Enter your Email Address to subscribe to our newsletters
जयपुरनगरम्, २७ मे-मासः (हि.स.)। वारं वारं ज्वरः, शरीर-निर्बलता, रक्ताल्पता तथा हस्त-पादयोः दुर्बलता इत्यादीनि लक्षणानि सामान्यानि इव दृश्यन्ते, किन्तु दीर्घकालं यावत् स्थायिनः भवन्ति चेत् एते रक्त-कर्कटस्य (ब्लड-कैंसरस्य) सूचकाः अपि भवितुम् अर्हन्ति। भगवान् महावीर-कैंसर-चिकित्सालयस्य रक्त-कर्कट-तथा बीएमटी-विशेषज्ञः डॉ.प्रकाशसिंह-शेखावतः अवदत् यत् समये परिचयेन आधुनिक-चिकित्सया च रक्त-कर्कटं पूर्णतया पराजेतुं शक्यते तथा सामान्य-जीवनं यापनं कर्तुं शक्यते।
बाल-रक्त-तथा-कर्कट-रोग-विशेषज्ञा डॉ.शिवानी-माथुरः अवदत् यत् बालकेषु दृश्यमानानां विविध-प्रकाराणां रक्त-कर्कटानां प्रारम्भिक-अवस्थायां चिकित्सां कृत्वा तेषां पूर्ण-स्वास्थ्य-प्राप्तिः सम्भवति। उपचारानन्तरं बालकाः सामान्य-जीवनं यापयन्ति तथा क्रीडा-आदिषु क्रियासु सक्रियाः भवन्ति।
डॉ.शेखावतः अवदत् यत् सेल-थेरेपी तथा बोन-मज्जा-प्रत्यारोपणम् इत्येतौ रक्त-कर्कट-चिकित्सायां नूतन-आशारूपेण उद्भूतौ स्तः। एताभ्यां तकनीकाभ्यां ल्यूकेमिया, लिम्फोमा, मल्टिपल-मायलोमा, थैलेसीमिया तथा एप्लास्टिक-अनीमिया इत्यादीनां गम्भीर-रोगाणां उत्तम-परिणामाः लभ्यन्ते।
तेन उक्तं यत् अस्पताले जीवनदान-परियोजना तथा क्रोनिक-मायलोइड-ल्यूकेमिया-कैंसर-मुक्ति-योजना अन्तर्गतं रोगिणां निःशुल्क-चिकित्सा क्रियते। अगस्त-२०१४ तः मार्च-२०२६ पर्यन्तं जीवनदान-परियोजनायां ११.०३ कोटि-रूप्यक-व्ययेन १७६ बालकानां सफल-उपचारः कृतः, तथा योजनायां ३४० वयस्क-रोगिणः कैंसर-मुक्ताः कृताः।
डॉ.शिवानी-माथुरः उक्तवती यत् जागरूकतायाः अभावेन प्रायः रोगस्य निदानं विलम्बेन भवति। अतः यदि दीर्घकालं यावत् कश्चन असामान्य-लक्षणः न उपशाम्यति, तर्हि अवश्यं कर्कट-विशेषज्ञेन सह परामर्शः कर्तव्यः इति।
Hindusthan Samachar / Divya Ranjan