चेन्नई-नगरम्, ०४ मे-मासः (हि.स.)। तमिलनाडु-राज्यस्य विधानसभानिर्वाचनस्य २३४ आसनानां कृते मतगणना अद्य प्रातः अष्टवादने आरब्धा। अस्य कृते समग्रे राज्ये ६२ मतगणना-केन्द्राणि स्थापितानि सन्ति। जनानां निर्णयः कस्य पक्षे भविष्यति इति सर्वे प्रतीक्षन्ते। प्रश्नः अस्ति— किम् डीएमके पुनः सत्तां धृत्वा इतिहासं रचयिष्यति, उत एआईएडीएमके-भाजपा-गठबन्धनं पुनः सत्तां प्राप्स्यति, अथवा तमिलगा-वेत्री-कझगम्-पक्षस्य अध्यक्षः विजयः सत्तां प्राप्स्यति इति।

मतगणना-केन्द्रेषु केवलं कर्मचारिणः, निर्वाचन-अधिकारिणः, अभ्यर्थिनां प्रतिनिधयश्च प्रवेशं प्राप्नुवन्ति। प्रातः ११ वादनात् आरभ्य अग्रता-सूचकाः स्पष्टाः भविष्यन्ति इति अपेक्षा अस्ति। निर्वाचन-अधिकारीणां अनुसारं आधिकारिक-परिणामाः सायं कालात् आरभ्य मध्यरात्रि-पर्यन्तं क्रमशः प्रकाशिताः भविष्यन्ति।

मतगणनायां १५,००० अधिकाः कर्मचारिणः नियुक्ताः सन्ति। प्रत्येकस्मिन् निर्वाचन-क्षेत्रे एकः पर्यवेक्षकः, निर्वाचन-अधिकारी तथा सहायक-अधिकारी नियुक्ताः सन्ति। ७० अर्धसैनिक-बल-एककानि सहिताः १८,००० आरक्षककर्मिणः मतगणना-केन्द्रेषु सज्जिताः। अतिरिक्ततया समग्रे राज्ये १,००,००० आरक्षककर्मिणः सुरक्षा-कर्तव्येषु नियुक्ताः सन्ति। अद्य ४,०२३ अभ्यर्थिनां भाग्यनिर्णयः भविष्यति।

अस्यां निर्वाचन-प्रक्रियायां ५.७३ कोटि मतदातॄणां मध्ये ४.८८ कोटि जनाः मतदानं कृतवन्तः, येन ८५.१० प्रतिशत-मतदानं नूतन-कीर्तिमानं स्थापितम्। मुख्यमन्त्री एम.के.स्टालिनः कोलाथुर-क्षेत्रात्, एआईएडीएमके-पक्षस्य नेता एडप्पाडी-के.-पलानीस्वामी एडप्पाडी-क्षेत्रात् पुनः निर्वाचनं स्पर्धितवन्तौ। तमिलगा-वेत्री-कझगम्-पक्षस्य अध्यक्षः विजयः त्रिची-ईस्ट तथा पेरम्बूर-आसन्द्योः प्रतिस्पर्धां कृतवान्।

हिन्दुस्थान समाचार / अंशु गुप्ता