नवदेहली, २४ मे-मासः (हि.स.)। भारत-सर्वकारेण रविवासरे आफ्रिका-देशेषु द्रुतगत्या प्रसार्यमाणस्य इबोला-सार्वजनिक-स्वास्थ्य-आपत्कालस्य निवारणार्थं मानवीय-सहायतायाः भागरूपेण चिकित्सकीय-सामग्रीः सुरक्षात्मक-उपकरणानि च प्रथमवारं प्रेषितानि। आफ्रिका-रोग-नियन्त्रण-निवारण-केन्द्राय (आफ्रिका-सी.डी.सी.) एतत् साहाय्यं प्रेषितम् अस्ति।

विदेशमन्त्री एस.जयशङ्करः सामाजिक-माध्यम-मञ्चे ‘एक्स्’ इत्यत्र सूचनां प्रकटयन् अवदत् यत् उदयोन्मुखस्य इबोला-सार्वजनिक-स्वास्थ्य-आपत्कालस्य निवारणार्थं भारतम् आफ्रिका-देशैः सह दृढतया स्थितम् अस्ति। “इबोला-सङ्कटस्य प्रतिक्रियारूपेण आफ्रिका-देशानां समर्थनाय वयं पूर्णतया प्रतिबद्धाः स्मः” इति सः अवदत्।

भारतेन प्रेषितेषु साहाय्य-पत्रेषु आवश्यक-चिकित्सा-आपूर्तयः, सुरक्षात्मक-उपकरणानि, स्वास्थ्य-कर्मचारिणां कृते विशेष-सुरक्षा-उपकरणानि च सन्ति। एतेषां संसाधनानां उपयोगः सङ्क्रमण-नियन्त्रणाय, रोगिणां परिचर्यायै, प्रभावित-क्षेत्रेषु स्वास्थ्य-सेवकानां सुरक्षायै च भविष्यति।

आफ्रिका-देशस्य अनेकेषु भागेषु इबोला-सङ्क्रमणस्य प्रकरणानि वर्धमानानि सन्ति, अतः अन्ताराष्ट्रिय-सहयोगस्य संसाधनानां च आवश्यकता अनुभूयते। एतादृशे समये भारतस्य अयं उपक्रमः वैश्विक-ऐक्यस्य सहभागित्वस्य च महत्त्वपूर्णम् उदाहरणम् इति मन्यते।

विशेषज्ञाः मन्यन्ते यत् इबोला-सदृशस्य सङ्क्रामक-रोगस्य निवारणार्थं द्रुत-चिकित्सा-साहाय्यम्, रक्षात्मक-उपकरणानि, अन्ताराष्ट्रिय-सहकारः च अत्यावश्यकाः सन्ति। भारतं पूर्वम् अपि स्वास्थ्य-आपत्कालेषु विभिन्न-देशेभ्यः औषधानि, टीकाः, चिकित्सा-उपकरणानि च प्रदत्तवान्।

भारत-सर्वकारेण सूचितम् अस्ति यत् आगामि-दिनेषु आवश्यकाः अतिरिक्त-साहाय्य-सामग्रीः अपि प्रेषयितुं शक्यन्ते, येन प्रभावित-देशेषु स्वास्थ्य-सेवाः अधिक-सुदृढाः भवेयुः।

Hindusthan Samachar / Divya Ranjan