नवदिल्ली, २२ मे-मासः (हि.स.)। राष्ट्रिय-स्वयंसेवक-संघेन राष्ट्र-सेविका-समित्याः पूर्व-अखिल-भारतीय-सह-कार्यवाहिका रुक्मिणी-अक्कायाः निधनस्य विषये गहनः शोकः व्यक्तीकृतः। संघेन तस्याः परिवारस्य समितेः समस्त-भगिनीनां प्रति च गभीर-संवेदनाः प्रकटिताः तथा च ईश्वरात् तस्याः पुण्यात्मनः सद्गतिः प्रार्थिता।

संघस्य सरसंघचालकेन डॉ.मोहन-भागवतेन सरकार्यवाहेन दत्तात्रेय-होसबाले-महोदयेन च शुक्रवासरे संयुक्त-वक्तव्ये रुक्मिणी-अक्कायाः निधनस्य विषये शोकं व्यक्तीकुर्वद्भ्यां उक्तं यत् मातृसमा रुक्मिणी-अक्का अस्माकं भाव-जगति एकं शून्यं निर्मितवती। वृद्धावस्थायां शरीरस्य शान्तिः स्वाभाविकी एव, किन्तु दशकानां परिचयेन आत्मीय-सम्बन्धेन च मनसि असह्या वेदना अनुभूयते। रुक्मिण्याः ज्ञान-अनुभव-सम्पन्नं जीवनं व्यक्तित्वं च राष्ट्र-समर्पितस्य सार्थक-जीवनस्य प्रज्वलदुदाहरणम् अस्ति।

ताभ्यां उक्तं यत् राष्ट्र-सेविका-समित्या हिन्दू-समाजस्य संघटनस्य महिलानां संस्कार-प्रदानस्य च अस्मिन् उदात्त-कार्ये सा सदा सक्रियासीत्। तस्याः सहज-मातृवत् आत्मीयता निरन्तर-सक्रियता च सर्वान् प्रभावितवती। तस्याः निधनात् सेविकाः अन्ये च सर्वे मातृसमान-अभिभावकात् वञ्चिताः अभवन्। संघ-आदर्शस्य मेरु-सदृशस्य सूर्यनारायण-राव-परिवारस्य तस्य वंशस्य अन्तिम: क्रम: अपि अधुना नास्ति। रुक्मिणी-अक्का अधुना स्मृतिशेषा अभवत्।

अष्ट-नवतिवर्षीया (९८-वर्षीया) रुक्मिणी-अक्का गुरुवासरस्य रात्रौ बेङ्गलूरु-नगरे स्थिते स्व-निवासे दिवंगता। सा वृद्धावस्था-जनित-समस्याभिः पीडिता आसीत्।

Hindusthan Samachar / Divya Ranjan