चेन्नईनगरम्, १६ मे-मासः (हि.स.)। श्रीलङ्का-देशस्य सांसदः रामनाथन-अर्जुनन् तमिलनाडु-राज्यस्य मुख्यमन्त्रिणं जोसेफ-विजयम् प्रति श्रीलङ्कीय-तमिल-जनानां तथा तमिल-ईलम्-सम्बद्धानां विषयाणां विषये गम्भीरतया विचारं कृत्वा न्यायपूर्णानि संवेदनशीलानि च पदानि ग्रहीतुं प्रार्थितवान्।

तमिलनाडुनगरं प्राप्तः रामनाथन-अर्जुनन् शनिवासरे चेन्नई-सचिवालये पत्रकारैः सह संवादं कुर्वन् उक्तवान् यत् सः स्वजीवने द्वितीयवारं तमिलनाडुं प्राप्तवान्। तेन उक्तं यत् केवलं तमिल-भाषां वदन्तः इति कारणेन श्रीलङ्कादेशे त्रिलक्षाधिकाः तमिल-जनाः नरसंहारेण हताः आसन् तथा च मे-मासः तस्य दुःखद-इतिहासस्य स्मरणं कारयति।

रामनाथन-अर्जुनन् अवदत् यत् तमिल-सांसदत्वेन तमिल-समुदायस्य वेदनां संघर्षं च विश्वव्यापिषु तमिल-जनसमुदायेषु प्रापयितुं तस्य उत्तरदायित्वम् अस्ति। अस्यैव उद्देश्यस्य पूर्त्यर्थं सः तमिलनाडुं प्राप्तवान्।

श्रीलङ्का-सांसदेन उक्तं यत् तस्मै एषा अपेक्षा नासीत् यत् सः मुख्यमन्त्रिणा विजयेन तस्य मन्त्रिभिश्च सह मिलितुं शक्नोति। यस्मिन् दिने विजयेन मुख्यमन्त्रिपदस्य शपथः गृहीतः, तस्मिन्नेव दिने सः श्रीलङ्का-संसदि उपस्थितः आसीत्। तेन तमिल-आन्दोलनस्य नेतारौ कुट्टिमणि-थंगथुराई इत्येतयोः उल्लेखं कृत्वा उक्तं यत् कारागारे हत्यातः पूर्वं ताभ्यां उक्तं यत् यदि तयोः नेत्रे निष्कासिते भवेताम्, तर्हि ते अन्यस्मै तमिल-जनाय प्रदीयेताम्, येन तयोः नेत्राभ्यां स्वतन्त्र-तमिल-जातिः द्रष्टुं शक्येत।

श्रीलङ्का-सांसदेन उक्तं यत् तमिलनाडु-जनतया ऐतिहासिक-परिवर्तनार्थं मतदानं कृतम् तथा च तेन अस्य परिवर्तनस्य पूर्वानुमानं निर्वाचनात् त्रिमासपूर्वमेव श्रीलङ्कायां कृतम् आसीत्। तेन उक्तं यत् जननेतुः यथार्थवादी-राजनीतिं कुर्वतः मुख्यमन्त्रिणः विजयस्य भूमिका केवलं तमिलनाडु-पर्यन्तं सीमिता नास्ति, अपितु विश्वव्यापिषु तमिल-भाषिणां जनानां कृतेऽपि महत्त्वपूर्णा अस्ति। विशेषतः चत्वारिंशत्-वर्षीय-संघर्षानन्तरं विनाशं पीडां च अनुभवन्तः ईलम-तमिल-समुदायस्य कृते विजयस्य स्वरः अत्यन्तं महत्त्वपूर्णः अस्ति।

रामनाथन-अर्जुनन् तमिल-ईलम-जनानां पक्षतः मुख्यमन्त्रिणं विजयं प्रति प्रार्थनां कृत्वा उक्तवान् यत् तस्य स्वरः न्यायपूर्णानि पदानि च शीघ्रतया न, अपितु गम्भीर-विमर्शेन सह तादृशानि भवेयुः, यानि पीडित-तमिल-समुदायाय सान्त्वनां विश्वासं च दातुं शक्नुयुः।

तेन आरोपः कृतः यत् पूर्वं तमिलनाडु-राज्ये शासनं कृतवतः सर्वकारः श्रीलङ्कायां तमिल-जनानां विनाशं केवलं नाटकरूपेण अपश्यन्। तथापि तेन उक्तं यत् तस्मिन् काले वर्तमान-मुख्यमन्त्री विजयेन तमिल-समर्थने उपवास-आन्दोलनानि कृतानि आसन् तथा अन्यैः अनेकैः नेतृभिः अपि तमिल-समुदायस्य समर्थनार्थं स्वरः उत्थापितः आसीत्।

सांसदेन एतदपि आरोपितं यत् अद्य केचन नेतारः, विशेषतः सीमन्, तमिल-जनानां वेदनायाः उपयोगं केवलं तमिलनाडु-राजनीत्यां मत-प्राप्त्यर्थं कुर्वन्ति।

Hindusthan Samachar / Divya Ranjan