उज्जयिनीनगरम्, २६ मे-मासः (हि.स.)। मध्यप्रदेशस्य मुख्यमंत्री डॉ.मोहन-यादवः अद्य मंगलवार-दिने उज्जयिनीनगरे शिप्रा-तीर्थ-परिक्रमायां शिप्रा-नद्याः तटे आयोज्यमाने कार्यक्रमे सम्मिलिष्यति। सः सायं पञ्चवादने मातुः क्षिप्रायाः ३५१-हस्त-दीर्घां चुनरीं समर्पयित्वा परिक्रमायाः समापनं करिष्यति।

वस्तुतः उज्जयिनीनगरे सोमवासरे, २५ मे-मासे गङ्गा-दशहरा-पर्वणः पावन-अवसरे द्विदिवसीय-शिप्रा-तीर्थ-परिक्रमायाः आरम्भः अभवत्। अस्याः आरम्भः मुख्यमंत्री-डॉ.यादवस्य पुत्रेण वैभवेन मोक्षदायिन्याः मातुः शिप्रायाः रामघाटे विधि-विधानपूर्वकं पूजनं कृत्वा कृतः आसीत्।

मुख्यमंत्री डॉ.यादवः अद्य मातुः शिप्रायै ३५१-हस्त-दीर्घां चुनरीं अर्पयिष्यति। अस्मिन् अवसरे भारतीय-नौसेना-वाद्यदलस्य सङ्गीत-प्रस्तुतिः अपि भविष्यति।

भारतीय-जनता-पक्षस्य जनपद-पत्रकार-प्रभारी दिनेश-जातवा इत्यनेन उक्तं यत् क्षिप्रा-तीर्थ-परिक्रमा विगत-कतिपय-वर्षेभ्यः मुख्यमंत्री-डॉ.यादवस्य नेतृत्वे आयोज्यते। अस्याः यात्रायाः आरम्भः सः स्वयं २३-वर्षपूर्वं मातुः शिप्रायाः संरक्षणाय कृतवान् आसीत्। अस्मिन् वर्षे २५ मे-मासे यात्रा आरब्धा, या नगरस्य मार्गेषु परिभ्रम्य अद्य पुनः रामघट्टं प्रत्यागमिष्यति, यत्र समापनं भविष्यति तथा गङ्गा-दशहरा-उत्सवः आयोज्यते।

“जल-गङ्गा-संवर्धन-अभियानम्” इत्यस्य अन्तर्गतं इदं कार्यक्रमः शिप्रा-लोक-संस्कृति-समितेः, महाराजा-विक्रमादित्य-शोधपीठस्य, उज्जयिनी-विकास-प्राधिकरणस्य, रामघाट-तीर्थ-पुरोहित-समाजस्य तथा जनपद-प्रशासनस्य सहयोगेन आयोज्यते।

अस्मिन् अवसरे भक्ति-सङ्गीत-सांस्कृतिक-कार्यक्रमाः अपि भविष्यन्ति। कार्यक्रमस्य प्रमुखाकर्षणं प्रथमवारं भारतीय-नौसेना-वाद्यदलस्य प्रस्तुतिः भविष्यति। प्रसिद्ध-गायिका मैथिलीठाकुरः स्व-दल-सहितं भक्ति-सङ्गीतं प्रस्तोष्यति।

Hindusthan Samachar / Divya Ranjan