संस्कारितसंततिनिर्माणाय को नैतिक शिक्षायां मंथनं, 300सम्मिलिताः शिक्षकाः

हरिद्वारम्, 21 मईमासः (हि.स.)।

गायत्रीतीर्थशान्तिकुञ्जे भारतीयसंस्कृतिज्ञानपरीक्षाविभागस्य नेतृत्वे गुरुवासरे द्विदिवसीयशिक्षकप्रशिक्षणशिविरस्य शुभारम्भः अभवत्। शिविरस्य उद्देश्यम् शिक्षकेभ्यः भारतीयसंस्कृतेः नैतिकमूल्यानां जीवनदृष्टेः च सम्बन्धं स्थापयित्वा भाविपीढ्याः चरित्रनिर्माणाय प्रेरणां दातुम् अस्ति। अस्मिन् शिविरे मध्यप्रदेशमहाराष्ट्रयोः त्रिशताधिकाः शिक्षकाः प्राचार्याः शिक्षाविदश्च सहभागित्वं कुर्वन्ति।

शिविरस्य प्रथमसत्रं सम्बोधयन् डॉ चिन्मयपण्ड्या उक्तवान् यत् अखिलविश्वगायत्रीपरिवारद्वारा सञ्चाल्यमानः देवसंस्कृतिदिग्विजयाभियानः भाविपीढीनिर्माणस्य एकं महत्त्वपूर्णं माध्यमम् अस्ति। तेन उक्तं यत् राष्ट्रनिर्माणस्य वास्तविकाधारशिला विद्यालयेषु स्थाप्यते तथा च शिक्षकाः अस्य निर्माणप्रक्रियायाः प्रमुखनिर्मातारः भवन्ति।

देवसंस्कृतिविश्वविद्यालयस्य प्रतिकुलपतिः डॉ चिन्मयपण्ड्या उक्तवान् यत् वर्तमानसमये केवलं शिक्षा उपाधिर्वा पर्याप्ता नास्ति, अपितु विद्यार्थिषु संस्कारसंवेदनशीलतासामाजिकउत्तरदायित्वानां विकासोऽपि समानेन महत्त्वेन आवश्यकः अस्ति। तेन उक्तं यत् यदि युवपीढ्यै अध्ययनसहितं नैतिकशिक्षापि दीयेत तर्हि एव समाजस्य वास्तविकः सन्तुलितश्च विकासः सम्भवः भविष्यति। तेन उक्तं यत् भारतीयसंस्कृतिज्ञानपरीक्षा बालकेषु नैतिकचेतनां सांस्कृतिकात्मगौरवं राष्ट्रियभावनां च विकसितुं प्रभावी अभियानम् अस्ति, यत् विद्यार्थिनः आदर्शनागरिकान् निर्मातुं दिशि महत्त्वपूर्णां भूमिकां निर्वहति।

भारतीयसंस्कृतिज्ञानपरीक्षायाः समन्वयकः अवदत् यत् शिविरे सहभागिनः शिक्षकाः स्वस्वक्षेत्रेषु गत्वा विद्यार्थिनां अभिभावकानां च मध्ये सांस्कृतिकजागरूकतायाः वातावरणं निर्मास्यन्ति। तेन उक्तं यत् शिविरस्य अवधौ भारतीयसंस्कृतिः पारिवारिकमूल्यानि आदर्शजीवनशैली विद्यार्थिनां व्यक्तित्वविकासश्च इत्यादिषु विषयेषु विशेषज्ञैः मार्गदर्शनं प्रदत्तम्। अस्मिन्नवसरे परमानन्दद्विवेदी प्रो प्रमोदभटनागर रामयशतिवारी इत्यादयः अनेके जनाः उपस्थिताः आसन्।

---------------

Hindusthan Samachar / Dheeraj Maithani