पूर्वीसिंहभूमिः, १५ मे-मासः (हि.स.)। भारतीयजनतापक्षस्य (भाजपा) जमशेदपुर-महानगर-जनपदेन सोनारी-स्थिते चित्रगुप्त-भवने आयोजितस्य द्विदिवसीयस्य “पण्डित-दीनदयाल-उपाध्याय-प्रशिक्षण-महा-अभियानम्-२०२६” इत्यस्य शनिवासरे भाजपा-प्रदेशाध्यक्षेन आदित्य-साहुना विधिवत् उद्घाटनं कृतम्। कार्यक्रमस्य प्रारम्भः दीप-प्रज्वलनेन “वन्दे मातरम्” इत्यनेन च अभवत्।

उद्घाटनानन्तरं प्रदेशाध्यक्षः आदित्य-साहुः प्रशिक्षण-परिसरे स्थापितायाः प्रदर्शिन्याः अवलोकनम् अकरोत्। प्रदर्शिन्यां संघटनस्य विचारधारा, सेवाकार्याणि, सर्वकारस्य उपलब्धयः ऐतिहासिक-विषयाश्च सम्बद्धाः सामग्र्यः प्रदर्शिताः आसन्। तेन कार्यकर्तॄन् एतान् विचारान् जनं जनं प्रति प्रसारयितुं आह्वानं कृतम्।

स्वीय-सम्बोधने आदित्य-साहुः अवदत् यत् प्रशिक्षण-अभियानं कार्यकर्तॄन् संघटनस्य विचारधारया, कार्यपद्धत्या तथा राष्ट्रसेवायाः मूलमन्त्रेण सह संयोजयितुं प्रभावी माध्यमम् अस्ति। तेन उक्तं यत् भाजपायाः प्रत्येकं कार्यकर्ता राष्ट्रहितस्य, सेवायाः संघटनस्य च भावनया सह कार्यं करोति, एषा एव पक्षस्य महती शक्तिः अस्ति।

प्रदेशाध्यक्षेन प्रधानमन्त्रिणः नरेन्द्रमोदिनः “विकसित-भारत” इति सङ्कल्पस्य पूर्त्यर्थं भाजपायाः रीति-नीति-विचारधाराभिः सह निरन्तरं कार्यं कर्तुं आह्वानं कृतम्। तेन उक्तं यत् एतत् प्रशिक्षण-अभियानं संघटनं बूथ-स्तर-पर्यन्तं सुदृढं कर्तुं कार्यकर्तृषु वैचारिक-दृढतां च आनेतुं महत्त्वपूर्णां भूमिकां निर्वहिष्यति।

आदित्य-साहुना कार्यकर्तारः अग्रिम-कार्यक्रमेषु जनसम्पर्क-अभियानेषु च सक्रिय-सहभागितां कर्तुम् आह्वानम् कृतम्।। तेन उक्तं यत् प्रशिक्षण-काले प्राप्तानुभवः मार्गदर्शनं च बूथ-स्तर-पर्यन्तं प्रापयितुं आवश्यकम्।

कार्यक्रमस्य काले प्रदेशाध्यक्षेन पण्डित-दीनदयाल-उपाध्यायस्य “एकात्म-मानववादः” तथा “अन्त्योदयः” इत्येतयोः सिद्धान्तयोः विषयेऽपि विस्तरेण प्रकाशः निक्षिप्तः। प्रशिक्षण-वर्गे उपस्थितैः कार्यकर्तृभिः संघटनम् अधिकं सशक्तं कर्तुं सङ्कल्पः गृहीतः।

अस्मिन् अवसरे पूर्व-प्रदेशाध्यक्षः दिनेशानन्द-गोस्वामी, प्रदेश-महामन्त्री मनोज-सिंहः, विधायकः पूर्णिमा-साहुः, प्रदेश-मन्त्री शैलेन्द्र-सिंहः, जनपदाध्यक्षः, जनप्रतिनिधयः तथा बहुसंख्यया पक्षस्य पदाधिकारी कार्यकर्तारश्च उपस्थिताः आसन्।

Hindusthan Samachar / Divya Ranjan