कानपुरनगरम्, ३१ मे-मासः (हि.स.)। लोकमाता अहिल्याबाई-होल्करः भारतीय-संस्कृतेः, धर्मस्य, सुशासनस्य लोककल्याणस्य च अद्वितीया प्रतीका आसीत्। तस्याः जीवनं समाजसेवायाः, जनकल्याणस्य राष्ट्रसमर्पणस्य च अनुपमम् उदाहरणम् अस्ति। तस्याः आदर्शाः अद्यापि राष्ट्रनिर्माणाय प्रेरणां प्रददति। एतानि वचनानि रविवासरे भारतीय-जनता-पक्षस्य कानपुर-बुन्देलखण्ड-क्षेत्राध्यक्षः प्रकाश-पालः उक्तवान्।

भारतीय-जनता-पक्षस्य क्षेत्रीय-कार्यालये राजमातुः अहिल्याबाई-होल्कर-महाभागायाः जयन्त्याः उपलक्ष्ये आयोजिते कार्यक्रमे प्रकाश-पालः अवदत् यत् भारतीय-इतिहासे ‘पुण्यश्लोक’ इति उपाधिः अत्यन्तं सम्माननीया मन्यते। एषा उपाधिः राजा-नलाय, धर्मराज-युधिष्ठिराय, अहिल्याबाई-होल्कर-महाभागायै च प्रदत्ता, ये धर्मस्य, न्यायस्य लोककल्याणस्य च स्थापनायां महत्त्वपूर्णं योगदानम् अददुः। सः अवदत् यत् अहिल्याबाई-होल्कर-महाभागया देशस्य विभिन्नेषु भागेषु मन्दिराणां, घाटानां, धर्मशालानां, कूपानां, वापीनां जलाशयानां च निर्माणं कृत्वा समाजसेवायाः आदर्शः स्थापितः।

सः पुनः अवदत् यत् भारतस्य प्रधानमन्त्री नरेन्द्रमोदी अपि भारतस्य सांस्कृतिक-वैभवस्य सुदृढीकरणाय तथा देशस्य वैश्विक-पटलस्य उपरि गौरवपूर्णं स्थानं सुनिश्चितं कर्तुं निरन्तरं कार्यं करोति। तस्य नेतृत्वे भारतं स्वस्य सांस्कृतिक-परिचयं आध्यात्मिक-परम्परां च नवीनैः आयामैः समृद्धं करोति।

प्रकाश-पालः उक्तवान् यत् अहिल्याबाई-होल्कर-महाभागायाः जीवनात् प्रेरणां गृहीत्वा समाजसेवायै, राष्ट्रनिर्माणाय तथा सांस्कृतिक-मूल्यानां संरक्षणाय कार्यं करणीयम्। न्याय-व्यवस्थायां तस्याः निष्पक्ष-निर्णयानां उल्लेखं कुर्वन् सः अवदत् यत् तस्याः जीवनं न्यायस्य कर्तव्यनिष्ठायाश्च अद्वितीयम् उदाहरणम् आसीत्।

अस्मिन् कार्यक्रमे क्षेत्रीय-उपाध्यक्षा अनीता-गुप्ता, जिलाध्यक्षः शिवराम-सिंहः, अरुण-पालः, मोहित-सोनकरः, आलोक-शुक्लः, जिला-महामन्त्री गणेश-शुक्लः, अर्जुन-बेरिया, संजीव-बेरी, पवन-दीक्षितः, एल.बी.-पटेलः, तेज-बहादुरः, अर्शी-सुल्ताना, ऋषभ-शुक्लः, मनु-सिंहः तथा अन्ये कार्यकर्तारः राजमातुः अहिल्याबाई-होल्कर-महाभागायाः चित्रे पुष्पाञ्जलिं समर्प्य श्रद्धाञ्जलिम् अर्पितवन्तः तथा तया प्रदर्शिते मार्गे चलितुं संकल्पम् अकुर्वन्।

Hindusthan Samachar / Divya Ranjan