Enter your Email Address to subscribe to our newsletters
हैदराबादम्, 02 अप्रैलमासः (हि.स.)। द्वादशस्य अन्ताराष्ट्रिय-योग-दिवसस्य पञ्चाशद्दिनात्मक-उल्टी-गणनायाः अवसरः हैदराबाद-नगरे कान्हा-शान्ति-वनम् नाम्नि स्थले ऐतिहासिकी उपलब्धिः अभिलेखिता। अस्मिन् भव्ये आयोजने प्रायः षट्सहस्राधिकाः (६,०००) जनाः एकत्रिताः सन्तः ‘भुजङ्गासनम्’ एकस्मिन् समये कृत्वा नूतनम् एशिया-अभिलेखं स्थापितवन्तः।
अयं कार्यक्रमः मोरारजी-देसाई-राष्ट्रीय-योग-संस्थानस्य आधिपत्ये आयोजितः आसीत्। प्रतिभागिनः निर्दिष्टकालपर्यन्तं समवेतरूपेण भुजङ्गासनस्य अभ्यासं कृत्वा एशिया-बुक्-ऑफ्-रिकॉर्ड्स इत्यस्मिन् स्वनाम अभिलेखितवन्तः, यस्य आधिकारिक-मान्यता अपि प्राप्ता।
अस्य आयोजनस्य मुख्यः उद्देश्यः केवलं अभिलेखनिर्माणं न आसीत्, किन्तु जनान् योगं स्वस्य दैनिक-जीवनशैलीमध्ये समावेशयितुं प्रेरयितुम् अपि आसीत्। कार्यक्रमे विभिन्नदेशानां उच्चायोग-प्रतिनिधयः आभासी-माध्यमेन सम्बद्धाः, तथा विश्वस्य विविधभागेभ्यः आगताः योगसाधकाः शरणार्थिनः च उत्साहेन सहभागं कृतवन्तः।
अस्मिन् अवसरे केन्द्रीय-मन्त्रिणा जी किशन रेड्डिना सहिताः अनेके गणमान्याः उपस्थिताः आसन्। योगाभ्यासस्य नेतृत्वं संस्थानस्य निदेशकः डॉ. काशीनाथः कृतवान्, येन प्रतिभागिभ्यः सम्यक् प्रकारेण आसनस्य आचरणे मार्गदर्शनं दत्तम्।
कार्यक्रमस्य अन्ते कमलेश पटेल (दाजी), यः श्रीरामचन्द्र-मिशनस्य अध्यक्षः अस्ति, तस्य निर्देशनमध्ये सामूहिक-ध्यान-सत्रस्य आयोजनं कृतम्। अस्य ध्यान-सत्रस्य प्रभावेण सम्पूर्णं वातावरणं आध्यात्मिक-ऊर्जया परिपूर्णम् अभवत्।
एषा उपलब्धिः केवलं बहुसंख्यक-जनसहभागितां न दर्शयति, अपि तु योगस्य समग्र-स्वास्थ्यस्य च प्रति समाजे वर्धमानां जागरूकतां प्रतिबद्धतां च अपि प्रकाशयति।--------------
हिन्दुस्थान समाचार