राजगढनगरम्, ३१ मे-मासः (हि.स.)। मध्यप्रदेशस्य राजगढ-जनपदस्य ब्यावरा-विधानसभा-क्षेत्रान्तर्गतस्य बरखेडा-ग्रामे रविवासरे प्रदेशस्य मत्स्य-कल्याण-मत्स्य-विकास-विभागस्य राज्यमन्त्री नारायणसिंह-पंवारः प्रायः १.५१ कोटि-रूप्यक-व्ययेन निर्मितयोः द्वयोः सीसी-मार्गयोः लोकार्पणं कृतवान्। अस्मिन् अवसरे सः अवदत् यत् प्रदेश-सर्वकारः ग्रामेषु आधारभूत-सुविधानां विस्ताराय निरन्तरं कार्यं करोति तथा विकासस्य लाभः अन्तिम-पङ्क्तौ स्थितस्य जनस्य समीपमपि प्राप्नुयात् इति तस्य प्राथमिकता अस्ति।

लोकार्पण-कार्यक्रमं सम्बोधयन् मन्त्री पंवारः उक्तवान् यत् मुख्यमन्त्रिणः मोहनयादवस्य नेतृत्वे प्रदेशे मार्ग-शिक्षा-स्वास्थ्य-सिञ्चन-पेयजल-क्षेत्रेषु तीव्रगतिना विकास-कार्याणि क्रियन्ते। एतेन ग्रामीण-क्षेत्रेषु सुविधाः वर्धन्ते तथा जनानां जीवनस्तरः अधिकः उन्नतः भवति। सः जलसंरक्षणस्य विषये विशेषं बलम् अददात् तथा अवदत् यत् वर्धमान-तापमानस्य परिवर्तमान-जलवायु-परिदृश्यस्य च दृष्ट्या जलस्य संरक्षणं कालस्य आवश्यकता वर्तते। वर्षाजल-सञ्चयनम्, तडागानां कूपानां च संरक्षणम्, जलस्य विवेकपूर्णः उपयोगश्च जनान्दोलनरूपेण विकसितव्यः, येन अग्रिम-वंशानां कृते जल-सुरक्षा सुनिश्चिता भवेत्।

कार्यक्रमात् पूर्वं मन्त्री पंवारः बरखेडा-ग्रामस्य मतदान-केन्द्र-संख्या-१०२ इत्यत्र कार्यकर्तृभिः ग्रामीणैः च सह प्रधानमन्त्रिणः नरेन्द्र-मोदिन: ‘मन की बात’ नामकस्य रेडियो-कार्यक्रमस्य श्रवणं कृतवान्। सः अवदत् यत् अयं कार्यक्रमः देशवासिनः संयोजयन् प्रभावी राष्ट्रिय-संवादः अस्ति, यः समाजस्य प्रेरणादायक-व्यक्तित्वानां सकारात्मक-प्रयत्नानां च नूतनां परिचयं प्रददाति। मन्त्रिणा उक्तं यत् प्रधानमन्त्रिणा स्वीय-सम्बोधने भीषण-ग्रीष्मस्य दृष्ट्या नागरिकेभ्यः स्वास्थ्यस्य विषये सजगाः भवितुम्, पर्याप्तं जलं पातुम्, लू-प्रभावात् रक्षणोपायान् च अवलम्बितुम् आह्वानं कृतम्। सः ग्रामीणानपि ग्रीष्म-प्रभावात् रक्षणार्थं जागरूकाः भवितुम् आग्रहं कृतवान्।

अस्मिन् कार्यक्रमे पूर्वमन्त्री बद्रीलाल-यादवः, राजगढ-विधायकः अमरसिंह-यादवः, दिलवर-यादवः, जसवन्त-गुर्जरः, अमित-शर्मा, पवन-कुशवाहः, मण्डलाध्यक्षः राजू-यादवः, महामन्त्री दीपक-सामरे तथा अन्ये जनप्रतिनिधयः, भारतीय-जनता-पक्षस्य पदाधिकारिणः, कार्यकर्तारः बहुसंख्यकाः ग्रामीणाश्च उपस्थिताः आसन्।

Hindusthan Samachar / Divya Ranjan