जयपुरनगरम्, १९ मे-मासः (हि.स.)। राजस्थान-विधानसभा स्वस्य पञ्चसप्ततितमे वर्षे प्रवेशं कर्तुं गच्छति। एतम् ऐतिहासिक-अवसरं स्मरणीयं कर्तुं विधानसभायाः पक्षतः एकवर्षपर्यन्तं “अमृत-महोत्सवस्य” अन्तर्गतं चत्वारि विशाल-कार्यक्रमाणि आयोजितानि भविष्यन्ति। विधानसभा-अध्यक्षः वासुदेव-देवनानी उक्तवान् यत् एतत् आयोजनं लोकतन्त्रस्य, संसदीय-परम्पराणां तथा जनविश्वासस्य राष्ट्रिय-उत्सवः भविष्यति। मङ्गलवासरे जयपुर-स्थिते विधानसभा-भवने राष्ट्रमण्डल-संसदीय-संघस्य राजस्थान-शाखायाः कार्यकारिणी-समितेः सभायाम् एतेषां कार्यक्रमाणां रूपरेखा निर्धारिताभवत्।

सभायां संसदीय-कार्य-मन्त्री जोगाराम-पटेलः, प्रतिपक्ष-नेता टीकाराम-जूली इत्यादयः अनेके विधायकाः वरिष्ठ-अधिकारीणः च उपस्थिताः आसन्। विधानसभा-अध्यक्षः देवनानी उक्तवान् यत् अमृत-महोत्सवः केवलम् औपचारिक-आयोजनं न भविष्यति, अपितु लोकतन्त्रस्य इतिहासं, वर्तमानं भविष्यञ्च संयोजयन् ऐतिहासिक-अवसरः भविष्यति। कार्यक्रमेषु राष्ट्रपतिः, उपराष्ट्रपतिः, प्रधानमन्त्री, लोकसभा-अध्यक्षः च आमन्त्रिताः भविष्यन्ति। तेन सह राज्यपालः, मुख्यमन्त्री, मन्त्रिगणः संसदीय-विशेषज्ञाश्च अपि सहभागिनः भविष्यन्ति। तेन उक्तं यत् अस्मिन् आयोजने परम्परा, नवाचारः, महिला-शक्तिः, युवा-ऊर्जा तथा लोकतान्त्रिक-मूल्यानां समागमः दृश्यते।

अमृत-महोत्सवस्य प्रथमः विशाल-कार्यक्रमः जुलाई-मासे भविष्यति। अस्मिन् प्रथम-विधानसभातः षोडशमी-विधानसभापर्यन्तं पूर्व-वर्तमान-विधायकानां विशाल-सम्मेलनम् आयोजितं भविष्यति। अस्मिन् सम्मेलने राजस्थान-विधानसभायाः ऐतिहासिकी यात्रा, महत्त्वपूर्ण-विधानानि, सामाजिक-परिवर्तनानि तथा संसदीय-परम्परायाः विषये चर्चा भविष्यति। पूर्व-विधानसभा-अध्यक्षाणां, उपाध्यक्षाणां वरिष्ठ-सदस्यानां च सम्मानम् अपि करिष्यते। तेन सह विधानसभायाः डिजिटल-रूपान्तरणं लोकतन्त्रस्य समस्यायाः च विषये विचार-विमर्शः अपि भविष्यति।

अक्टूबर-मासे भवितव्यः द्वितीयः विशाल-कार्यक्रमः महिला-विधायकाभ्यः समर्पितः भविष्यति। अस्मिन् देशस्य सर्वतः महिला-विधायकाः सहभागं करिष्यन्ति। सम्मेलने नीति-निर्माणम्, प्रशासनक्षेत्रे महिलानां वर्धमाना भूमिका, महिला-नेतृत्वम्, युवा-महिला-विधायकानां आकाङ्क्षाः तथा पूर्व-महिला-जनप्रतिनिधीनां अनुभवाः सहभागीकृताः भविष्यन्ति। अमृत-महोत्सवस्य अन्तर्गतं युवानः अपि लोकतन्त्रेण सह संयोजयितुं विशेष-प्रयत्नः करिष्यते। जनवरी-मासे आयोज्यमाने कार्यक्रमे विद्यालय-महाविद्यालय-विश्वविद्यालय-स्तरे संविधान-जागरूकता-प्रतियोगितानां विजेतारः छात्राः युवा-संसदि सहभागं करिष्यन्ति।

अस्य कालस्य मध्ये युवभ्यः संसदीय-परम्पराणां, लोकतान्त्रिक-प्रक्रियाणां तथा संविधानस्य मूल्यानां विषये सूचना प्रदास्यते। अमृत-महोत्सवस्य समापनम् राजस्थान-दिवसे २०२७ तमे वर्षे “अखिल-भारतीय-विधायी-महाकुम्भ”रूपेण करिष्यते। अस्मिन् देशस्य सर्वेषां विधानमण्डलानां अध्यक्षाः, उपाध्यक्षाः, सचिवाः तथा विधायी-नेतृत्वम् आमन्त्रितं भविष्यति। विधानसभा-अध्यक्षः वासुदेव-देवनानी उक्तवान् यत् एतत् आयोजनं भारतीय-संसदीय-लोकतन्त्रस्य गौरवशालिनीं परम्परां नूतन-वंशाय प्रापयितुं ऐतिहासिक-अवसरः सिद्धः भविष्यति।

Hindusthan Samachar / Divya Ranjan