चेन्नई, 23 मईमासः (हि.स.)। तमिलनाडुराजनीतौ तस्मिन् समये नूतना चर्चा आरब्धा, यदा श्रीरंगमविधानसभाक्षेत्रस्य विधायकः रमेशः राज्य-मन्त्रिमण्डले हिन्दुधार्मिकधर्मार्थबन्दोबस्तीविभागस्य (एचआर एण्ड सीई) प्रभारं प्राप्तवान्। ब्राह्मणसमुदायसम्बद्धस्य रमेशस्य नियुक्तिविषये सामाजिकमाध्यमेषु, राजनीतिकवृत्तेषु तथा विभिन्नसामाजिकसङ्गठनेषु चर्चा तीव्रा अभवत्। अनेकैः प्रश्नः उत्थापितः यत् धार्मिकविषयैः सम्बद्धस्य अस्य महत्त्वपूर्णविभागस्य उत्तरदायित्वं तस्मै तस्य जातीयपृष्ठभूमेः कारणेन दत्तम् किम्।

विवादस्य वर्धनानन्तरं मन्त्री रमेशः अस्मिन् विषये स्वप्रतिक्रियां दत्त्वा उक्तवान् यत् तस्य नियुक्तिः जातीयदृष्ट्या न द्रष्टव्या। तेन स्पष्टतया उक्तं यत् तस्य दलस्य तमिलगवेट्रीकझगम् (टीवीके) इत्यस्मिन् कस्मैचित् व्यक्तये धर्म, जाति, भाषा, नस्ल अथवा सामाजिकपृष्ठभूमेः आधारेण उत्तरदायित्वं न दीयते, अपितु तस्य कार्यक्षमता, निष्ठा तथा जनसेवाभावः एव प्राथमिकतया स्वीक्रियते।

पत्रकारैः सह संवादसमये रमेशात् प्रत्यक्षतया पृष्टं यत् किं ब्राह्मणत्वस्य कारणेन तस्मै हिन्दुधार्मिकधर्मार्थबन्दोबस्तीविभागस्य मन्त्रिपदं दत्तम्। अस्य प्रश्नस्य उत्तरे तेन उक्तं यत् सः समाजसुधारकस्य पेरियार ई. वी. रामासामी इत्यस्य विचारधारां मानयति, येन जीवनपर्यन्तं जातिव्यवस्थायाḥ सामाजिकभेदभावस्य च विरोधे संघर्षः कृतः।

रमेशः उक्तवान्, “अहं पेरियार ई. वी. रामासामी इत्येनं स्वीयवैचारिकनेतारं मन्ये। तमिलगवेट्रीकझगम् इत्यत्र कस्मैचित् अपि जातिं दृष्ट्वा पदं न दीयते। अस्माकं दलस्य प्रथमा नीति धर्मनिरपेक्षता अस्ति।”

मन्त्रिणा उक्तं यत् सः एतेन विश्वासेन दलं सम्मिलितवान् यत् अत्र धर्म, जाति, नस्ल, धन, भाषा अथवा लिङ्गस्य आधारेण कस्यापि प्रकारस्य भेदभावः न क्रियते। तेन उक्तं यत् दलप्रमुखः विजयः तस्मै केवलं तेन कारणेन उत्तरदायित्वं दत्तवान् यतः तस्मिन् जनसेवायाः मानसिकता वर्तते। तेन उक्तं यत् कस्यचित् व्यक्तेः जातिः न, अपितु तस्य कार्यशैली समर्पणं च महत्त्वपूर्णं भवेत्।

तेन उक्तम्, “अस्माकं नेता विजयः कस्यापि प्रकारस्य भेदभावं न कृतवान्। तेन केवलम् एतत् दृष्टं यत् व्यक्तौ जनानां कृते कार्यकर्तुं भावना अस्ति वा न वा। जात्याधारेण चर्चा कर्तुं आवश्यकता नास्ति।”

रमेशः अग्रे उक्तवान् यत् जनतया केवलं कस्यचित् व्यक्तिविशेषस्य कृते न, अपितु विजयस्य नेतृत्वस्य तस्य विचारधारायाश्च समर्थनार्थं मतदानं कृतम्। अभिनेता-नेता-रूपेण प्रसिद्धस्य विजयस्य लोकप्रियतां निर्दिशन् तेन उक्तं यत् जनाः तम् जाति-धर्मयोः आधारेण न पश्यन्ति।

मन्त्री रमेशः उक्तवान्, “यदा विजयः पर्दे आगच्छति तदा जनाः तम् जाति-धर्मयोः आधारेण न पश्यन्ति, अपितु स्वपरिवारस्य सदस्यवत् पश्यन्ति। विजयेन चयनिताः अभ्यर्थिनः मन्त्रिणश्च जनैः तस्यैव भावनया दृश्यन्ते।”

तेन एतदपि उक्तं यत् दलनेतृत्वस्य मनसि कस्यापि प्रकारस्य विभाजनकारीविचारः नास्ति तथा च सङ्गठनं सामाजिकसमानता धर्मनिरपेक्षतायाश्च सिद्धान्तयोः आधारेण कार्यं करोति।

वास्तवतः रमेशाय हिन्दुधार्मिकधर्मार्थबन्दोबस्तीविभागस्य दायित्वं दत्ते सति सामाजिकमाध्यमेषु अस्य विषये मिश्रितप्रतिक्रियाः प्रकटिताः। केचन एतत् योग्यता प्रशासनिकक्षमतायाश्च आधारेण कृतनिर्णयः इति अवदन्, अपरैः तु तमिलनाडोः सामाजिकराजनीतिकपरम्पराणां सन्दर्भे प्रश्नचिह्नस्य अन्तर्गतं स्थापितम्।

राजनीतिविश्लेषकाणां मतम् अस्ति यत् तमिलनाडौ सामाजिकन्यायः, जातीयप्रतिनिधित्वं धर्मनिरपेक्षराजनीतिश्च दीर्घकालात् महत्त्वपूर्णविषयाः सन्ति। अतः हिन्दुधार्मिकधर्मार्थबन्दोबस्तीविभागवत् संवेदनशीलमन्त्रालयस्य विषये चर्चा विवादश्च स्वाभाविकः मन्यते।

वर्तमाने मन्त्री रमेशः स्पष्टतया उक्तवान् यत् तस्य नियुक्तिः जातीयदृष्टिकोणेन न द्रष्टव्या, अपितु जनसेवायै प्रदत्तं उत्तरदायित्वम् इति रूपेण अवगन्तव्या।-------------

Hindusthan Samachar / Dheeraj Maithani