जगदलपुर-नगरम्, १८ मे-मासः (हि.स.)। केन्द्रीय-गृह-सहकारिता-मन्त्री अमित-शाहः स्वस्य त्रिदिवसीय-छत्तीसगढ-प्रवासस्य अन्तर्गतं सोमवासरे द्वितीय-दिने बस्तर-जनपदस्य नेतानार-ग्रामस्थितं सीआरपीएफ-शिविरं प्राप्तवान्। तत्र तेन “बलिदान-वीर-गुण्डाधूर-सेवा-डेरा” (जन-सुविधा-केन्द्रम्) इत्यस्य उद्घाटनं कृतम्। अनेन केन्द्रेण ग्रामीणजनानां कृते ग्रामे एव आधार-अद्यतनीकरणम्, ई-केवाईसी, दूरभाष-सङ्ख्या-अद्यतनीकरणम्, जन्म-प्रमाणपत्रम्, आय-प्रमाणपत्रम्, जाति-प्रमाणपत्रम् इत्यादयः अन्तर्जाल-सुविधाः उपलब्धाः भविष्यन्ति।

केन्द्रीय-गृह-मन्त्री शाहः धान-डेकी-प्रशिक्षण-केन्द्रे ग्रामीण-महिलाभिः सह संवादम् अकरोत्। डेकी-माध्यमेन तण्डुल-उत्पादनस्य विक्रयस्य च माध्यमेन ग्रामीण-महिलानां आय-वृद्धिः भविष्यति, अपि च निष्पन्नया धान्य-भूसादि पशूनां पौष्टिक-आहारः अपि भविष्यति। तेन इमली-प्रसंस्करण-केन्द्रे प्रशिक्षणं प्राप्नुवद्भिः स्वसहायता-समूहस्य महिलाभिः सह अपि संवादः कृतः, यत्र ताभिः कथं इमली-विक्रयस्य माध्यमेन आय-वृद्धिः क्रियते इति ज्ञापितम्। तेन बस्तर-प्रदेशस्य इमली-फलस्य स्वादः अनुभूतः तथा उक्तं यत् अत्रत्य इमली-फले बहु माधुर्यम् अस्ति। समूहस्य सदस्या दीर्घा-नागा अवदत् यत् अस्मिन् समूहॆ सम्मिल्य ताः वार्षिकरूपेण एक-लक्ष-रूप्यकपर्यन्तं आयम् अर्जयितुं शक्नुवन्ति। गुण्डाधूर-महिला-स्वसहायता-समूहे महिलाः इमली-प्रसंस्करणेन उच्च-गुणवत्तायुक्तम् इमली-पल्प-इति निर्मान्ति।

केन्द्रीय-गृहमन्त्री सिवन-प्रशिक्षण-केन्द्रे प्रशिक्षणं प्राप्नुवद्भिः महिलाभिः सह अपि मिलितवान्। तत्र महिलाभ्यः प्राथमिक-उन्नत-सिवन-प्रशिक्षणं प्रदीयते। विजय-कुमारी अवदत् यत् अत्र सिलाई-विद्याम् अधीत्य ताः स्वपरिवारस्य सम्यक् पालन-पोषणं कर्तुं समर्थाः भविष्यन्ति। तत्र तेन नेतानार-ग्रामनिवासिनी सुखदेवी इत्यनया सह अपि संवादः कृतः। सा अवदत् यत् तया स्वस्य पञ्च-मासीयायाः पुत्र्याः पद्मायाः आधार-पत्रं निर्मीतम्। आधार-सेवा-केन्द्रस्य उद्घाटनात् पूर्वं तस्यै १० किलोमीटर-परिमितं पादेन गत्वा नानगुर-स्थानं गन्तव्यं भवति स्म। इदानीं तत्र ग्रामीणजनानां कृते नूतन-आधार-अद्यतनीकरणम्, केवाईसी, दूरभाष-सङ्ख्या-अद्यतनीकरणम्, ई-आधार इत्यादयः सुविधाः उपलब्धाः भविष्यन्ति। सेवा-सेतु-केन्द्रे सोनामनी अवदत् यत् सा बहुकालात् ‘महतारी-वन्दन-योजना’-सम्बद्धम् ई-केवाईसी कर्तुम् इच्छति स्म, किन्तु दूरी-अधिकत्वात् गन्तुं न शक्नोति स्म। ग्रामे एव केन्द्रस्य उद्घाटनेन अद्य एव तया ई-केवाईसी सम्पन्नम्।

अस्मिन् अवसरे छत्तीसगढस्य मुख्यमन्त्री विष्णुदेव-सायः, उपमुख्यमन्त्री विजय-शर्मा, मुख्य-सचिवः विकासशीलः तथा अन्ये गणमान्य-नागरिकाः उपस्थिताः आसन्।

Hindusthan Samachar / Divya Ranjan