Enter your Email Address to subscribe to our newsletters
जौनपुरम्,12 मईमासः (हि.स.)।उत्तरप्रदेशस्य जौनपुरे सरजू प्रसाद शैक्षिक-सामाजिक-सांस्कृतिक-संस्थायाः तत्त्वावधाने मंगलवासरे प्रधानमन्त्री-टीबी-मुक्त-भारत-अभियानस्य अन्तर्गतं टीबी-रोगिभ्यः पौष्टिकाहार-किट-वितरणं कृतम्। कार्यक्रमे स्वास्थ्य-जागरूकतया सह टीबी-रोगिणः उपचारस्य प्रति प्रेरिताः। मुख्यातिथिः डॉ. सुशील कुमार अग्रहरी पौष्टिकाहार-सामग्री-वितरणस्य चिकित्सकीय-सामाजिक-महत्त्वस्य विषये प्रकाशं दत्त्वा टीबी-रोगिणां “दत्तक-ग्रहण” प्रक्रियायाः तस्य उद्देश्यस्य च विस्तृतं वर्णनं कृतवान्। तेन उक्तं यत् समाजस्य सहयोगेन एव टीबी-उन्मूलनस्य लक्ष्यं शीघ्रं सिद्धुं शक्यते।
एसटीएलएस राजीव कुमार श्रीवास्तव उक्तवान् यत् टीबी-रोगिणः स्वचिकित्सां मध्ये न परित्यजन्तु तथा डीआर-टीबी-रोगिणां परिवारस्य सदस्येषु लक्षणानि दृश्यन्ते चेत् त्वरितं परीक्षणं कारयितव्यम्। कार्यक्रमस्य अध्यक्षतां कुर्वन् प्रधानाचार्यः डॉ. सुभाष सिंह टीबी-रोगस्य प्रमुखलक्षणानां विषये जानकारीं दत्त्वा उक्तवान् यत् द्विसप्ताहाधिककालपर्यन्तं कासः, निरन्तरज्वरः, कफे रक्तागमनम्, भारक्षयः, अल्पभोजनरुचिः तथा रात्रौ स्वेदनम् इत्येतानि टीबी-रोगस्य लक्षणानि भवितुमर्हन्ति। तेन उक्तं यत् अस्य परीक्षणं समीपस्थस्वास्थ्यकेन्द्रे निःशुल्कं कारयितुं शक्यते।
संस्थाध्यक्षः प्रधानाध्यापकश्च प्रमोद कुमार प्रजापति कार्यक्रमस्य सञ्चालनं कुर्वन् उक्तवान् यत् टीबी वायुमाध्यमेन प्रसारमाणा व्याधिः अस्ति। फुफ्फुस-टीबी-रोगेण पीडितस्य व्यक्तेः कासनेन अथवा निष्ठीवनेन जीवाणवः वायौ प्रसृत्य अन्यान् जनान् संक्रमितान् कर्तुं शक्नुवन्ति।
अस्मिन् अवसरे नवीन सिंहः, प्रदीप सिंहः, सोमरू राम प्रजापतिः, ठाकुर प्रसाद रायः, सागर श्रीवास्तवः, अतुल, धर्मेन्द्र कुमार श्रीवास्तवः, बबलूः, अमन श्रीवास्तव इत्यादयः अन्ये जनाश्च उपस्थिताः आसन्। अन्ते पूर्वाध्यक्षः बालन्यायालयस्य संजय उपाध्यायः सर्वेषां अतिथीनां प्रति आभारं व्यक्तवान्।
हिन्दुस्थान समाचार