Enter your Email Address to subscribe to our newsletters
गयाजी, 05 मईमासः (हि.स.)।वियतनाम-देशस्य राष्ट्रपतिः तो लाम महोदयः मङ्गलवासरे ज्ञान-मोक्षयोः भूमिं गयाजीं सम्प्राप्तवान्। बोधगया-अन्तर्राष्ट्रीय-विमानपत्तने बिहारस्य मुख्यमन्त्रिणा सम्राट चौधरी महोदयने तस्य सोत्साहं स्वागतं कृतम्। राष्ट्रपतिः तो लाम महोदयः ५ मईतः ७ मई पर्यन्तं भारतस्य प्रवासे अस्ति।
गया-विमानपत्तने सुदृढ-सुरक्षा-व्यवस्थायाः मध्ये मुख्यमन्त्रिणा सम्राट चौधरी महोदयने शिष्टाचारानुसारं तस्मै पुष्पगुच्छं दत्त्वा स्वागतं विहितम्। अस्मिन् अन्तराले उभयोः नेतृयोः मध्ये संक्षिप्ता किन्तु सौहार्दपूर्णा चर्चा अपि अभवत्। स्वागत-समारोहे बिहारस्य राज्यपालः सैयद अता हसनैन अपि उपस्थितः आसीत्। विमानपत्तने उपस्थिताः गणमान्य-जनाः राष्ट्रपतेः अभिनन्दनं कृतवन्तः, तस्मै च ‘गार्ड ऑफ ऑनर’ (सम्मान-रक्षिका) प्रदत्ता।
विमानपत्तनात् राष्ट्रपतिः मार्ग-मार्गेण महाबोधि-मन्दिरं गतवान्, यत्र सः भगवतः बुद्धस्य दर्शनं कृत्वा विधिवत पूजा-अर्चनां च कृतवान्। मन्दिर-परिसरे सुरक्षायाः व्यापकाः प्रबन्धाः कृताः आसन्। राष्ट्रपतिः किञ्चित् कालं ध्यानम् अपि अकरोत्, बौद्ध-परम्पराणां प्रति स्वां प्रगाढां श्रद्धां च प्रकटितवान्। तेन सह वियतनाम-देशस्य उच्चस्तरीय-प्रतिनिधिमण्डलमपि उपस्थितम् आसीत्।
राष्ट्रपतेः अस्य प्रवासस्य कृते गया-मण्डलीयं प्रशासनं बहुभ्यः दिनेभ्यः सज्जासु संलग्मम् आसीत्। विमानपत्तनात् महाबोधि-मन्दिरं यावत् सुरक्षायाः दृढ-व्यवस्था कृता आसीत्। स्थाने-स्थाने आरक्षक-बलानि, जिल्लाधिकारिणः, सुरक्षा-एजेन्स्यः च नियुक्ताः आसन्। मन्दिरे प्रविशतां श्रद्धालूनां सघनं परीक्षणं कृतम् ।
अस्मिन् अवसरे मुख्यमन्त्री सम्राट चौधरी उक्तवान् यत् आध्यात्मिक-सांस्कृतिक-ऐतिहासिक-नगर्यां गयायां राष्ट्रपतेः आगमनम् अत्यन्तं महत्त्वपूर्णम् अस्ति, एतच्च भारत-वियतनाम-सम्बन्धं नूतन-शिखरं नेष्यति।
प्रशासनिक-अधिकारिणाम् अनुसारं, राष्ट्रपतिः बोधगयायाः अन्यान् प्रमुखान् बौद्ध-स्थलान् अपि भ्रमति। तस्य आगमनं दृष्ट्वा नगरे स्वच्छता, यातायात-व्यवस्था, सुरक्षा-प्रबन्धनं च सुव्यवस्थितं कृतम्, सहैव वैदेशिक-प्रतिनिधिमण्डलस्य स्वागताय विशेष-सज्जाः अपि कृताः सन्ति।
---------------
हिन्दुस्थान समाचार / अंशु गुप्ता