Enter your Email Address to subscribe to our newsletters
बुरहानपुरम्/भोपालम्, 06 मईमासः (हि.स.) ।
मध्य-प्रदेशस्य मुख्यमन्त्री डॉ.-मोहन-यादवो बुधवासरे बुरहानपुर-नगरस्य एकदिवसीय-भ्रमणार्थम् आगतः। अत्र तेन न केवलं “उद्यमी-संवाद”-कार्यक्रमे स्वविचाराः प्रस्तुताः, अपितु राजनैतिक-मञ्चात् विपक्ष-दलानां प्रति तीक्ष्ण-आक्रमणानि अपि कृतानि।
मुख्यमन्त्रिणा डॉ.-मोहन-यादवेन परमानन्द-गोविन्दजीवाला-प्रेक्षागृहे आयोजिते “उद्यमी-संवाद”-कार्यक्रमे उद्योगपतिभिः सह संवाद-समये निमाड-क्षेत्रे “इन्वेस्टर्स्-समिट्” आयोजनस्य घोषणा कृता। तदनन्तरं सः भाजप-दलस्य “विजय-उत्सव”-कार्यक्रमे सहभागी भूत्वा मञ्चे नेतृभिः सह झालमूडी-भोजनस्य आस्वादम् अकरोत् तथा च कार्यकर्तृषु उत्साहं सञ्चारितवान्। अस्मिन् अवसरे तेन बंगाल-असम-प्रदेशयोः दलस्य विजयस्य विषये हर्षः व्यक्तः, विपक्ष-दलानां प्रति च लक्ष्यं कृतम्।
मुख्यमन्त्री प्रातः दशवादन-त्रिंशन्निमेष-समये रेणुका-माता-हेलीपैड्-स्थलात् प्रत्यक्षतया प्रेक्षागृहं प्राप्तवान्। तत्र उद्योगपतिभिः स्व-समस्याः मागधाश्च तस्मै निवेदिताः। डॉ.-यादवेन उक्तं यत् निमाड-प्रदेशे इन्वेस्टर्स्-समिट् आयोजनस्य वचनं दत्तम् आसीत्, तत् वयं नूनं पूर्णयिष्यामः। तेन उक्तं यत् व्यापारिक-कल्याण-मण्डलस्य निर्माण-विषये मन्त्रिमण्डले अपि चर्चा अभवत्, यत् भविष्ये जनपद-स्तरपर्यन्तं कार्यं करिष्यति।
मुख्यमन्त्रिणा बुरहानपुर-नगरस्य आर्थिक-महत्त्वं प्रकाश्य उक्तं यत् अत्र व्यापारः चत्वारिशत्-कोटि-रूप्यकात् द्विगुणीकृत्य अष्टशत्-कोटि-रूप्यक-पर्यन्तं प्राप्तः। तेन घोषणा कृता यत् राज्य-सरकारेण निंबोला-औद्योगिक-समूहाय त्रिशत्-पञ्चाशत्-कोटि-रूप्यकाणां प्रथम-किस्तः प्रदत्ता। अस्मिन् वर्षे “किसान-कल्याण-वर्ष” इति समर्पिते मुख्यमन्त्रिणा आश्वासनं दत्तं यत् बुरहानपुरस्य कदली-कृषकाणां समस्याः प्राथमिकतया समाधानं प्राप्स्यन्ति। सहैव तेन व्यापारिक-कल्याण-मण्डलस्य स्थापनायाः विषयः उक्तः, यत् भविष्ये जनपद-स्तरे सक्रियं भूत्वा उद्यमिनां साहाय्यं करिष्यति।
उद्योगपतिभिः सह संवादानन्तरं डॉ.-मोहन-यादवः विधायकया अर्चना-चिटनिस-महोदयया आयोजिते “विजय-उत्सव”-कार्यक्रमे सहभागी अभवत्। अयं कार्यक्रमः हाल-समये पश्चिम-बंगाल-असम-पुडुचेरी-प्रदेशेषु जातानां निर्वाचन-परिणामानां विषये आयोजितः आसीत्। अस्मिन् समये मुख्यमन्त्री मञ्चे झालमूडी-भोजनम् अकरोत् तथा च मन्त्री तुलसीराम-सिलावट-महोदयाय अन्येभ्यः विधायकेभ्यश्च अपि भोजनं दत्तवान्।
अस्मिन् अवसरे तेन कांग्रेस-दलं प्रति आक्रमणं कृत्वा उक्तं यत् देशस्य विभाजनस्य तथा “वन्दे-मातरम्” इत्यस्य विभाजनस्य पापं कांग्रेस-दलेन कृतम्। राम-मन्दिरस्य उल्लेखं कृत्वा तेन उक्तं यत् समग्र-देशेन मन्दिर-निर्माणस्य स्वागतं कृतम्, किन्तु कांग्रेस-दलस्य नेतारः अद्यावधि तत्र दर्शनार्थं न गतवन्तः।
पश्चिम-बंगाल-असम-प्रदेशयोः भाजप-दलस्य प्रदर्शनस्य विषये हर्षं प्रकटयन् मुख्यमन्त्री ममता-बैनर्जीम् अरविन्द-केजरीवालं च लक्ष्यीकृतवान्। तेन उक्तं यत् केजरीवाल-महोदयः कारागारं गत्वापि पदं न त्यजति, ममता-बैनर्जी च महन्तं पराजयं प्राप्यापि पदे स्थिता अस्ति।
बंगाल-प्रदेशस्य स्थितेः विषये टिप्पणीं कुर्वन् तेन उक्तं यत् रवीन्द्रनाथ-ठाकुर-महोदयस्य जयन्त्यां नूतनः मुख्यमन्त्री शपथं ग्रहीष्यति, यत् अस्य प्रतीकं यत् बंगाल-प्रदेशः पञ्चसप्ततिवर्षाणां अनन्तरं वास्तविक-स्वातन्त्र्यं प्राप्तवान्। तेन एतदपि उक्तं यत् बंगाल-असम-निर्वाचनेषु मुस्लिम-समुदायेन अपि विशाल-प्रमाणे भाजप-दलस्य समर्थनं कृतम्।
मुख्यमन्त्रिणा डॉ.-मोहन-यादवेन उक्तं यत् अधुना बंगाल-प्रदेशः देशस्य मुख्यधारया सह पदे पदे मिलित्वा विकास-पथि अग्रे गमिष्यति।
---------------
हिन्दुस्थान समाचार