नवदेहली, ३१ मे-मासः (हि.स.)। केन्द्रीय-आवास-नगरीय-विकास-मन्त्री मनोहर-लालः पीएम-स्ट्रीट-वेंडर्स-आत्मनिर्भर-निधि (पीएम-स्वनिधि) योजनायाः षड्वर्ष-पूर्णतायाः अवसरे उक्तवान् यत् अस्याः योजनायाः अन्तर्गतं गत-षट्सु वर्षेषु देशव्यापी ७५.५ लक्षाधिकाः पथ-विक्रेतारः लाभान्विताः अभवन्। एषा योजना लक्षशः जनान् औपचारिक-धनागार-व्यवस्थया सह संयोज्य तेषाम् आजीविकां सुदृढीकर्तुं महत्त्वपूर्णां भूमिकां निर्वहति।

योजनायाः षड्वर्ष-पूर्णतायाः उपलक्ष्ये रविवासरे अगरतला-नगरे आयोजिते कार्यक्रमे मनोहर-लालः त्रिपुरा-राज्यस्य मुख्यमन्त्रिणः माणिक-साहस्य उपस्थितौ अरुणाचल-प्रदेश-असम-मणिपुर-मिजोरम-त्रिपुरा-राज्यानां लाभार्थिभिः सह संवादम् अकरोत्। अस्मिन् अवसरे त्रिपुरा-राज्यस्य पथ-विक्रेतृभ्यः ऋण-स्वीकृति-पत्राणि ऋण-पत्रिकाश्च (क्रेडिट्-कार्ड्) वितरितानि।

मनोहर-लालः अवदत् यत् प्रधानमन्त्रिणा नरेन्द्रमोदिना वर्षे २०२० तमे नगरीय-दरिद्रजनानाम् आर्थिक-सशक्तीकरणाय तेषाम् आजीविकाया: सुदृढीकरणाय च पीएम-स्वनिधि-योजना प्रारब्धा। तेन उक्तं यत् अस्याः योजनायाः उद्देश्यं केवलं प्रतिभूति-विहीन-ऋणस्य उपलब्धता नास्ति, अपितु पथ-विक्रेतेभ्यः सम्मानं, आत्मविश्वासं आर्थिक-सुरक्षां च प्रदातुम् अपि अस्ति।

सः अवदत् यत् योजनायाः अन्तर्गतं अधुना यावत् १.१२ कोट्यधिकानि प्रतिभूति-विहीन-ऋणानि स्वीकृतानि सन्ति, तथा च १७,८०० कोटि-रूप्यकेभ्यः अधिका धनराशिः लाभार्थिभ्यः वितरिता अस्ति। पूर्वोत्तर-क्षेत्रे २.५९ लक्षाधिकानि ऋणानि वितरितानि, येषां माध्यमेन ४३० कोटि-रूप्यकेभ्यः अधिका वित्तीय-सहायता प्रदत्ता अस्ति।

तेन उक्तं यत् त्रिपुरा-राज्ये अधुना यावत् ९,३०० अधिकानि ऋणानि स्वीकृतानि सन्ति तथा च प्रायः १५ कोटि-रूप्यकाणां धनराशिः लाभार्थिभ्यः वितरिता अस्ति।

आवास-नगरीय-विकास-मन्त्रालयस्य अनुसारम् अस्याः योजनायाः प्रभावः व्यापकः अभवत्। योजनायाः अन्तर्गतं ३४.८१ लक्षाः महिला-पथ-विक्रेत्र्यः सशक्तीकृताः सन्ति तथा च महिलाभ्यः ५१.८४ लक्षाणि ऋणानि वितरितानि। एतदतिरिक्तं ५५ लक्षाधिकाः विक्रेतारः डिजिटल्-प्रणाल्या सह संयोजिताः सन्ति।

मन्त्रालयेन उक्तं यत् योजनायाः लाभार्थिनां औसत-आयः प्रतिवर्षं प्रायः २० प्रतिशतं वर्धिता अभिलेखिता अस्ति। अपरं च ३० प्रतिशताधिकाः लाभार्थिनः योजनया प्राप्तेन ऋणेन स्वव्यवसायं विस्तीर्य अन्यस्रोतसेभ्यः अपि ऋणं प्राप्तवन्तः।

उल्लेखनीयम् अस्ति यत् जूनमासे २०२० तमे वर्षे प्रारब्धायाः पीएम-स्वनिधि-योजनायाः अन्तर्गतं अधुना यावत् १.०५ कोट्यधिकानि ऋणानि स्वीकृतानि सन्ति। तथैव ‘स्वनिधि-से-समृद्धि’ इति प्रयत्नस्य अन्तर्गतं ५० लक्षाधिकानां पथ-विक्रेता-परिवाराणां सामाजिक-आर्थिक-प्रोफाइलिङ्ग कृतम् अस्ति तथा च विभिन्न-केन्द्रीय-कल्याणकारी-योजनानाम् अन्तर्गतं १.५२ कोट्यधिकाः लाभाः स्वीकृताः सन्ति।

Hindusthan Samachar / Divya Ranjan