वाराणसी,31 मईमासः (हि.स.)। लोकमातुः अहिल्याबाई होलकरस्याः त्रिशतैकाधिकतमजन्मजयन्त्याः अवसरे रविवासरे गुरुधामस्थिते पुरातत्त्वविभागपरिसरे स्थापितायाः प्रतिमास्थले माल्यार्पणार्थं निर्गच्छन्तः काङ्ग्रेसकार्यकर्तारः पुलिसप्रशासनेन तलीयक्षेत्रे एव निरुद्धाः। प्रशासनस्य अस्याः क्रियायाः विरोधे काङ्ग्रेसनेतारः कार्यकर्तारश्च मार्गे एव लोकमातरं श्रद्धाञ्जलिम् अर्पयित्वा स्वक्रोधम् अभिव्यक्तवन्तः।

पूर्वनिर्धारितकार्यक्रमानुसारं काङ्ग्रेसकार्यकर्तारः मैदागिनस्थितात् राजीवभवनात् (काङ्ग्रेसकार्यालयात्) रविन्द्रपुरीगुरुधामस्थितं पुरातत्त्वविभागपरिसरं प्रति लोकमातुः अहिल्याबाई होलकरस्याः प्रतिमायाः माल्यार्पणाय पूजनार्चनाय च प्रस्थिताः आसन्। किन्तु कार्यकर्तृणां निर्गमनात् पूर्वमेव पुलिसप्रशासनेन काङ्ग्रेसकार्यालयस्य परितः विशालः पुलिसबलं नियुक्तम्, अवरोधकान्कृत्वा तेषां गमनं निरुद्धम्। अस्मिन् समये काङ्ग्रेसनेतारः आरोपितवन्तः यत् तेषां कार्यक्रमः पूर्णतया शान्तिपूर्णः श्रद्धापूर्णश्च आसीत्, तथापि प्रशासनं तान् प्रतिमास्थलं प्रति गन्तुं अनुमतिं न दत्तवान्।

पुलिसप्रशासनेन निरुद्धानन्तरं कार्यकर्तारः मार्गे एव लोकमातरं श्रद्धाञ्जलिम् अर्पितवन्तः। माल्यार्पणाय पूजनाय च आनीतानि मालाः, पुष्पाणि, अन्यानि पूजनसामग्रीणि च काङ्ग्रेसजनाः एसीपी कोतवाली अधिकारिणे समर्प्य प्रशासनस्य प्रतिनिधिना प्रतिमास्थले पूजनार्चनां कारयितुम् आग्रहं कृतवन्तः।

महानगरकाङ्ग्रेसाध्यक्षः राघवेन्द्र चौबे उक्तवान् यत् काङ्ग्रेसस्य उद्देश्यं केवलं लोकमातुः प्रतिमायां माल्यार्पणं कृत्वा तस्याः श्रद्धाञ्जलिं दातुमेव आसीत्, किन्तु प्रशासनं लोकतान्त्रिकं शान्तिपूर्णं च कार्यक्रमं निरुद्धवान्। तेन उक्तं यत् अहिल्याबाई होलकरया काश्याः सांस्कृतिकधार्मिकविरासत्संरक्षणे ऐतिहासिकं योगदानं कृतम् आसीत् तथा च तस्याः सम्मानः प्रत्येकस्य काशीवासिनः दायित्वम् अस्ति।

उल्लेखनीयं यत् मणिकर्णिकाघाटस्य सौन्दर्यीकरणकार्यस्य समये लोकमातुः अहिल्याबाई होलकरस्याः प्रतिमा ततः अपसार्य पुरातत्त्वविभागपरिसरे सुरक्षितरूपेण स्थापिता अस्ति।

अस्मात् पूर्वं राजीवभवने आयोजितायां श्रद्धाञ्जलिसभायां विचारगोष्ठ्यां च काङ्ग्रेसपदाधिकारीणः कार्यकर्तारश्च लोकमातुः अहिल्याबाई होलकरस्याः चित्रे पुष्पाञ्जलिम् अर्पितवन्तः। वक्तारः तस्याः न्यायप्रियशासनं, लोककल्याणकारीकार्याणि, भारतीयसंस्कृतेः धार्मिकधरोहरसंरक्षणे च प्रदत्तं योगदानं स्मृतवन्तः। काशीविश्वनाथमन्दिरस्य पुनर्निर्माणे, विभिन्नेषु घाटेषु, मन्दिरेषु, धर्मशालासु तथा जनोपयोगिनिर्माणकार्येषु तस्याः भूमिकायाः विषये अपि विस्तरेण चर्चा अभवत्।

कार्यक्रमे प्रवीणप्रकाशः, सतनामसिंहः, सुनीलश्रीवास्तवः, राजूरामः, गिरीशपाण्डेयः, वकीलअंसारी, चञ्चलशर्मा, अशोकसिंहः, सन्तोषचौरसिया, हसनमेहदीकब्बन, राजेशत्रिपाठी, अखिलेशपाण्डेयः, आशीषकेशरी, राजेशप्रजापति, मिथुनसर्वकारः, अफसरखानः, सुशीलपाण्डेयः, आशुतोषः तथा मोहम्मदउज्जैरः सहिताः बहुसंख्याकाः काङ्ग्रेसकार्यकर्तारः उपस्थिताः आसन्।

-----------

Hindusthan Samachar / Dheeraj Maithani