नवदिल्ली, 31 मईमासः (हि.स.)।

प्रधानमन्त्री नरेन्द्रमोदी रविवासरे स्वस्य मासिके रेडियोकार्यक्रमे ‘मनोवार्तायां भारतीयक्रीडकानां सिद्धीनां प्रशंसां कुर्वन् अवदत् यत् अद्यतनकाले झारखण्डस्य राँची-नगरे आयोजितायां नेशनल् सीनियर् एथलेटिक्स् फेडरेशन् प्रतियोगितायां क्रीडकैः उत्कृष्टं प्रदर्शनं कृतम् तथा च अनेकानि राष्ट्रीय-अभिलेखानि भग्नानि।

प्रधानमन्त्री ‘मनोवार्तायाः चतुस्त्रिंशदधिकशततमसंस्करणे अवदत् यत् अस्यां प्रतियोगितायां देशस्य विभिन्नप्रदेशेभ्यः प्रायः अष्टशतं क्रीडकाः सहभागित्वं कृतवन्तः। अस्मिन् काले चतसृषु विभिन्नासु स्पर्धासु राष्ट्रिय-अभिलेखाः भग्नाः। तेन गुरिन्दरवीर् सिंह्, विशाल् टीके, तेजस्विन् शङ्कर्, देव् मीणा तथा कुलदीप् कुमार् एतेषां सिद्धीनां कृते अभिनन्दनं प्रदत्तम्।

प्रधानमन्त्री विशेषरूपेण शतमीटरमितायाः धावनस्पर्धायाः उल्लेखं कुर्वन् अवदत् यत् अस्याः स्पर्धायाः विषये सम्पूर्णे देशे चर्चा प्रचलति। तेन उक्तं यत् केवलं द्वयोः दिवसयोः अन्तरे पुरुषवर्गस्य शतमीटर् धावनस्पर्धायां राष्ट्रिय-अभिलेखः त्रिवारं भग्नः। एषा सिद्धिः गुरिन्दरवीर् सिंह् तथा अनिमेष् कुजूर् इत्येताभ्यां प्राप्ता।

कार्यक्रमस्य समये प्रधानमन्त्री उभाभ्यां क्रीडकाभ्यां सह संवादमपि कृतवान्। तेन उक्तं यत् सङ्गीते युगलता दृश्यते स्म, किन्तु अधुना क्रीडाक्षेत्रेऽपि परिस्थितियुगलता दृश्यते, यत्र एकः क्रीडकः अभिलेखं निर्माति तथा अपरः तमतिक्रामति। तेन उभयोः क्रीडकयोः परिश्रमस्य प्रदर्शनस्य च प्रशंसा कृता।

प्रधानमन्त्री कार्यक्रमे जम्मू-कश्मीरस्य उधमपुरस्य पारम्परिकायाः ‘कलारी चीज्’ इत्यस्यापि उल्लेखं कृतवान्। तेन उक्तं यत् एषा भारतस्य सांस्कृतिक-खाद्यविरासतायाः महत्त्वपूर्णः अंशः अस्ति। प्रधानमन्त्री ब्राजील्-देशे आयोजितायाम् अन्ताराष्ट्रिय-चीज्-प्रतियोगितायां कलारी-चीज् इत्यस्य प्राप्तां वैश्विकमान्यतां सफलतां च प्रशंसितवान्।

तेन उक्तं यत् ‘मनोवार्ताकार्यक्रमे कलारी-चीज् इत्यस्य उल्लेखानन्तरं अस्याः लोकप्रियतायां विक्रयेषु च उल्लेखनीया वृद्धिः अभवत्। प्रधानमन्त्री एतत् स्थानीय-उत्पादानां वैश्विक-परिचयं प्रदातुं उत्तमम् उदाहरणम् इति उक्तवान्।

---------------

Hindusthan Samachar / Dheeraj Maithani