जगदलपुर-नगरम्, १८ मे-मासः (हि.स.)। केन्द्रीय-गृह-सहकारिता-मन्त्री अमित-शाहः स्वस्य बस्तर-प्रवासस्य अन्तर्गतं सोमवासरे जगदलपुर-स्थिताम् अमर-वाटिकां प्राप्य माओवाद-विरुद्ध-सङ्घर्षे स्वप्राणानां सर्वोच्च-बलिदानं दत्तवन्तः एकसहस्राधिकान् अमर-बलिदानी-सैनिकान् प्रति श्रद्धाञ्जलिम् अर्पितवान्। अस्मिन् अवसरे छत्तीसगढस्य मुख्यमन्त्री विष्णुदेव-सायः अपि उपस्थितः आसीत्।

केन्द्रीय-गृहमन्त्री शाहः अवदत् यत् बस्तर-प्रदेशस्य भूमौ शान्तेः, सुरक्षायाः तथा विकासस्य स्थापनायां अस्माकं सैनिकानां बलिदानम् अविस्मरणीयम् अस्ति। तेन उक्तं यत् देशस्य सुरक्षार्थं स्वप्राणान् समर्पितवन्तः वीर-सैनिकानां त्यागः कदापि व्यर्थः न भविष्यति। तेन स्पष्टतया उक्तं यत् केन्द्र-राज्य-सर्वकारौ स्थायी-शान्तेः स्थापनार्थं, विकासस्य अन्तिम-जनपर्यन्तं प्रसारणार्थं तथा माओवादस्य समूल-उन्मूलनार्थं पूर्ण-प्रतिबद्धतया कार्यं कुरुतः।

अस्मिन् काले केन्द्रीय-गृहमन्त्री बीजापुर-नक्सली-आक्रमणे बलिदानिनौ कालेन्द्र-प्रसाद-नायकः तथा पवन-कुमार-मण्डावी इत्येतयोः परिजनैः सह आत्मीय-मिलनम् अकरोत्। तेन परिवार-जनानां मध्ये उपविश्य तेषां दुःखं सहभागं कृतम्, सान्त्वना दत्ता तथा सर्वकारस्य पक्षतः सर्वसम्भव-सहायतायाः आश्वासनं दत्तम्। तेन सुरक्षाबलस्य सैनिकै: सह संवादं कृत्वा तेषाम् उत्साहवर्धनम् अपि कृतम्। तेषां साहसस्य समर्पणस्य च प्रशंसा कृता।

मुख्यमन्त्री विष्णुदेव-सायः अवदत् यत् शहीद-जवानानां बलिदानं छत्तीसगढ-राज्यं कदापि न विस्मरिष्यति। तेन उक्तं यत् राज्य-सर्वकारः शहीद-परिवाराणां सम्मान-सुरक्षा-कल्याणार्थं पूर्ण-संवेदनशीलतया कार्यं करोति। तेन उक्तं यत् बस्तर-प्रदेशः अधुना शान्तेः, विश्वासस्य विकासस्य च नूतन-दिशि अग्रे गच्छति, अस्मिन् च सुरक्षाबलानां महत्त्वपूर्णा भूमिका अस्ति।

अस्मिन् अवसरे उपमुख्यमन्त्री तथा गृहमन्त्री विजय-शर्मा, वन-पर्यावरण-मन्त्री केदार-कश्यपः, जगदलपुर-विधायकः किरण-देवः इत्येतै: सह जनप्रतिनिधयः, वरिष्ठ-आरक्षक-प्रशासनिक-अधिकारिणः च उपस्थिताः आसन्।

Hindusthan Samachar / Divya Ranjan