मण्डला-नगरम्, १५ मईमासः (हि.स.)। मध्यप्रदेशस्य आदिवासी-बहुल-मण्डला-जनपदस्य ऐतिहासिक-नगरे रामनगरे अद्य शुक्रवासरात् द्विदिवसीयः “आदि-उत्सवः २०२६” आरभ्यते। गोंडकालीन-राज्ञां राजधानीरूपेण प्रसिद्धे रामनगरे आयोजितः अयं उत्सवः जनजातीय-संस्कृतेः, गोंडवाना-इतिहासस्य, पारम्परिक-आस्थायाः तथा सांस्कृतिक-परम्परायाः भव्यः महोत्सवः भविष्यति।

केन्द्रीय-जनजातीय-कार्य-मन्त्री जुएल-ओरामः शुभारम्भं करिष्यति

जनसम्पर्क-अधिकारी राहुल-वासनिकः सूचनां दत्त्वा उक्तवान् यत् आदि-उत्सवस्य आयोजनं ऐतिहासिक-स्थले चौगान-मढिया तथा रामनगर-महल-परिसरे क्रियते। कार्यक्रमे देशस्य विभिन्न-भागेभ्यः जनजातीय-समाजस्य प्रतिनिधयः, राज-परिवाराणां सदस्याः, लोक-कलाकाराः तथा संस्कृति-प्रेमिणः सम्मिलिताः भविष्यन्ति। केन्द्रीय-जनजातीय-कार्य-मन्त्री जुएल-ओरामः अपराह्णे १२:३० वादने अस्य महोत्सवस्य शुभारम्भं करिष्यति।

तेन उक्तं यत् निर्धारित-कार्यक्रमानुसारं केन्द्रीय-जनजातीय-कार्य-मन्त्री ओरामः अद्य ओडिशा-प्रदेशस्य झारसुगुडा-विमानपत्तनात् चार्टर्ड-विमानेन प्रातः १० वादने जबलपुर-विमानपत्तनं प्राप्स्यति। ततः प्रातः १०:२० वादने स्थलमार्गेण मण्डला-जनपदस्य रामनगरं गत्वा मध्याह्ने १२ वादने “आदि-उत्सव”-कार्यक्रमे सहभागित्वं करिष्यति। कार्यक्रमानन्तरम् अपराह्णे ४:३० वादने पुनः जबलपुरं प्रति प्रस्थितः भविष्यति। अनन्तरं सः जबलपुर-विमानपत्तनात् नव-दिल्लीं प्रति प्रस्थानं करिष्यति।

प्रथम-दिने पारम्परिक-शुभारम्भः भविष्यति

जनसम्पर्क-अधिकारीणः अनुसारं प्रातः ११ वादने चौगान-मढिया-रामनगरे ध्वजारोहणं तथा पारम्परिक-आदि-उत्सवस्य शुभारम्भः भविष्यति। ततः अनन्तरं मेगा-स्वास्थ्य-शिविरस्य उद्घाटनं, स्मारक-स्थले ध्वज-पूजनं, नर्मदा-पूजनं तथा प्रदर्शिन्याः अवलोकनं क्रियते। कार्यक्रमस्य अन्तर्गतं प्रासाद-परिसरे विशेष-पूजार्चनम् अपि आयोजयिष्यते, यस्मिन् जनजातीय-परम्पराणां गोंडवाना-संस्कृतेश्च दृश्यं दृश्यते।

मञ्चीय-कार्यक्रमे सम्मान-समारोहः भविष्यति

अपराह्णे १२:२० वादनात् मञ्चीय-कार्यक्रमे दीप-प्रज्वलनं मुख्यातिथीनां स्वागतं च भविष्यति। कार्यक्रमे आदिवासी-परम्परायाः प्रतिनिधीनां, विशिष्ट-आदिवासी-प्रतिभानां तथा विविध-क्षेत्रेषु उपलब्धिं प्राप्तवतां व्यक्तीनां सम्मानं क्रियते। सहैव पण्डा-पुजारिणामपि सम्मानं भविष्यति। ततः अनन्तरं सांस्कृतिक-कार्यक्रमाणां प्रस्तुतयः भविष्यन्ति तथा मुख्य-अतिथीनाम् उद्बोधनम् आयोजयिष्यते।

रात्री यावत् सांस्कृतिक-कार्यक्रमाः भविष्यन्ति

अपराह्णे ३ वादनात् आदि-उत्सवस्य द्वितीय-चरणस्य आरम्भः भविष्यति, यस्यां रात्रौ यावत् सांस्कृतिक-प्रस्तुतयः आयोजयिष्यन्ते। कार्यक्रमे उत्तर-पूर्व-भारतस्य, मध्य-भारतस्य तथा प्रदेश-स्तरीय-सांस्कृतिक-दलानां विशेष-प्रस्तुतयः आकर्षणस्य केन्द्रं भविष्यन्ति। एतेषां अतिरिक्तं स्थानीय-लोकनृत्य-दलैः पारम्परिक-जनजातीय-नृत्यानां लोक-संस्कृतेश्च जीवन्त-प्रस्तुतयः प्रदास्यन्ते। गोंड-बैगा-तथा अन्य-जनजातीय-समुदायानां कला, संगीतं परम्पराश्च उत्सवस्य विशेष-परिचयरूपेण भविष्यन्ति।

आदि-उत्सवे विभिन्न-राज-परिवाराणां सदस्याः सम्मिलिताः भविष्यन्ति

आयोजने विभिन्न-राज-परिवाराणां सदस्याः उपस्थित्य गोंडवाना-सांस्कृतिक-धरोहरस्य ऐतिहासिक-परम्पराणां च सम्मानं करिष्यन्ति। कार्यक्रमे महेन्द्र-प्रताप-सिंह-जूदेवः, कोशलेंद्र-सिंह-जूदेवः, धरमवीर-सिंह-जूदेवः, रामकुमार-ठाकुरः, विरेन्द्र-सिंह-राजः, योगेश्वर-राजः, विरेन्द्र-शाहः, देवेन्द्र-बहादुर-सिंहः, योगेन्द्र-सिंह-बाबा, कमलेश-प्रताप-सिंहः, आदित्येन्द्र-बहादुर-सिंहः, चेतन-प्रताप-सिंहः, नवेंद्र-सिंह-टेकामः, युवराज-शरण-सिंहः, देवेन्द्र-प्रताप-सिंहः, राजा-गुलाब-सिंहः, कुँवर-सिंहः, निर्मल-राजा-भरई, मुकेश-बम्होरी, बी.के.-शाहः, धर्मवीर-सिंहः, सुजान-सिंहः तथा विक्रम-सिंहः प्रमुखरूपेण सम्मिलिताः भविष्यन्ति।

१६ मई-दिने संगोष्ठ्यां प्रदेशस्य प्रसिद्धाः व्यक्तयः सहभागिनः भविष्यन्ति

आदि-उत्सवस्य द्वितीय-दिने छत्तीसगढ-प्रदेशस्य राज्यपालः रमेन-डेका अपि सम्मिलितः भविष्यति। द्वितीय-दिने प्रासाद-परिसरे आयोजितायां संगोष्ठ्यां जनजातीय-साहित्यस्य ऐतिहासिक-विषयाणां च विशेषज्ञाः प्रसिद्ध-वक्तारः सहभागित्वं करिष्यन्ति। एतेषु प्रोफेसर-डॉ.सचिन-तिवारी, सिविल-सेवा-अधिकारी इतिहासकारश्च दीपक-द्विवेदी, प्रोफेसरः विभागाध्यक्षश्च डॉ.आनन्द-सिंह-राणा, प्राचार्यः डॉ.अलकेश-चतुर्वेदी, तदर्थ-विद्वान् डॉ.गोविन्द-पाण्डे, असिस्टेण्ट-प्रोफेसरः चन्द्रेश-मरावी, डॉ.ज्योति-सिंहः, डॉ.केएल-धुर्वे, डॉ.गौरीसिंह-परते, जनपद-पञ्चायत-अध्यक्षः संजय-कुशरामः, सामाजिक-कार्यकर्ता सोहन-सिंह-मरावी, शोधच्छात्रा अर्चना-मरकामः, एसोसिएट-प्रोफेसरः डॉ.बीएल-झारिया तथा कलाकारः सतपाल-सिंह-पन्द्राम-सत्य-प्रधानः प्रमुखाः सन्ति। कार्यक्रमं भव्यं स्मरणीयं च कर्तुं व्यापक-सज्जाः क्रियन्ते। आदि-उत्सवः गोंडवाना-संस्कृतेः इतिहासस्य जनजातीय-अस्मितायाश्च महापर्वरूपेण दृश्यते।

Hindusthan Samachar / Divya Ranjan