नवदिल्ली, 22 मईमासः (हि.स.)।

निर्वाचनायोगेन जून-जुलाईमासयोः सेवानिवृत्तानां राज्यसभासदस्यानां चतुर्विंशतिस्थानानां कृते द्विवार्षिकनिर्वाचनस्य तथा महाराष्ट्र-तमिळनाडुराज्ययोः द्वयोः रिक्तस्थानयोः उपनिर्वाचनस्य आयोजनस्य घोषणा कृता अस्ति। सर्वासां स्थानानां कृते मतदानं जूनमासस्य अष्टादशतमे दिने भविष्यति तथा तस्मिन्नेव दिने परिणामाः अपि घोषिताः भविष्यन्ति।

निर्वाचनायोगस्य अनुसारं दशराज्यानां चतुर्विंशतिः राज्यसभास्थानानि द्विवार्षिकनिर्वाचनार्थं निर्धारितानि सन्ति। एतेषां स्थानानां वर्तमानसदस्यानां कार्यकालः जून-जुलाईमासयोः समाप्तिं गमिष्यति। एतदतिरिक्तं महाराष्ट्र-तमिळनाडुराज्याभ्यां राज्यसभायाः एकैकं स्थानं रिक्तं जातम् इति कारणेन उपनिर्वाचनमपि भविष्यति।

महाराष्ट्रस्य स्थानं सुनेत्रा अजित पवार इत्यस्याः षष्ठे मईदिने त्यागपत्रप्रदानात् तथा तमिळनाडोः स्थानं सी. वी. शनमुगम इत्यस्य सप्तमे मईदिने त्यागपत्रप्रदानात् रिक्तं जातम्। एतयोः स्थानयोः कार्यकालः क्रमशः चतुर्थः जुलाई २०२८ तथा नवविंशतितमः जून २०२८ पर्यन्तम् आसीत्।

आयोगस्य कार्यक्रमानुसारं निर्वाचनस्य अधिसूचना जूनमासस्य प्रथमे दिने प्रकाशितं भविष्यति। नामाङ्कनपत्रप्रस्तुतीकरणस्य अन्तिमा तिथिः अष्टमः जून निर्धारितः अस्ति, यदा नामाङ्कनपत्राणां परीक्षणं नवमे जूनदिने भविष्यति। अभ्यर्थिनः एकादशं जूनपर्यन्तं स्वनामानि प्रत्याहर्तुं शक्नुवन्ति। मतदानं अष्टादशे जूनदिने प्रातः नववादनात् सायं चतुर्वादनपर्यन्तं भविष्यति तथा तस्मिन्नेव दिने सायं पञ्चवादनात् मतगणना आरभ्यते। निर्वाचनप्रक्रिया विंशतितमे जूनदिने सम्पूर्णा भविष्यति।

निर्वाचनायोगस्य अनुसारं आन्ध्रप्रदेश-गुजरात-कर्नाटकराज्येषु चत्वारि-चत्वारि स्थानानि; मध्यप्रदेश-राजस्थानयोः त्रीणि-त्रीणि स्थानानि; झारखण्डे द्वे स्थानि तथा मणिपुर-अरुणाचलप्रदेश-मिजोरम-मेघालयेषु एकैकस्य स्थानस्य कृते मतदानं भविष्यति।

राज्यसभातः सेवानिवृत्तानां सदस्यानां नामानि एतानि सन्ति — आन्ध्रप्रदेशतः अयोध्या रामी रेड्डी अल्ला, नथवाणी परिमल, पिल्ली सुभाषचंद्र बोस तथा सना सतीश बाबू। गुजराततः रामभाई हरजीभाई मोकारिया, अमीन नरहरि हीराभाई, गोहिल शक्तिसिंहजी हरिचंद्रसिंहजी तथा रमिला बेचरभाई बारा। झारखण्डतः दीपक प्रकाश तथा शिबू सोरेन। मध्यप्रदेशतः दिग्विजय सिंह, जॉर्ज कुरियन तथा सुमेर सिंह सोलंकी। मणिपुरतः महाराजा सनाजाओबा लीशेम्बा। मेघालयतः वानवेइरॉय खार्लुखी। राजस्थानतः नीरज डांगी, राजेंद्र गेहलोत तथा रवनीत सिंह। अरुणाचलप्रदेशतः नबाम रेबिया। कर्नाटकतः मल्लिकार्जुन खरगे, एच. डी. देवगौड़ा, नारायण कोरगप्पा तथा इरन्ना कडाडी। मिजोरमतः के. वनलालवेना इत्यस्य कार्यकालः समाप्तिं गमिष्यति।

---------------

Hindusthan Samachar / Dheeraj Maithani