तिरुवनन्तपुरम्-नगरम्, १८ मे-मासः (हि.स.)। प्रधानमन्त्रिणः नरेन्द्र-मोदी, कांग्रेस-अध्यक्षः मल्लिकार्जुन-खरगे, लोकसभायां विपक्ष-नेता राहुल-गान्धी इत्यादयः अनेके नेतारः सोमवासरे केरल-राज्यस्य मुख्यमन्त्रिरूपेण कांग्रेस-दलस्य नेता वीडी-सतीशन-महोदयस्य शपथ-ग्रहणस्य उपलक्ष्ये शुभकामनाः अयच्छन्।

प्रधानमन्त्री नरेन्द्र-मोदी सामाजिक-माध्यम-मञ्चे ‘एक्स’ इत्यत्र अलिखत् यत् सः वीडी-सतीशन-महोदयाय मुख्यमन्त्री-पदस्य शपथ-ग्रहणस्य अवसरे अभिनन्दनं ददाति। केन्द्र-सर्वकारः जनतायाः आकाङ्क्षानां पूर्त्यर्थं केरलस्य नवगठित-सर्वकाराय सर्वसम्भवं सहयोगं प्रदास्यति।

कांग्रेस-अध्यक्षः मल्लिकार्जुन-खरगे अपि ‘एक्स’ इत्यत्र अलिखत् यत् सः वीडी-सतीशन-महोदयाय सम्पूर्ण-मन्त्रिपरिषदे च हार्दिक-शुभकामनाः ददाति। कांग्रेस-यूडीएफ-संघटनस्य सामूहिक-नेतृत्वे केरल-राज्यं वास्तविक-प्रगतिम् तथा भविष्याधारित-विकासस्य दिशि अग्रे गमिष्यति। गरिमा, न्यायः, स्वतन्त्रता, समावेशनं तथा सौहार्दम् एते तेषां प्रतिबद्धतायाः प्रमुखाधाराः सन्ति।

राहुल-गान्धी अवदत् यत् केरलस्य जनतया अस्य सर्वकारस्य कृते सङ्घर्षः कृतः अस्ति तथा जनतायाः स्वरः एव सर्वकारस्य मार्गदर्शनं करिष्यति। तेन वीडी-सतीशन-महोदयाय सम्पूर्ण-मन्त्रिपरिषदे च शुभकामनाः प्रदाय उक्तं यत् इदानीं एषः सर्वकारः प्रत्येकं केरलवासिनः स्वरस्य प्रतिनिधित्वं करिष्यति। राहुल-गान्धी अवदत् यत् केसी-वेणुगोपाल-महोदयेन अस्य अभियानस्य नेतृत्वं अग्रिम-पङ्क्तौ स्थित्वा कृतम्। एष: विजयः यूडीएफ-संघटनस्य प्रत्येकं कार्यकर्तुः तथा डिजिटल-योद्धुः अस्ति, ये अभियान-कालॆ निरन्तरं परिश्रमम् अकुर्वन्।

तिरुवनन्तपुरम्-नगरस्य सेन्ट्रल-स्टेडियम-स्थले आयोजिते शपथ-ग्रहण-समारोहे भारतीय-जनता-पक्षस्य केरल-प्रदेश-अध्यक्षः राजीव-चन्द्रशेखरः अपि सहभागी अभवत्। तेन उक्तं यत् मुख्यमन्त्रिणा तम् अस्मिन् समारोहे उपस्थातुम् आमन्त्रित: आसीत्, सः च स्वदलस्य समर्थकानां च प्रतिनिधित्वं कुर्वन् अत्र उपस्थितः भूत्वा प्रसन्नः अस्ति।

शपथ-ग्रहणस्य अनन्तरं मन्त्रिपदे नियुक्ता कांग्रेस-नेत्री बिन्दु-कृष्णा अवदत् यत् सा वीडी-सतीशन-मन्त्रिपरिषदः अङ्गत्वेन स्वं गौरवान्वितां मन्यते। यूडीएफ-सर्वकारः केरल-राज्ये महत् परिवर्तनम् आनेष्यति तथा जनतायै कार्यं करिष्यति।

मुख्यमन्त्री-पदस्य शपथ-ग्रहणानन्तरं सतीशन-महोदयः अवदत् यत् षष्टि-वर्षाणां अनन्तरम् एतादृशः अवसरः प्राप्तः, यदा यूडीएफ-संघटनस्य सम्पूर्णा मन्त्रिपरिषद् एकत्र शपथं गृहीतवती। तेन सह २० विधायकाः मन्त्रिपदस्य शपथं गृहीतवन्तः। तेषु कांग्रेस-दलस्य ११, इण्डियन-यूनियन-मुस्लिम-लीग-दलस्य ५ तथा यूडीएफ-संघटनस्य अन्य-चत्वारः घटक-दलानां प्रत्येकेभ्यः एकः-एकः विधायकः मन्त्रिपरिषदि समाविष्टः।

शपथ-ग्रहण-समारोहे मल्लिकार्जुन-खरगे, राहुल-गान्धी, प्रियंका-गान्धी, केसी-वेणुगोपालः, कर्नाटक-राज्यस्य मुख्यमन्त्री सिद्धारमैया तथा हिमाचल-प्रदेशस्य मुख्यमन्त्री सुखविन्द्र-सिंह-सुक्खू इत्यादयः अनेके वरिष्ठ-नेतारः उपस्थिताः आसन्।

Hindusthan Samachar / Divya Ranjan