लखनऊ, 29 मईमासः (हि.स.)।

भारतीयजनतापार्टीदलस्य नेता उत्तरप्रदेशस्य उपमुख्यमन्त्री च बृजेशपाठकः समाजवादीपार्टी-अध्यक्षस्य अखिलेशयादवस्य वक्तव्यस्य प्रत्युत्तरं दत्तवान्। बृजेशपाठकेन मन्त्री नरेन्द्रकश्यपेन सह संवादं कुर्वतः चलचित्रं सामाजिकमाध्यमेषु प्रकाशितम् आसीत्। ततः अनन्तरम् अखिलेशयादवः सामाजिकमाध्यमेषु अलिखत् — स्वास्थ्य-मन्त्रीरूपेण निरर्थकः सिद्धः, अधुना पत्रकारः अभवत्… यतः समयव्यतीतये किमपि कार्यं करणीयम्; शासनस्य, संगठनस्य, दलस्य च कार्येषु पूर्वमेव असफलः जातः।

अस्य उत्तररूपेण बृजेशपाठकः शुक्रवासरे स्वस्य सामाजिकमाध्यमलेखे अलिखत् —“ये युवराजाः भविष्यन्ति, ते श्रमजीविनः अप्रियाः मन्यन्ते। ये मिथ्याव्यापारिणः भविष्यन्ति, ते संवादं न रोचन्ते। एतत् बोधातीतम् अस्ति यत् केचन जनाः संवादात् सत्यात् च इत्थं भयभीताः किमर्थं भवन्ति? स्वास्थ्य-मन्त्रीरूपेण अहं यथाशक्ति लोकस्वास्थ्यं सुधारयामि तथा राजनैतिककार्यकर्तारूपेण संवादं सञ्चालयन् स्वकीयं लोककर्तव्यं निर्वहामि। यदि तेषां मनसि क्लेशः जायते तर्हि अहं किं करवानि….”

उपमुख्यमन्त्रिणा एकात्ममानववादस्य अन्त्योदयस्य च प्रणेता स्वर्गीयः पण्डितदीनदयालोपाध्यायः, तत्कालीनजनसंघाध्यक्षः स्वर्गीयः पीताम्बरदासः, भारतरत्नः शिक्षाविद् राष्ट्रऋषिः स्वर्गीयः नानाजीदेशमुखः तथा स्वतन्त्रतासङ्ग्रामसेनानी महान् विचारकः स्वर्गीयः डॉ० राममनोहरलोहिया — एतेषां संवादं कुर्वतां “ऐतिहासिकपल” इति चित्रमपि सामाजिकमाध्यमेषु प्रकाशितवान्।अग्रे बृजेशपाठकः अलिखत् यत्“पत्रकारः भवितुं गौरवस्य विषयः अस्ति। अहं तु लघुव्यक्तिः साधारणः सामाजिक-राजनैतिककार्यकर्ता च अस्मि, किन्तु अस्माकं गौरवशाली इतिहासः साक्षी अस्ति यत् यावन्तः महान् जननेतारः अभवन्, प्रायः सर्वे पत्रकाराः आसन्। पण्डितदीनदयालजी ‘राष्ट्रधर्म’ नाम मासिकपत्रिकां प्रकाशितवन्तः। लोहियाजी ‘जन’ नाम हिन्दीमासिकपत्रिकायाः तथा ‘मैनकाइंड’ नाम आङ्ग्लमासिकपत्रिकायाः सम्पादकः आसीत्। संवादः साक्षात्कारश्च अस्माकं सनातनपरम्परा अस्ति — ‘वादे वादे जायते तत्त्वबोधः’। लोकनायकजयप्रकाशः उक्तवान् आसीत् यत् तानाशाहाः एव संवादस्य विरोधिनः भवन्ति।

अस्माकं पत्रकारभ्रातरः भगिन्यश्च समाजस्य कर्मयोगिनः सन्ति। तान् ‘खलिहर’ इति वक्तुं सर्वेषां पत्रकाराणां श्रमजीविनां च अपमानः अस्ति। सार्थकसाक्षात्कारे कियत् मेधा परिश्रमश्च भवति, एतत् अस्माकं पत्रकारमित्रेभ्यः पृच्छन्तु।”

---------------

Hindusthan Samachar / Dheeraj Maithani