नव दिल्ली, 21 मईमासः (हि.स.)।पूर्वप्रधानमन्त्रिणः राजीवगान्धी महोदयस्य पञ्चत्रिंशत्तमायां पुण्यतिथौ अद्य अत्र वीरभूमौ श्रद्धाञ्जलिसभायाः आयोजनं कृतम्। काँग्रेसाध्यक्षः मल्लिकार्जुनखर्गे, काँग्रेससंसदीयदलस्य अध्यक्षा सोनियागान्धी, लोकसभायां विपक्षनेता राहुलगान्धी तथा काँग्रेससांसदा प्रियङ्कागान्धी वाड्रा वीरभूमिं गत्वा तस्मै श्रद्धाञ्जलिम् अर्पितवन्तः। अस्मिन् अवसरे काँग्रेसदलस्य अनेकाः वरिष्ठनेतारः सांसदाः कार्यकर्तारश्च उपस्थिताः आसन्। प्रधानमन्त्री नरेन्द्रमोदी अपि सामाजिकमाध्यममञ्चे एक्स इत्यत्र अलिखत् यत् पूर्वप्रधानमन्त्रिणे श्रीराजीवगान्धी महोदयाय तस्य पुण्यतिथौ नमन्।

वीरभूमौ आयोजिते कार्यक्रमे सोनियागान्धी, राहुलगान्धी तथा प्रियङ्कागान्धी वाड्रा राजीवगान्धी महोदयस्य समाधौ पुष्पाणि अर्पितवन्तः तथा किञ्चित्कालं मौनं धारयित्वा तस्मै श्रद्धाञ्जलिम् अर्पितवन्तः। खर्गे महोदयः राजीवगान्धी महोदयं एकविंशतितमशताब्द्याः आधुनिकभारतस्य आधारशिलां स्थापयितारं दूरदर्शिनं नेतारं च अवदत्। तेन उक्तं यत् राजीवगान्धी महोदयः युवा-भारतस्य शक्तौ विश्वासं कृत्वा मतदानस्य आयुः एकविंशतिवर्षेभ्यः अष्टादशवर्षपर्यन्तं न्यूनीकृतवान्। ग्रामपञ्चायतानां अधिकारप्रदानेन लोकतन्त्रं ग्रामे ग्रामे सुदृढीकृतम् तथा दूरसञ्चारसूचनाप्रौद्योगिकी-कम्प्यूटरीकरणादिमाध्यमैः भारतं नवीनयुगस्य दिशि प्रेषितवान्।

राहुलगान्धी एक्स इत्यत्र स्वपित्रा सह एकां पुरातनां छायाचित्रं साझा कृत्वा अलिखत् यत् “पितः, भवता यः कुशलः समृद्धः सुदृढश्च भारतः स्वप्ने दृष्टः, तस्य साकारकरणस्य उत्तरदायित्वं अहं पूर्णतया निर्वहिष्यामि। भवतः शिक्षाः संस्काराः स्मृतयश्च सदा मया सह भविष्यन्ति।”

काँग्रेसस्य महासचिवः (सङ्गठनम्) केसी वेणुगोपाल अवदत् यत् राजीवगान्धी महोदयः स्वस्य लघुकार्यकाले एव भारतस्य परिवर्तनस्य दृढाम् आधारशिलाम् अस्थापयत्। महिलानां युवानां दरिद्राणां वञ्चितवर्गाणां च सशक्तीकरणाय तस्य नीतयः अद्यापि प्रभावं दर्शयन्ति। वेणुगोपाल महोदयः अवदत् यत् भारतस्य सार्वभौमत्वस्य अखण्डतायाश्च रक्षणं कुर्वन् राजीवगान्धी महोदयः स्वस्य सर्वोच्चं बलिदानम् अददात्, यत् राष्ट्रं कदापि न विस्मरिष्यति।

राजस्थानस्य पूर्वमुख्यमन्त्री अशोकगहलोत अवदत् यत् राजीवगान्धी महोदयः विज्ञानप्रौद्योगिक्योः क्षेत्रे महान् स्वप्नान् अपश्यत् तथा युवभ्यः अष्टादशवर्षीयायाम् अवस्थायां मतदानाधिकारं प्रदाय लोकतन्त्रे तेषां सहभागितां सुनिश्चितवान्। गहलोत महोदयः अवदत् यत् राजीवगान्धी महोदयस्य मतम् आसीत् यत् युवा-पीढी एव भारतस्य भविष्यत् अस्ति।

केरलस्य मुख्यमन्त्री वीडी सतीशन एक्स इत्यत्र अलिखत् यत् राजीवगान्धी महोदयः आधुनिकभारतस्य निर्माणे ऐतिहासिकीं भूमिकां निर्वहितवान्। तेन पञ्चायतीराजसुधाराः प्रवर्त्य लोकतन्त्रं सुदृढीकृतम् तथा राष्ट्रं एकविंशतितमशताब्द्याः चुनौतिभ्यः सज्जीकृतम्। तेन उक्तं यत् राजीवगान्धी महोदयस्य स्मृतयः विचाराश्च आगामिपीढीनां मार्गदर्शनं निरन्तरं करिष्यन्ति।

उल्लेखनीयं यत् राजीवगान्धी महोदयस्य एकविंशतितमे मे मासस्य १९९१ तमे वर्षे तमिलनाडुराज्यस्य श्रीपेरम्बदूर इति स्थले आत्मघातिविस्फोटे निधनम् अभवत्। सः १९८४ तः १९८९ पर्यन्तं भारतस्य प्रधानमन्त्री आसीत्। भारते सूचनाप्रौद्योगिकी-दूरसञ्चारक्रान्त्योः आधारं स्थापयितृषु नेतृषु तस्य गणना क्रियते। तस्य कार्यकाले कम्प्यूटरीकरणे दूरसञ्चारविस्तारे प्रशासनस्य आधुनिकीकरणे च अनेकानि महत्त्वपूर्णानि पदानि उपात्तानि।

---------------

Hindusthan Samachar / Dheeraj Maithani