैभवस्य स्वाभिमानस्य च प्रतीकं वर्तते। प्रधानमन्त्रिणः श्रीमोदिनः नेतृत्वे भारतं स्वस्य सांस्कृतिक-धरोहरं पुनः प्रतिष्ठापयति। तेन उक्तं यत् प्रदेशे नक्सल-उन्मूलनस्य अनन्तरं पर्यटनस्य धार्मिक-स्थलानां विकासस्य च नूतना गतिः प्राप्ता।

कृषिमन्त्री रामविचार-नेताम उक्तवान् यत् सोमनाथ-मन्दिरं सनातनिनाम् आस्थायाः महत् केन्द्रम् अस्ति। तेन उक्तं यत् सहस्रवर्षीय-इतिहासे अनेक-आक्रमणानां अनन्तरमपि सनातनसंस्कृतेः आस्थां कोऽपि चलयितुं न शक्तवान्, न च कदापि तथा भविष्यति।

मुख्यमन्त्री विष्णुदेव-सायः राजधानी-रायपुरस्य महादेव-घाट-स्थितं हाटकेश्वर-महादेव-मन्दिरं प्राप्तवान्। तेन भगवतः शिवस्य पूजार्चनां कृत्वा प्रदेशवासिनां सुख-समृद्धेः कामना कृता। अस्मिन् अवसरे कृषिमन्त्री रामविचार-नेतामः, वनमन्त्री केदार-कश्यपः, राजस्वमन्त्री टंकराम-वर्मा, विधायकः पुरन्दर-मिश्रः, छत्तीसगढ-निःशक्तजन-वित्त-विकास-निगमस्य अध्यक्षः लोकेश-कावडिया, महापौरा मीनल-चौबे, जनपद-पञ्चायत-अध्यक्षः नवीन-अग्रवालः, अन्ये जनप्रतिनिधयश्च उपस्थिताः आसन्।

हिन्दुस्थान समाचार / अंशु गुप्ता