नवदेहली, २८ मे-मासः (हि.स.)। केन्द्रीय-गृहमन्त्री अमित-शाहः, रक्षा-मन्त्री राजनाथ-सिंहः इत्येतै: सह अनेके नेतारः स्वातन्त्र्यवीर-विनायक-दामोदर-सावरकरस्य जयन्त्यां तस्मै श्रद्धाञ्जलिम् अर्पयन्तः तस्य राष्ट्रप्रेम, त्यागं स्वतन्त्रता-सङ्ग्रामे योगदानं च स्मृतवन्तः। सर्वैः सावरकरस्य विचाराः संघर्षपूर्णं जीवनं च प्रेरणादायकम् इति उक्तम्।

अमित-शाहः सामाजिक-माध्यमे लिखितवान् यत् वीर-सावरकरः मातृभूमेः सेवायै स्वस्य सम्पूर्णं जीवनं समर्पितवान्। तस्य जीवनं लेखनी च राष्ट्रस्य विचारधारा: प्रति अटूट-समर्पणस्य शिक्षां ददाति। तेन सावरकरस्य तस्य कथनस्य उल्लेखः कृतः यस्मिन् उक्तम्— “हे मातृभूमे! त्वां विना जीवनं मृत्युतुल्यम् अस्ति।” अस्पृश्यता-नामिकायाः सामाजिक-कुरीतेः विरुद्धं सावरकरस्य संघर्षः सदा प्रेरणास्रोतः भविष्यति।

रक्षा-मन्त्री राजनाथ-सिंहः वीर-सावरकरं महान् स्वतन्त्रता-सेनानी, प्रखर-राष्ट्रवादी-विचारकः, ओजस्वी-वक्ता, कविः दार्शनिकश्च इति वर्णयन् उक्तवान् यत् तेन अनेकाः यातनाः सोढ्वा भारतस्य स्वतन्त्रतायै स्वस्य सर्वस्वं समर्पितम्। सावरकरस्य जीवनं त्यागस्य, संघर्षस्य निःस्वार्थ-राष्ट्रसेवायाश्च अमिटा गाथा अस्ति।

शिक्षा-मन्त्री धर्मेन्द्र-प्रधानः सावरकरं “मातृभारत्यै स्वस्य सर्वस्वं समर्पितवन्तं महान् क्रान्तिकारिणम्” इति वर्णयन् उक्तवान् यत् तेन अदम्य-साहसेन प्रखर-राष्ट्रवादी-चिन्तनेन च स्वतन्त्रता-सङ्ग्रामाय नूतना दिशा प्रदत्ता। सेल्युलर-कारागारस्य कठोर-यातनानाम् मध्ये अपि सावरकरस्य मनोबलम् अचलम् आसीत्।

कृषि-मन्त्री शिवराज-सिंह-चौहानः उक्तवान् यत् आङ्ग्ल-शासनस्य असंख्य-यातनाः कालापानी-दण्डश्च अपि वीर-सावरकरस्य राष्ट्रं स्वतन्त्रं कर्तुं सङ्कल्पं विचलितुं न शक्तवन्तः। सावरकरस्य जीवनम् अग्रिमवंशान् राष्ट्रसेवायै प्रेरयिष्यति।

भाजपा-अध्यक्षः नितिन-नवीनः उक्तवान् यत् स्वातन्त्र्य-चेतना, अदम्य-साहसः “राष्ट्रं सर्वोपरि” इति विचारश्च यस्य जीवनस्य आधारः आसीत्, तस्य वीर-सावरकरस्य जीवनं त्यागस्य तपसः राष्ट्र-समर्पणस्य च अद्वितीयम् उदाहरणम् अस्ति।

उत्तर-प्रदेशस्य मुख्यमन्त्री योगी-आदित्यनाथः वीर-सावरकरं राष्ट्रस्य स्वतन्त्रतायै कठोरतमाः अमानवीय-यातनाः सोढवन्तं महान् स्वतन्त्रता-सेनानी इति वर्णयन् उक्तवान् यत् तस्य संघर्षपूर्णं जीवनं देशवासिभ्यः साहसस्य राष्ट्रहिते समर्पणस्य च सन्देशं दास्यति।

मध्य-प्रदेशस्य मुख्यमन्त्री मोहन-यादवः उक्तवान् यत् वीर-सावरकरस्य नाम्नः स्मरणमात्रेण एव राष्ट्रभक्तेः, साहसस्य आत्मगौरवस्य च भावना जागरूका भवति। देहली-मुख्यमन्त्री रेखा-गुप्ता वीर-सावरकरं “राष्ट्रं प्रथमम्” इति सङ्कल्पस्य, सांस्कृतिक-गौरवस्य अखण्ड-भारतस्य चेतनायाश्च प्रतीकम् इति वर्णयन्ती उक्तवती यत् तस्य वैचारिक-दर्शनं प्रत्येकं राष्ट्रभक्तस्य कृते प्रेरणायाः अक्षयः स्रोतः भविष्यति।

उत्तराखण्डस्य मुख्यमन्त्री पुष्कर-सिंह-धामी उक्तवान् यत् सावरकरस्य राष्ट्रभक्त्या ओतप्रोतं जीवनं विचाराश्च सदा देशवासिनः राष्ट्रसेवायै प्रेरयिष्यन्ति।

उल्लेखनीयं यत् वीर-सावरकरस्य जन्म २८ मे-मासे १८८३ तमे वर्षे अभवत्। भारतस्य स्वतन्त्रता-आन्दोलनस्य महान् व्यक्तित्वरूपेण सः क्रान्तिकारी, कविः, लेखकः दूरदर्शी-समाज-सुधारकश्च इति प्रसिद्धः। वीर-सावरकरेण विंशतितम-शताब्द्याः प्रारम्भिक-काले ब्रिटिश-औपनिवेशिक-शासनस्य विरुद्धं प्रतिरोध-भावनायाः जागरणे महत्त्वपूर्णा भूमिका निर्वुढा। तेन स्वतन्त्रतायाः उद्देश्येन यूनां सङ्घटनाय प्रेरणायै च क्रान्तिकारी-सङ्घटनानां स्थापना कृता। तस्य जीवनं देशभक्तेः धैर्यस्य सुधारस्य च प्रेरणादायकम् उदाहरणं वर्तते।

Hindusthan Samachar / Divya Ranjan