मेदिनीपुरम्, ०४ मे-मासः (हि.स.)। पश्चिम-बङ्गाल-राज्ये विधानसभानिर्वाचन-परिणामानां पूर्वं समुद्र-तीरस्थितं प्रसिद्धं पर्यटन-स्थलम् दीघा-नगरम् प्रायः रिक्तं जातम्। रविवासरस्य सायंकालपर्यन्तं अधिकांशाः पर्यटकाः स्व-स्व-गृहाणि प्रत्यागताः।

निर्वाचन-समये अपि दीघा-नगरस्य पर्यटक-संख्या न्यूनता प्राप्तवती आसीत्। मतदान-समाप्तेः अनन्तरं मे-मासस्य प्रथम-सप्ताहान्ते अत्र पर्याप्त: सम्मर्दः दृष्टः आसीत्, किन्तु मतगणनायाः पूर्वं सम्भावित-युद्ध-आशङ्कया पुनः पर्यटकाः प्रत्यागन्तुं आरब्धवन्तः, येन नगरम् पुनः प्रायः शून्यम् अभवत्।

पर्यटन-सम्बद्धाः जनाः वदन्ति यत् निर्वाचन-कारणेन पूर्वमेव व्यवसाये प्रभावः अभवत्। मतदानानन्तरं कतिपय-दिनानि पर्यटकाः आगतवन्तः, किन्तु मतगणना-कारणेन पुनः सम्मर्दः न्यूनः जातः।

स्थानीय-निवासिनः तथा होटेल-व्यवसायिनः इच्छन्ति यत् निर्वाचन-परिणामानन्तरम् अपि वातावरणं शान्तिपूर्णं भवेत्, येन दीघा-नगरस्य पर्यटनं न बाध्येत। ते वदन्ति यत् कश्चन सर्वकारः आगच्छतु, किन्तु दीघा-पर्यटनस्य विकासे विशेष-ध्यानं दातव्यम्।केचन स्थानीय-जनाः उक्तवन्तः यत् नगरस्य मुख्य-मार्गाः सुधारिताः सन्ति, किन्तु आन्तरिक-मार्गेषु तथा जल-निर्गमन-व्यवस्थायां समस्याः अद्यापि सन्ति। होटेल-व्यवसायिनः अपि वदन्ति यत् राजनैतिक-विवादस्य प्रभावः पर्यटन-क्षेत्रे न भवेत्।

हिन्दुस्थान समाचार / अंशु गुप्ता