ओस्लो, 19 मईमासः (हि.स.)।प्रधानमन्त्री नरेन्द्रमोदी मंगलवासरे उक्तवान् यत् वैश्विकतनावस्य संघर्षाणां च वर्तमानकाले भारतं नॉर्डिकदेशाश्च नियमाधारिताम् अन्ताराष्ट्रियव्यवस्थां सुदृढां कर्तुं तथा आतंकवादस्य विरुद्धं “नो कम्प्रोमाइज, नो डबल स्टैण्डर्ड” इति नीतौ एकमताः सन्ति।

प्रधानमन्त्री नॉर्डिकदेशानां नेतृभिः सह संयुक्तप्रेसवक्तव्ये उक्तवान् यत् यूक्रेन-, पश्चिम-एशिया-, अन्यप्रदेशेषु च प्रवर्तमानसंघर्षाणां मध्ये भारतं नॉर्डिकदेशाश्च शत्रुतायाः शीघ्रसमाप्तेः स्थायिशान्तेः प्रयासानां च समर्थनं निरन्तरं करिष्यन्ति। सः अवदत् यत् बहुपक्षीयसंस्थासु सुधारः आवश्यकः अपि अस्ति अत्यन्तावश्यकः च। मोदी उक्तवान् यत् लोकतन्त्रस्य, विधिशासनस्य, बहुपक्षवादस्य च प्रति साझा-प्रतिबद्धता भारतं नॉर्डिकदेशांश्च स्वाभाविकसाझेदारान् करोति। प्रौद्योगिकी-स्थिरताक्षेत्रयोः साझा-प्राथमिकताः उभयपक्षयोः मध्ये सहयोगस्य व्यापकावकाशान् उत्पादयन्ति।

प्रधानमन्त्री उक्तवान् यत् अष्टवर्षपूर्वं भारत-नॉर्डिक-प्रारूपस्य स्थापना कृता आसीत् तथा गतकेषु वर्षेषु सम्बन्धेषु उल्लेखनीयप्रगतिः अभवत्। तेन सूचितं यत् गतदशवर्षेषु भारतस्य नॉर्डिकदेशानां च मध्ये द्विपक्षीयव्यापारः प्रायः चतुर्गुणः वर्धितः, नॉर्डिकदेशेभ्यः भारते निवेशः च प्रायः द्विशतप्रतिशतेन वर्धितः। सः अवदत् यत् नॉर्डिकदेशानां निवेशकोषाः भारतस्य तीव्रार्थिकवृद्धौ महत्त्वपूर्णभागीदाराः भवन्ति। तीव्रतया वर्धमानः व्यापारः निवेशश्च भारतस्य नॉर्डिकदेशानां च अर्थव्यवस्थासु सकारात्मकयोगदानं कृतवन्तौ तथा सहस्रशः नूतननियोजनानि उत्पादितवन्तौ।

मोदी उक्तवान् यत् अक्तूबर् २०२५ मासात् नॉर्वे-, आइसलण्ड-, अन्यैः ईएफटीए-देशैश्च सह व्यापार-आर्थिक-सहकारिता-सहमतेः कार्यान्वयनं कृतम्। एतदतिरिक्तं सद्यःएव भारत-यूरोपीय-संघयोः मध्ये मुक्तव्यापारसम्झौतः अपि अभवत्, यस्मिन् डेनमार्क-, फिनलण्ड-, स्वीडनदेशाः भागीदाराः सन्ति। एते महत्वाकाङ्क्षिणः व्यापारसहमतयो भारत-नॉर्डिक-सम्बन्धेषु नूतनस्य स्वर्णिमयुगस्य आरम्भं करिष्यन्ति।

प्रधानमन्त्री उक्तवान् यत् भारतस्य नॉर्डिकदेशानां च मध्ये रणनीतिक-सहकारि-अन्तर्गतं स्वीडनदेशस्य उन्नतविनिर्माण-रक्षासामर्थ्यं, फिनलण्डदेशस्य दूरसञ्चार-डिजिटल-प्रौद्योगिकी, डेनमार्कदेशस्य साइबरसुरक्षा-हेल्थ-टेक-विशेषज्ञता च भारतस्य प्रतिभया सह संयोज्य विश्वाय विश्वसनीयसमाधानानि विकसितानि भविष्यन्ति। सः अवदत् यत् अनुसन्धानं नवोन्मेषश्च उभयपक्षयोः साझेदार्याः महत्त्वपूर्णः स्तम्भः अस्ति, विश्वविद्यालयानां, प्रयोगशालानां, स्टार्टअप-इकोसिस्टम्-मध्ये सम्बन्धसुदृढीकरणस्य विषये विशेषबलं दास्यते। सहैव आर्कटिक-, ध्रुवीय-अनुसन्धान-, कौशलविकास-, प्रतिभाविनिमयक्षेत्रेषु अपि सहयोगः अग्रे नीयते।

प्रधानमन्त्री उक्तवान् यत् अनेकासु नॉर्डिकभाषासु “सम्बन्ध” इति शब्दस्य अर्थः संयोजनम्, सम्बन्धः, बन्धनं च भवति तथा हिन्दीभाषायामपि अस्य अर्थः तथैव अस्ति। एषा केवलं शब्दसमानता न, अपितु सहकारि-विचाराणां निकटतायाश्च प्रतीकः अस्ति।

---------------

Hindusthan Samachar / Dheeraj Maithani