Enter your Email Address to subscribe to our newsletters
नव दिल्ली, 06 मईमासः (हि.स.)।
केन्द्रीयकृषिकिसानकल्याणग्रामीणविकासमन्त्री शिवराजसिंहचौहानः ७ मई दिनाङ्के उत्तरप्रदेशस्य लखनऊनगरस्य प्रवासे भविष्यति। अस्मिन् प्रवासे शिवराजसिंहचौहानः “फ्रूट होराइज़न” इत्यनेन सम्बद्धेषु महत्त्वपूर्णकार्यक्रमेषु सहभागं करिष्यति।
केन्द्रीयकृषिमन्त्रिणः शिवराजसिंहचौहानस्य उपस्थितौ एषः द्विदिवसीयः कार्यक्रमः देशे फलोत्पादनगुणवत्ताप्रसंस्करणनिर्यातवर्धनस्य उद्देशेन आयोजितः अस्ति। कार्यक्रमस्य उद्देश्यं कृषकान्, वैज्ञानिकान्, निर्यातकान् तथा अन्यसम्बद्धपक्षान् एकस्मिन् मञ्चे समानीय फलक्षेत्राय नूतनदिशां प्रदातुम् अस्ति।
लखनऊनगरे केन्द्रीयमन्त्री शिवराजसिंहचौहानः निर्यातकैः अन्यहितधारकैः सह प्रत्यक्षसंवादं करिष्यति। तस्य प्रगतिशीलनिर्यातकैः सह बैठकाऽपि भविष्यति, तथैव निर्यातकानां निदेशकानां अन्यहितधारकाणां च सह चर्चा अपि भविष्यति। अस्मिन् संवादे फलनिर्यातवृद्धिः, विपणनचुनौत्याः अवगमनम्, उत्तमरणनीतिनिर्माणम् इत्यादिषु विषयेषु चर्चा भविष्यति। अनेन देशस्य फलव्यापारस्य सुदृढीकरणे कृषकाणां च उत्तमावसरप्रदाने साहाय्यं भविष्यति।
मुख्यः कार्यक्रमः आईसीएआरस्य केन्द्रीयोपोष्णबागवानीसंस्थाने रहमानखेड़ा-लखनऊनगरे भविष्यति। निर्धारितकार्यक्रमानुसारं ७ मई दिनाङ्के प्रातः १० वादनात् आरभ्य कृषकैः, पौधशालासम्बद्धजनैः, प्रसंस्करणक्षेत्रस्य हितधारकैः च सह केन्द्रीयमन्त्रिणः शिवराजसिंहस्य संवादः भविष्यति। ततः अनन्तरं मुख्यसत्रं भविष्यति, यस्मिन् उत्तरप्रदेशशासनस्य मन्त्रिणौ सूर्यप्रतापशाही तथा दिनेशप्रतापसिंहः अपि सहभागिनौ भविष्यतः।
कार्यक्रमस्य व्यापककार्यसूच्यां गुणवत्तावर्धनम्, निर्यातविस्तारः, मूल्यसंवर्धनम्, शून्यप्रत्याख्याननीतिः, एफपीओ, एफपीसी तथा एसएचजी इत्येतासां भूमिकाः इत्यादयः विषयाः अपि समाविष्टाः सन्ति। एषः आयोजनः फलक्षेत्रे नूतनचिन्तनस्य, नूतनप्रौद्योगिक्याः तथा नूतनविपणनावसराणां मार्गान् उद्घाटयिष्यति। कार्यक्रमे अनेके वरिष्ठवैज्ञानिकाः, केन्द्रशासनस्य तथा उत्तरप्रदेशशासनस्य वरिष्ठाधिकारिणः अपि उपस्थिताः भविष्यन्ति।
---------------
हिन्दुस्थान समाचार