Enter your Email Address to subscribe to our newsletters
अनूपपुरम्, ३१ मे-मासः (हि.स.)। मध्यप्रदेशस्य अनूपपुर-जनपदे स्थितायां प्रमुखायां धार्मिक-आध्यात्मिक-तीर्थनगर्यां अमरकण्टके रविवासरे अधिकमासीय-ज्येष्ठमासस्य शुक्लपक्षीय-पूर्णिमायाः अनुराधा-नक्षत्रयुक्तायाः पावनावसरे श्रद्धा-आस्था-भक्तीनां अद्भुतः संगमः दृष्टिगोचरः अभवत्। पतितपावन्याः माता-नर्मदायाः उद्गमक्षेत्रे सहस्रशः भक्ताः, श्रद्धालवः, तीर्थयात्रिणः तथा दर्शनार्थिनः समागताः, नर्मदानद्याः विविधेषु घाटेषु स्नानं कृत्वा पुण्यलाभम् अर्जितवन्तः।
प्रातःकालादेव माता-नर्मदायाः कोटितीर्थ-कुण्डे, रामघाटे, उत्तर-दक्षिण-तटयोः तथा आरण्डी-सङ्गम-तटे श्रद्धालूनां विशालः जनसमूहः समुपस्थितः। भक्ताः पवित्रे नर्मदाजले श्रद्धापूर्णां निमज्जनं कृत्वा स्नानम् अकुर्वन् तथा माता-नर्मदां स्मरन्तः स्वपरिवारस्य, समाजस्य, राष्ट्रस्य च सुख-समृद्धि-शान्ति-कल्याणानां कामनाम् अकुर्वन्। ततः परं श्रद्धालवः नर्मदा-उद्गम-मन्दिरं गतवन्तः, यत्र दीर्घासु पङ्क्तिषु स्थित्वा भजन-कीर्तन-जयघोषाणां मध्ये माता-नर्मदायाः दर्शनम् अलभन्त। श्रद्धालवः श्रद्धया विश्वासेन च मन्दिरे प्रणिपत्य स्वपरिवारस्य सुख-शान्ति-समृद्धि-ऐश्वर्य-उत्तमस्वास्थ्यस्य च मङ्गलकामनाम् अकुर्वन्। मन्दिर-परिसरः सम्पूर्णदिनं धार्मिकवातावरणेन गुञ्जायमानः आसीत्।
ज्येष्ठ-पूर्णिमायाः अवसरे नर्मदा-स्नान-दर्शन-पूजनयोः क्रमः प्रातः प्रायः पञ्चवादनतः आरब्धः, यः सायंकालपर्यन्तं निरन्तरं प्रचलितः आसीत्। नर्मदा-तटेषु, मन्दिर-परिसरे तथा प्रमुखेषु पर्यटन-स्थलेषु आदिवसं भक्तानां पर्यटकानां च भ्रमणम् अवर्तत। श्रद्धालूनां सुविधा-सुरक्षयोः कृते स्थानीय-प्रशासनेन मन्दिर-प्रबन्धनेन च आवश्यकाः व्यवस्थाः कृताः आसन्।
मौसम-दृष्ट्यापि अयं दिवसः विशेषः आसीत्। मध्याह्ने प्रायः द्वादशवादनपर्यन्तं नौतपस्य प्रभावः दृष्टः तथा तीव्रातपस्य कारणेन उष्णतायाः अनुभवः जातः। ततः परं नभसि कृष्णवर्णीयाः मेघाः समाच्छादितवन्तः तथा मध्ये-मध्ये लघुवृष्टिः अभवत्, येन वातावरणं मनोहरम् अभवत्। वर्षायाः उपस्थितावपि श्रद्धालूनाम् आस्थायां कापि न्यूनता न जाता तथा दर्शन-पूजनयोः क्रमः निरन्तरं प्रचलितः।
अस्यां पावनायां ज्येष्ठ-पूर्णिमायां अमरकण्टके श्रद्धा-भक्ति-आध्यात्मिक-ऊर्जायाः अद्भुतं वातावरणं दृष्टिगोचरम् अभवत्, यत्र माता-नर्मदायाः चरणयोः सहस्रशः श्रद्धालवः स्वाम् आस्थाम् अर्पयित्वा पुण्यलाभम् प्राप्तवन्तः।
Hindusthan Samachar / Divya Ranjan