Enter your Email Address to subscribe to our newsletters
बांसवाड़ा, २४ मे-मासः (हि.स.)। गोविन्द-गुरु-जनजातीय-विश्वविद्यालयस्य (जीजीटीयू) राणा-पूंजा-सभागारे रविवासरे ‘पण्डित-दीनदयाल-उपाध्याय-अध्ययन-पीठस्य’ शुभारम्भः कृतः। अस्मिन् कार्यक्रमे राजस्थान-विधानसभाध्यक्षः प्रो.वासुदेव-देवनानी मुख्यातिथिरूपेण उपस्थितः आसीत्, कार्यक्रमस्य अध्यक्षतां च विश्वविद्यालयस्य कुलगुरुः प्रो.केशवसिंह-ठाकुरः अकरोत्।
अस्मिन् अवसरे राज्यपालस्य उच्च-शिक्षा-सलाहकारः तथा जीजीटीयू-विश्वविद्यालयस्य पूर्व-कुलगुरुः प्रो.कैलाश-सोडाणी मुख्य-वक्तारूपेण स्वविचारान् प्रस्तुतवान्। कार्यक्रमे गढ़ी-विधायकः कैलाशचन्द्र-मीणा तथा सागवाड़ा-विधायकः शंकरलाल-डेचा विशिष्टातिथिरूपेण उपस्थितौ आस्ताम्।
समारोहं सम्बोधयन् विधानसभा-अध्यक्षः प्रो.वासुदेव-देवनानी उक्तवान् यत् विश्वविद्यालयेन स्थापितेयम् अध्ययन-पीठा भारतीय-ज्ञान-परम्परा, एकात्म-मानववादः, अन्त्योदयः, ग्राम-विकासः, सामाजिक-समरसता तथा भारतीय-जीवन-मूल्यानां आधारेण राष्ट्र-निर्माण-सम्बद्ध-विषयेषु उच्चस्तरीय-शोधस्य अकादमिक-गतिविधीनां च प्रमुख-केंद्रं भविष्यति।
तेन उक्तं यत् अध्ययन-पीठस्य अन्तर्गतं भविष्ये राष्ट्रीय-अन्ताराष्ट्रिय-स्तरस्य संगोष्ठ्यः, व्याख्यानमालाः, शोध-कार्यशालाः, युवा-संवादाः तथा सामाजिक-प्रशिक्षण-शिविराणि आयोजितानि भविष्यन्ति। विद्यार्थिनां कृते विशेष-प्रमाणपत्र-पाठ्यक्रमाः डिप्लोमा-पाठ्यक्रमाश्च आरभ्यन्ते।
अध्ययन-पीठस्य सञ्चालनार्थं प्रो.नरेन्द्र-पानेरी निदेशक-रूपेण तथा डॉ.राकेश-डामोर: समन्वयक-रूपेण नियुक्तौ स्तः। शोधार्थिनां विद्यार्थिनां च सुविधार्थं विश्वविद्यालय-परिसरे विशेष-पुस्तकालयः आधुनिक-डिजिटल-अभिलेखागारश्च विकसितः भविष्यति।
अस्मिन् डिजिटल-अभिलेखागारे पण्डित-दीनदयाल-उपाध्यायस्य मूल-साहित्यं, ऐतिहासिक-भाषणानि तथा महत्त्वपूर्ण-शोध-सामग्रीणां विस्तृतः संग्रहः उपलब्धः भविष्यति।
Hindusthan Samachar / Divya Ranjan