गुवाहाटी, 19 मईमासः, (हि.स.)।

केन्द्रीयपत्तन-पोतपरिवहन-जलमार्गमन्त्री सर्बानन्दसोनोवालः उक्तवान् यत् गुवाहाटीनगरं केन्द्रसरकारस्य महत्त्वाकाङ्क्षिण्याः वाटर्-मेट्रो-परियोजनायाः प्रथमचरणाय आधिकारिकरूपेण चयनितम् अस्ति।

सोनोवालः मङ्गलवासरे गुवाहाटीनगरस्य एकस्मिन् होटले ब्रह्मपुत्रबोर्डस्य बैठकानन्तरं पत्रकारैः सह वार्तालापं कुर्वन् आसीत्। तेन उक्तं यत् कोच्चि-वाटर्-मेट्रो-परियोजनायाः आदर्शे विकसितं एतत् पर्यावरणानुकूलं जलपरिवहनतन्त्रं नगरीययातायातं सुगमं कर्तुं मार्गजामस्य न्यूनीकरणे च महत्त्वपूर्णां भूमिकां निर्वहिष्यति। परियोजनायाः प्रथमचरणे गुवाहाटी-नगरस्य अतिरिक्तं श्रीनगरम्, पटनम्, वाराणसी, अयोध्या तथा प्रयागराजः अपि समाविष्टाः सन्ति। अपरतः असमराज्यस्य तेजपुरम् तथा डिब्रूगढनगरं द्वितीयचरणाय प्रस्तावितम् अस्ति।

केन्द्रीयमन्त्रालयेन हालैव ड्राफ्ट्-नेशनल्-वाटर्-मेट्रो-पॉलिसी-२०२६ प्रकाशितम्, यस्य उद्देश्यं जलमेट्रो-परियोजनासु पोतानां रूपरचना, चार्जिङ्-सुविधाः तथा सुरक्षातन्त्रेषु एकरूपतां आनयितुम् अस्ति। अस्यां नीतौ विद्युत्चालित-हाइब्रिड्-फेरी-सेवानां विशेषप्राथमिकता प्रदत्ता अस्ति, येन पर्यावरणसंरक्षणस्य प्रोत्साहनं भवेत्।

इनलैण्ड्-वॉटरवेज्-अथॉरिटी-ऑफ्-इण्डिया इत्यनेन देशस्य अष्टादशस्थानेषु व्यवहार्यताअध्ययनार्थं कोच्चि-मेट्रो-रेल्-लिमिटेड इत्यस्मै उत्तरदायित्वं प्रदत्तम् आसीत्। गुवाहाटीनगरस्य कृते निर्मितायाः व्यवहार्यताप्रतिवेदनस्य समीक्षा कृत्वा तस्य अनुमोदनमपि प्रदत्तम्।

सरकारस्य मतम् अस्ति यत् एषा परियोजना पारम्परिक-मेट्रो-रेल्-प्रणालीभ्यः अपेक्षया अधिका किफायती सिद्धा भविष्यति, यतः अस्याम् पूर्वमेव उपलब्धानां नौगम्य-जलमार्गाणां उपयोगः भविष्यति तथा न्यूनतर-आधारसंरचनायाः आवश्यकता भविष्यति। अस्याः परियोजनायाः माध्यमेन गुवाहाटीनगरे नगरीयसंपर्कव्यवस्थायाः नूतना गतिः प्राप्ता भविष्यतीति अपेक्षा अस्ति।

----------------

Hindusthan Samachar / Dheeraj Maithani