नव-दिल्ली-नगरम्, १८ मे-मासः (हि.स.)। भारतीय-जनता-पक्षेण (भाजपा) प्रधानमन्त्रिणः नरेन्द्र-मोदिनः स्वीडन-देशस्य सर्वोच्च-राजकीय-सम्मानेन ‘रॉयल-ऑर्डर-ऑफ-द-पोलर-स्टार’ इत्यनेन सम्मानिते सति एतत् प्रत्येकं भारतीयस्य गौरवस्य क्षणः इति उक्तम्।

भाजपा-पक्षस्य प्रवक्ता सांसदः च डॉ.सुधांशु-त्रिवेदी सोमवासरे पक्ष-मुख्यालये आयोजितायां पत्रकार-वार्तायाम् अवदत् यत् भारतस्य जन-जनस्य हित-रक्षणार्थं प्रधानमन्त्री मोदी अत्यन्त-महत्त्वपूर्णायां विदेश-यात्रायाम् अस्ति। स्वीडन-सर्वकारेण भारतस्य अद्यावधि सर्वाधिक-लोकप्रियः प्रधानमन्त्री तथा विश्वस्य सर्वाधिक-लोकप्रिय-नेतृषु गण्यमानः प्रधानमन्त्री मोदी ‘रॉयल-ऑर्डर-ऑफ-पोलर-स्टार’ इत्यनेन अलंकृतः। अनेन प्रकारेण प्रधानमन्त्री मोदी स्वस्य अस्मिन् कार्यकाले एकत्रिंशत् वैश्विक-सम्मानैः अलंकृतः अस्ति।

डॉ.त्रिवेदी अवदत् यत् एतत् सम्मानं केवलं व्यक्तिरूपेण मोदिनः सम्मानं नास्ति, अपितु प्रधानमन्त्रिणा १४०-कोटि-भारतीयानां क्षमता तथा उत्कृष्टता वैश्विक-स्तरे प्रतिष्ठापितवती इत्यस्य प्रतीकः अस्ति। एषः प्रत्येक-भारतीयस्य कृते गौरवस्य क्षणः अस्ति।

तेन उक्तं यत् वैश्विक-ऊर्जा-संकटस्य मध्ये प्रधानमन्त्रिणः मोदी-महोदयस्य यूनाइटेड-अरब-अमीरात-देश-यात्रायाः काले भारतस्य कृते महती उपलब्धिः अभवत्। यूएई-देशेन भारतस्य रणनीतिक-पेट्रोलियम-भण्डारस्य वर्धनार्थं प्रायः ३०-अर्ब-डॉलर-परिमितस्य सन्धे: विषये सहमति: प्रदत्ता। अनेन भारतस्य रणनीतिक-तैल-भण्डारण-क्षमतायां प्रायः ७०-प्रतिशत-वृद्धेः सम्भावना वर्तते। एतदतिरिक्तं यूएई-देशस्य एका निर्माणी भारते ५-अर्बुद-डॉलर-परिमित-निवेशस्य घोषणाम् अपि कृतवती। अनेन उभय-देशयोः मध्ये ऊर्जा-व्यापार-आर्थिक-सहयोगः अधिकं सुदृढः भविष्यति।

Hindusthan Samachar / Divya Ranjan