Enter your Email Address to subscribe to our newsletters
कोलकाता-नगरम्, ११ मईमासः (हि.स.)। पश्चिम-बङ्गालस्य नवगठित-भारतीय-जनता-पक्ष-सर्वकारस्य प्रथम-मन्त्रिमण्डल-सभा सोमवासरे राज्य-सचिवालये “नवान्न” इति स्थले अभवत्। सभायाः अनन्तरं मुख्यमन्त्री शुभेन्दु-अधिकारी राज्यस्य प्रशासनिक-दिशा, सुशासनम्, सीमा-सुरक्षा, केन्द्रीय-योजनानां कार्यान्वयनम् तथा संवैधानिक-शासन-व्यवस्थां सम्बद्ध्य अनेकान् महत्त्वपूर्णान् निर्णयान् घोषितवान्।
प्रथम-मन्त्रिमण्डल-सभायां सीमा-सुरक्षा-बलाय (बीएसएफ) सीमाक्षेत्रे ४५ दिवसानां अन्तरे भूमेः हस्तान्तरण-प्रक्रिया पूर्णतया सम्पन्ना भविष्यतीति महत्त्वपूर्णः निर्णयः कृतः। मुख्यमन्त्री उक्तवान् यत् पश्चिम-बङ्गाले “सुशासन, सुरक्षा तथा डबल-इञ्जिन्-सर्वकार” इति नूतना यात्रा आरब्धा अस्ति, या देशस्य अन्येषां भाजपा-शासित-राज्यानां विकास-प्रतिमानस्य अनुसरणं करिष्यति।
सभायां राजनीतिक-हिंसाया: काले प्राणत्यागं कृतवतां दलस्य ३२१ कार्यकर्तॄणां कृते श्रद्धाञ्जलिः अपि अर्पिता। मुख्यमन्त्री उक्तवान् यत् तेषां परिवाराणां सर्वथा सहायता करिष्यते तथा च राजनीतिक-हत्यासु संलग्नानां विरुद्धं कठोर-कार्यवाही भविष्यति।
मन्त्रिमण्डले आयुष्मान-भारत-योजनायाः औपचारिक-सम्बद्धतायाः निर्णयः अपि कृतः। प्रधानमन्त्रि-जन-आरोग्य-योजना, पीएम-श्री, विश्वकर्मा, बेटी-बचाओ-बेटी-पढ़ाओ, उज्ज्वला-योजना इत्यादिषु केन्द्रीय-योजनासु राज्यस्य सक्रिय-भागीदारी सुनिश्चितीकरणस्य प्रक्रिया आरब्धा अस्ति।
प्रशासनिक-संशोधनस्य अन्तर्गतं आईएएस-अधिकारिणः केन्द्रीय-प्रशिक्षण-प्रणाल्या सह संयोजयितुं निर्णयः कृतः। यूनां रोजगार-अवसर-वृद्ध्यर्थं शासकीय-नियुक्तिषु आवेदनस्य अधिकतम-आयु-सीमा पञ्चवर्षपर्यन्तं वर्धिता।
मुख्यमन्त्री शुभेन्दु-अधिकारी उक्तवान् यत् वर्तमान-सामाजिक-कल्याण-योजनाः स्थगिताः न भविष्यन्ति, किन्तु पारदर्शितया सञ्चालिताः भविष्यन्ति। मृत-व्यक्तिभ्यः, अवैध-प्रवेशकर्तृभ्यः अथवा अ-भारतीय-नागरिकेभ्यः एतासां योजनानां लाभः न प्रदास्यते।
हिन्दुस्थान समाचार / अंशु गुप्ता