कोलकातानगरम्, ३१ मे-मासः (हि.स.)। “सनातनं चेत् भारतम् अस्ति, भारतं चेत् सनातनम् अस्ति। सनातनस्य अर्थः केवलं केषाञ्चन कृते न, अपितु सर्वेषां कृते अस्ति। वयं स्व-स्व-रीत्या व्यक्तिगत-देवभक्तिं कुर्मः, किन्तु अधुना कालः आगतः यत् ‘देशभक्तिं’ सर्वे मिलित्वा आचराम। सनातनः वदति—‘जीवत तथा अन्येभ्यः जीवनं दत्त’। अयं कालः न संघर्षस्य न च विनाशस्य, अपितु सहजीवनस्य अस्ति। अद्य मानवतायाः महाभारतस्य न, अपितु महत: भारतस्य आवश्यकता अस्ति। भारतं केवलं भूमेः खण्डः नास्ति, अपितु शान्तेः भूमिः अस्ति” इति उक्तवान्।

एतानि वचनानि दिव्याङ्ग-मुक्त-भारत-अभियानस्य सूत्रधारः तथा परमार्थ निकेतन-संस्थायाः संस्थापकाध्यक्षः स्वामी चिदानन्द सरस्वती शनिवासरे श्री बड़ाबाज़ार कुमारसभा पुस्तकालय-द्वारा राष्ट्रीयपुस्तकालयस्य सभागार-मध्ये आयोजिते चत्वारिंशत्तमे विवेकानन्द-सेवा-सम्मान-समारोहे सम्मानं प्राप्य उक्तवान्। अस्मिन् समारोहे तस्मै सम्मानस्वरूपं एकलक्ष-रूप्यकाणां राशिः तथा मानपत्रं प्रदत्तम्।

समारोहस्य प्रधानातिथिः दिलीपघोष: अवदत् यत् ऋषीणां विदुषां च भूमौ पश्चिमबङ्गे अद्य यत् परिवर्तनं दृश्यते, सः हिन्दूनाम् एकतायाः परिणामः अस्ति। “हिन्दुः जागरिष्यति चेत् राष्ट्रम् अपि जागरिष्यति; हिन्दूनाम् ऐक्ये सति किमपि असम्भवं नास्ति” इति सः उक्तवान्। सः अपि अवदत् यत् स्वामी विवेकानन्द मानवसेवायाः महत्त्वं वैश्विकमञ्चे प्रतिष्ठापितवान्, तथा च स्वामी-चिदानन्दस्य मानवसेवा तस्यैव सेवाभावस्य महान् सम्बन्ध: अस्ति।

विशिष्टातिथिः प्रख्यातः आयकर-परामर्शदाता सज्जनकुमार: तुलस्यान स्वामी-विवेकानन्दस्य चिन्तनम् आदर्शान् च अनुसर्तुं प्रेरितवान् तथा कुमारसभायाः प्रयासानां भूरिश: प्रशंसां कृतवान्। समारोहस्य अध्यक्षः सुप्रसिद्धः उद्योगपति: राधेश्यामगोयनका स्वामी-चिदानन्दस्य सेवाकार्याणि प्रशंसितवान्।

कार्यक्रमस्य सञ्चालनं पुस्तकालयस्य साहित्य-मन्त्रिणी डॉ.तारादूगड़: अकरोत्, यदा च कुमारसभायाः अध्यक्षः महावीरबजाज: स्वागतभाषणम् अददात्। उपमन्त्री सत्यप्रकाशराय: कल्याणमन्त्रस्य पाठं कृतवान्। प्रारम्भे मीता गाड़ोदिया स्वामी-विषयकं “ओ वरेण्य योद्धा संन्यासी” इति गीतम् प्रस्तुतवती।

अजयेन्द्रनाथ: त्रिवेदी-महाभागस्य वैदिक-मन्त्रपाठेन सह खुशबूबजाज: तथा शरण्यादूगड़: तिलकं कृतवन्त्यौ। ततः सज्जनकुमार-तुलस्यानः, भागीरथचांडक:, बंशीधर: शर्मा, राधेश्याम-गोयनका तथा दिलीप-घोषः मालया, प्रावारेण, श्रीफलेन, धनादेशेन मानपत्रेण च पूज्यं स्वामी-चिदानन्द-सरस्वती-महाभागं विधिवत् सम्मानितवन्तः।

विनोद: बागड़ोदिया, महावीरप्रसादरावत:, राकेशकुमारपाण्डेय: तथा नन्दकुमार: लढ़ा अतिथीनां माल्यार्पणेन स्वागतं कृतवन्तः।

समारोहे प्रह्लादराय: अग्रवाल:, कुंजबिहारी अग्रवाल:, बनवारीलाल: सोती, सांवरमल: अग्रवाल:, अशोक: मोदी, जेएस: मेहता, विजय: चोरड़िया, अजयप्रतापसिंह:, मुरारीलालदीवान: इत्यादयः कोलकाता-हावड़ा-नगरयोः सामाजिक-सांस्कृतिक-क्षेत्रयोः बहवः गणमान्याः जनाः उपस्थिताः आसन्।

Hindusthan Samachar / Divya Ranjan