नवदिल्ली, २० मे-मासः (हि.स.)। रेखा गुप्ता बुधवासरे ‘टैलेण्ट-हण्ट-योजना — विचाराणाम् उड्यनम् २०२६-२७’ इत्यस्याः घोषणां कृतवती। अस्मिन् अवसरे मुख्यमन्त्री अवदत् यत् एषा योजना देहली-नगरस्य यूनां प्रतिभायाः परिचयाय, परिष्काराय, राष्ट्रीयस्तरपर्यन्तं प्रेषणाय च सशक्तं मञ्चं भविष्यति।

जनसेवा-सदने आयोजितायां पत्रकार-परिषदि मुख्यमन्त्रिणा अस्याः महत्त्वाकाङ्क्षिण्याः योजनायाः आधिकारिक-चिह्नस्य अपि अनावरणं कृतम्। सा अवदत् यत् एतत् चिह्नं देहली-नगरस्य यूनां स्वप्नानां, सृजनशीलतायाः, उड्डीयमान-आत्मविश्वासस्य च प्रतीकं वर्तते। अस्मिन् अवसरे देहली-शासनस्य कला-संस्कृति-भाषा-मन्त्री कपिलः मिश्रा अपि उपस्थितः आसीत्।

मुख्यमन्त्री अवदत् यत् अस्याः योजनायाः उद्देश्यं केवलं प्रतिभानां अन्वेषणं नास्ति, अपितु देहली-नगरस्य युवभ्यः एतादृशं मञ्चं निर्मातुं यत् सुगमता, समावेशिता, विविधता तथा प्रतिभाशालि-यूनां स्वरोजगार-आत्मनिर्भरता-अवसराणां वर्धनं करिष्यति। सा अवदत् यत् एषा योजना विविध-सामाजिक-आर्थिक-पृष्ठभूमिभ्यः आगतानां यूनां कृते समानावसरान् प्रदास्यति तथा तेषां सृजनात्मक-क्षमतायाः नूतनां दिशां दास्यति।

मुख्यमन्त्री उक्तवती यत् एषा योजना देहली-नगरस्य सर्वेषु ७० विधानसभाक्षेत्रेषु प्रवर्तिष्यते। योजनायै १० कोटि-रूप्यकाणां वित्तीय-प्रावधानं कृतम् अस्ति। अस्याः अन्तर्गतं २५,००० अधिकाः युवानः विभिन्न-चरणेषु सहभागितायाः अवसरं प्राप्स्यन्ति। सम्पूर्णा प्रक्रिया पारदर्शि-सुव्यवस्थित-चरणबद्ध-रीत्या आयोजिता भविष्यति, येन प्रत्येकं प्रतिभागिने समानः अवसरः लप्स्यते। १६ तः ३५ वर्षपर्यन्तं युवानः अद्य आरभ्य समर्पितेन अन्तर्जाल-पटलेन निःशुल्कं पञ्जीकरणं कर्तुं शक्नुवन्ति।

सप्तसु विधासु प्रतियोगिताः भविष्यन्ति। तासु गायन-वर्गे शास्त्रीय-सङ्गीतम्, लोक-सङ्गीतम्, अशास्त्रीय-सङ्गीतं च समाविष्टम् अस्ति। नृत्य-वर्गे शास्त्रीय-लोक-आधुनिक-नृत्यानि प्रदर्श्यन्ते। एतदतिरिक्तं ललितकला-डिजिटल-कला, मूर्तिकला-पॉटरी, सङ्गीत-रचना, वाद्य-सङ्गीतम्, अभिनय-रङ्गमञ्चादिषु अपि प्रतिभागिभ्यः स्वप्रतिभां प्रदर्शयितुं अवसरः प्रदास्यते।

मुख्यमन्त्री अवदत् यत् एषः कार्यक्रमः चतुर्षु चरणेषु आयोज्यते। प्रथमचरणे अन्तर्जाल-पञ्जीकरणं तथा सप्तसु वर्गेषु प्राप्तानाम् आवेदनानां परीक्षणं लघुसूचीकरणं च भविष्यति। देहली-नगरस्य सर्वेभ्यः ७० विधानसभाक्षेत्रेभ्यः प्रायः २४,५०० प्रतिभागिनः अग्रिमचरणाय चयनिताः भविष्यन्ति। द्वितीयचरणे ३५ समूहस्तरीय-प्रतियोगिताः आयोज्यन्ते, यत्र प्रत्येकस्मिन् समूहस्तरे द्वे विधानसभाक्षेत्रे समाविष्टे भविष्यतः। अस्मिन् चरणे विभिन्न-वर्गेभ्यः आहत्य २,४५० प्रतिभागिनः चयनिताः भविष्यन्ति। तृतीयचरणे चयनित-प्रतिभागिनां कृते चतस्रः क्षेत्रीयस्तरीय-प्रतियोगिताः आयोज्यन्ते। ततः अनन्तरं अन्तिमचरणे २८ अन्तिम-प्रतिभागिनां मध्ये अगस्तमासे राज्यस्तरीय-भव्य-समापन-समारोहः भविष्यति, यस्मिन् सप्तसु वर्गेषु विजेतृभ्यः पुरस्कारराशिः प्रदास्यते। प्रत्येकं अन्तिम-प्रतिभागिने अपि सम्मानितः भविष्यति।

मुख्यमन्त्री उक्तवती यत् प्रतिभागिनां मूल्याङ्कने २५ प्रतिशतं भारः सामान्यजनस्य अन्तर्जाल-मतदानस्य भविष्यति, ७५ प्रतिशतं च विशेषज्ञ-निर्णायक-मण्डलस्य मूल्याङ्कनाधारितं भविष्यति। निर्णायक-मण्डले सम्बन्धित-क्षेत्राणां अनुभवी-प्रतिष्ठित-विशेषज्ञाः समावेश्यन्ते। भव्य-समापन-समारोहे प्रसिद्धाः बॉलीवुड्-कलाकाराः विशिष्टातिथयश्च आमन्त्रिताः भविष्यन्ति।प्रतियोगितायां प्रथमस्थानं प्राप्ताय प्रतिभागिने २.५ लक्ष-रूप्यकाणि, द्वितीयस्थान-प्राप्ताय २ लक्ष-रूप्यकाणि, तृतीयस्थान-प्राप्ताय १.५ लक्ष-रूप्यकाणि, चतुर्थस्थान-प्राप्ताय १ लक्ष-रूप्यकाणि पुरस्काररूपेण प्रदास्यन्ते। एतदतिरिक्तं सर्वे चयनिताः उत्कृष्ट-प्रदर्शनकर्तारश्च प्रमाणपत्रैः, पुरस्कारैः, पदकैश्च सम्मानिताः भविष्यन्ति।

मुख्यमन्त्री अवदत् यत् ‘विचाराणाम् उड्डयनम्’ केवलं प्रतिभा-अन्वेषण-कार्यक्रमः नास्ति, अपितु देहली-नगरस्य यूनां कृते स्वपरिचयं देशे विश्वे च स्थापयितुं मञ्चः अस्ति। अग्रे एते प्रतिभाशालिनः युवानः विविध-सामाजिक-अभियानेषु ‘ब्राण्ड-ऐम्बेसडर’रूपेणापि संयोजयिष्यन्ते, येन ते समाजे सकारात्मक-परिवर्तनस्य वाहकाः भवितुं शक्नुवन्ति। सा युवभ्यः आह्वानं कृतवती यत् ते स्वस्वप्नानां नूतनम् उड्डयनं दद्युः तथा देहली-शासनस्य अस्य मञ्चस्य अधिकाधिकं लाभं गृह्णीयुः।

मन्त्री कपिलः मिश्रा अवदत् यत् राजधानी देहली ‘देहली-टैलेण्ट-हण्ट — विचाराणाम् उड्डयनम्’ इत्येतादृशस्य विशाल-आयोजनस्य कृते सज्जा वर्तते। ‘आत्मनिर्भर-भारत’-संकल्पस्य दिशि एषा योजना देहली-नगरस्य युवभ्यः स्वकला-सृजनशीलता-कौशलस्य च विशालमञ्चे प्रदर्शनस्य सुवर्णावसरं प्रदास्यति तथा तेषां आत्मनिर्भर-भवितुं मार्गं प्रशस्तं करिष्यति। ‘देहली-टैलेण्ट-हण्ट’ इत्यस्य उद्देश्यं केवलं प्रतिभायाः अन्वेषणं न, अपितु तस्याः समुचित-मार्गदर्शनं, परिचयं, अवसरप्रदानं च अस्ति।

Hindusthan Samachar / Divya Ranjan