Enter your Email Address to subscribe to our newsletters
गोरखपुर-नगरम्, १६ मईमासः (हि.स.)। केन्द्रीय-पेट्रोलियम-तथा-प्राकृतिक-गैस-मन्त्री हरदीप-सिंह-पुरी २०१७ तम-वर्षात् परं उत्तरप्रदेशे जातस्य उल्लेखनीय-परिवर्तनस्य श्रेयः मुख्यमन्त्रिणे योगि-आदित्यनाथाय दत्त्वा अवदत् यत् गत-नव-दश-वर्षेषु योगी-महोदयस्य नेतृत्वे उत्तरप्रदेशेन सम्पूर्ण-देशे नूतना सुदृढा च परिचय-प्रतिष्ठा निर्मिता अस्ति।
केन्द्रीय-पेट्रोलियम-मन्त्री शनिवासरे गोरखपुरे मुख्यमन्त्रिणः योगी-आदित्यनाथस्य उपस्थितौ अन्तरराष्ट्रीय-क्रिकेट-क्रीडाङ्गणस्य भूमिपूजन-शिलान्यास-समारोहम् सम्बोधयन् आसीत्। तेन मुख्यमन्त्रिणः योगी-आदित्यनाथस्य दूरदर्शिनः नेतृत्वस्य च मुक्तकण्ठेन प्रशंसा कृता तथा उक्तं यत् केन्द्रीय-मन्त्रिरूपेण गत-कतिपय-वर्षेषु उत्तरप्रदेशे यत् परिवर्तनं दृष्टम्, तत् अत्यद्भुतम् अस्ति। सः दृढतया उक्तवान् यत् यत् कार्यम् उत्तरप्रदेशे दृष्टम्, तादृशम् उत्कृष्टम् उदाहरणं देशस्य अन्यत्र न दृश्यते। योगी-महोदयस्य नेतृत्वे २०१७ तम-वर्षात् परं उत्तरप्रदेशेन नूतना परिचय-प्रतिष्ठा निर्माय अन्येषां राज्याणां पुरतः उदाहरणं प्रस्तुतम्।
केन्द्रीय-पेट्रोलियम-मन्त्री हरदीप-सिंह-पुरी अवदत् यत् एकस्मिन् समये उत्तरप्रदेशस्य चर्चा तस्य जनसङ्ख्यां प्रति भवति स्म, किन्तु अधुना एतत् विकासाय, विधि-व्यवस्थायै, सुशासनाय च प्रसिद्धम् अस्ति। विधि-व्यवस्थायां व्यापक-सुधारेण निवेशकेषु नूतनः विश्वासः उत्पन्नः। विकासस्य रोजगारस्य च गतिः तीव्रा जाता अस्ति। तेन उक्तं यत् उत्तरप्रदेशः निवेशकानां प्रिय-गन्तव्य-स्थलं जातम् अस्ति।
तेन नगरीय-आवास-मन्त्रीरूपेण पीएम-आवास-योजनया सम्बद्धम् अनुभवं सहभागं कृत्वा उक्तं यत् २०१७ तम-वर्षात् पूर्वं उत्तरप्रदेशात् केवलं १७ सहस्र-आवासानां याचना आगता आसीत्। योगी-महोदयस्य मुख्यमन्त्रित्वे आगमनानन्तरं एषा सङ्ख्या १७ लक्षाणि अपि अतिक्रान्तवती। केन्द्रीय-मन्त्रिणा मुख्यमन्त्रिणः नेतृत्वे उत्तरप्रदेशे मार्ग-वायु-मेट्रो-संयोजन-डिफेन्स-परिसर-स्वास्थ्य-अधोसंरचना-शिक्षा-क्षेत्रेषु जातां प्रगतिम् उल्लेखनीया इति कथिता। तेन सह उक्तं यत् उत्तरप्रदेशे हरित-ऊर्जा तथा कम्प्रेस्ड-बायोगैस-क्षेत्रे बहवः अवसराः सन्ति। एतत् कृषकाणां आय-वृद्धौ अपि सहायकं भवति। तेन उक्तं यत् उत्तरप्रदेशे स्थाप्यमानाः सीबीजी-संयन्त्राः ‘वेस्ट्-टू-वेल्थ्’-दृष्टिकोणं साकारं कुर्वन्ति।
केन्द्रीय-मन्त्री हरदीप-सिंह-पुरी गोरखपुरे अन्ताराष्ट्रिय-क्रिकेट-क्रीडाङ्गणं मुख्यमन्त्रिणः योगि-आदित्यनाथस्य दूरदर्शिन्या चिन्तनस्य परिणामः इति कथयन् अवदत् यत् अद्य केवलं क्रीडाङ्गण-परियोजनायाः शिलान्यासः न भवति, अपितु यूनां स्वप्नानां सम्भावनानां च नूतन-दिशा-प्रदानस्य सङ्कल्पः सिद्धिं प्रति अग्रे वर्धते। तेन सूचितं यत् क्रीडाङ्गण-निर्माणे पेट्रोलियम-मन्त्रालयस्य इण्डियन-ऑयल-संस्थया ६० कोटि-रूप्यकाणां योगदानं प्रदत्तम्। अन्याभिः पेट्रोलियम-निर्माणीभिः अपि स्वस्व-उत्तरदायित्वं निर्वुढम्। तेन उक्तं यत् एतत् क्रीडाङ्गणम् आगामि-समये यूनां प्रेरणा-केन्द्रं भविष्यति। अत्र नूतनाः क्रीडा-प्रतिभाः उत्पत्स्यन्ते तथा भारतस्य भविष्यं विकसितं भविष्यति।
अन्ताराष्ट्रिय-क्रिकेट-क्रीडाङ्गणस्य शिलान्यास-अवसरे केन्द्रीय-ग्रामीण-विकास-राज्यमन्त्री कमलेश-पासवानः, उत्तरप्रदेशस्य क्रीडा-तथा-युवा-कल्याण-राज्यमन्त्री (स्वतन्त्र-प्रभारः) गिरीश-चन्द्र-यादवः, स्थानीय-सांसदः रविकिशन-शुक्लः अपि स्वविचारान् व्यक्तवन्तः।
अस्मिन् अवसरे केन्द्रीय-ग्रामीण-विकास-राज्यमन्त्री कमलेश-पासवानः, प्रदेश-सर्वकारस्य मन्त्रिमण्डल-मन्त्री (मत्स्य-विभागः) डॉ.संजय-निषादः, जनपद-पञ्चायत-अध्यक्षा साधना-सिंहः, महापौरः डॉ.मंगलेश-श्रीवास्तवः, कुशीनगरस्य सांसदः विजय-दूबे, विधायकाः श्रीराम-चौहानः, फतेह-बहादुर-सिंहः, राजेश-त्रिपाठी, महेन्द्रपाल-सिंहः, डॉ.विमलेश-पासवानः, प्रदीप-शुक्लः, सरवन-निषादः, प्रदेश-सर्वकारस्य सलाहकारः अवनीश-अवस्थी, क्रीडा-तथा-युवा-कल्याण-विभागस्य सचिवः सुहास-एल्-वाई, क्रीडा-निदेशकः डॉ.आरपी-सिंहः, इण्डियन-ऑयल-संस्थायाः अध्यक्षः अरविन्द-सिंह-साहनी, भाजपा-क्षेत्रीय-अध्यक्षः सहजानन्द-रायः, जिलाध्यक्षः जनार्दन-तिवारी, महानगर-संयोजकः राजेश-गुप्तः इत्यादयः प्रमुखतया उपस्थिताः आसन्।
/ Dheeraj Maithani