Enter your Email Address to subscribe to our newsletters
काठमाण्डूनगरम्, ३० मे-मासः (हि.स.)। नेपाल-सर्वकारेण जनकपुरधामं विवाह-पर्यटन-केन्द्ररूपेण (डेस्टिनेशन-वेडिङ्ग-हब्) विकसितुं घोषणा कृता।
नेपालस्य वित्तमन्त्री डॉ.स्वर्णिम-वाग्ले ऐतिहासिक-धार्मिक-पर्यटन-दृष्ट्या महत्त्वपूर्णां माता-सीतायाः जन्मभूमिं तथा मधेश-प्रदेशस्य राजधानीं जनकपुरधामं विवाह-पर्यटन-केन्द्रत्वेन विकसितुं घोषणाम् अकरोत्।
वित्तमन्त्री डॉ.वाग्ले शुक्रवासरे अग्रिमस्य आर्थिक-वर्षस्य २०८३/८४ कृते संसदि प्रस्तुतेन वित्तविवरणेन माध्यमेन एतां घोषणाम् अकरोत्।
तेन सूचितं यत् भारतीय-सीमातः जनकपुरधामपर्यन्तं सम्बद्धस्य राम-जानकी-पथस्य तथा राम-जानकी-परिक्रमा-मार्गस्य उन्नयनार्थं बजटे वित्तीय-प्रावधानं कृतम् अस्ति।
बजट-वक्तव्यस्य अनुसारं मधेश-प्रदेशस्य जीवनरेखा इति मन्यमानायाः हुलाकी-मार्गस्य तथा रेलमार्गस्य विकासाय, पूर्व-पश्चिम-राजमार्गस्य विस्ताराय मार्ग-स्तरोन्नयनाय च वित्तीय-व्यवस्था कृता अस्ति। तदतिरिक्तं पोषण-कार्यक्रमेषु, शिक्षा-स्वास्थ्य-क्रीडा-क्षेत्रेषु च अपि वित्तविवरणस्य आवण्टनं कृतम् अस्ति।
वित्तमन्त्रिणः डॉ.वाग्ले इत्यस्य एषा घोषणा मधेश-प्रदेशे सकारात्मक-रूपेण स्वीकृता अस्ति। जनकपुरधाम-उद्योग-वाणिज्य-संघस्य अध्यक्षः सुरेन्द्र-भण्डारी उक्तवान् यत् वर्तमान-सर्वकारस्य अस्य प्रयत्नस्य परिणामस्वरूपं जनकपुरधाम्नि पर्यटकानां सङ्ख्यायां उल्लेखनीया वृद्धिः भविष्यति।
सः विश्वासं व्यक्तवान् यत् एतेन स्थानीय-स्तरे रोजगारस्य नूतनाः अवसराः सृज्यन्ते तथा च क्षेत्रस्य अर्थव्यवस्थायाः अपि सुदृढता वर्धिष्यते।
Hindusthan Samachar / Divya Ranjan