औरैयाजनपद:, ३१ मे-मासः (हि.स.)। उत्तरप्रदेशस्य औरैया-जनपदस्य सदर-विकासखण्डक्षेत्रस्य असेवा-ग्रामे आयोजितायाः श्रीमद्भागवत-कथायाः समापन-समारोहानन्तरं शनिवासरस्य रात्रौ भव्य-रामलीलायाः मञ्चनम् अभवत्। रामलीलायां प्रस्तुतः राम-केवट-संवादः उपस्थितान् श्रद्धालून् भावविह्वरान् अकरोत्। रात्रौ विलम्बपर्यन्तं प्रवृत्ते अस्मिन् धार्मिक-कार्यक्रमे बहुसंख्यकाः ग्रामवासिनः श्रद्धालवश्च सहभागित्वं कृत्वा भगवत: श्रीरामस्य आदर्शानां श्रवणं दर्शनं च अकुर्वन्।

रामलीला-मञ्चने कलाकारैः भगवत: श्रीरामस्य, माता-सीतायाः तथा लक्ष्मणस्य वनगमन-प्रसङ्गस्य सजीवं प्रस्तुतीकरणं कृतम्। कथानुसारम् अयोध्यातः वनवासार्थं निर्गताः भगवान् श्रीरामः, माता सीता तथा भ्राता लक्ष्मणः गङ्गातटम् उपागच्छन् तथा गङ्गा-नदीं पारयितुं केवटं प्रार्थितवन्तः। अस्मिन् समये राम-केवटयोः मध्ये जातः संवादः अत्यन्तं मार्मिकः भक्तिभावेन च परिपूर्णः आसीत्। केवटेन प्रभोः चरण-प्रक्षालनस्य कृता विनयपूर्णा प्रार्थना तथा तस्याः पृष्ठे निहिता श्रद्धा-समर्पण-भावना च कलाकारैः प्रभावशालिन्या रीत्या प्रस्तुता।

रामलीलायाः एतं प्रसङ्गं दृष्ट्वा श्रद्धालवः भक्तिरसेन निमग्ना: अभवन्। अनेके दर्शकाः भगवन्तं श्रीरामं प्रति केवटस्य निःस्वार्थ-भक्तेः सेवा-भावस्य च प्रशंसां कुर्वन्तः दृष्टाः। मञ्चनकाले कलाकाराणाम् अभिनयः, संवाद-प्रस्तुतिः तथा धार्मिक-वातावरणं सम्पूर्णम् आयोजनं भक्तिमयं चकार।

आयोजकैः उक्तं यत् श्रीमद्भागवत-कथा-समापनावसरे धार्मिक-सांस्कृतिक-कार्यक्रमाणां श्रृङ्खलायाः अन्तर्गतं रामलीलायाः आयोजनं कृतम्। अस्य उद्देश्यं नूतन-वंशं भारतीय-संस्कृतेः, मर्यादा-पुरुषोत्तमस्य भगवत: श्रीरामस्य आदर्शानाम् तथा सनातन-धर्मस्य महद्भ्य: परम्पराभ्यः परिचितां कर्तुम् अस्ति।

कार्यक्रमस्य अन्ते श्रद्धालवः भगवत: श्रीरामस्य, माता-सीतायाः तथा लक्ष्मणस्य आरात्रिकायां सहभागित्वं कृत्वा सुख-समृद्धेः क्षेत्रस्य च कल्याणस्य कामनाम् अकुर्वन्। आयोजनस्य सफलतायां ग्रामवासिनां, कथा-समितेः तथा रामलीला-मण्डल्याः सदस्यानां विशेषं योगदानम् आसीत्। सम्पूर्णे ग्रामे धार्मिक-उल्लासस्य श्रद्धायाश्च वातावरणं व्याप्तम् आसीत्।

Hindusthan Samachar / Divya Ranjan