चेन्नईनगरम्, ०६ मईमासः (हि.स.)। तमिलनाडुराज्यस्य विधानसभानिर्वाचनस्य परिणामेषु अनन्तरं त्रिशङ्कु-स्थितिः जाता, तदा राज्ये सर्वकार-गठनार्थं भारतीय-राष्ट्रीय-काङ्ग्रेस-पक्षः (आईएनसी) सी-विजय-नेतृत्वयुक्ताय तमिलगा-वेत्री-कषगम-पक्षाय (टीवीके) सशर्तं स्वस्य पूर्णसमर्थनस्य घोषणां कृतवान्।

काङ्ग्रेस-पक्षेण उक्तम् यत् अस्मिन् गठबन्धने कस्यापि साम्प्रदायिक-शक्तेः तथा संविधानम् अविश्वसन्त्याः शक्तेः समावेशः न भविष्यति।

अखिल-भारतीय-काङ्ग्रेस-समित्याः तमिलनाडु-प्रभारी गिरिश-चोडंकरः बुधवासरे एकं वक्तव्यं प्रकाशितवान्, येन स्वपक्षस्य स्थितिः स्पष्टा कृता। तेन उक्तम् यत् तमिलनाडु-राज्यस्य जनाः, विशेषतः युवानः, धर्मनिरपेक्ष-प्रगतिशील-कल्याणकारी-सर्वकाररस्य पक्षे स्पष्टं जनादेशं दत्तवन्तः। अस्य जनादेशस्य सम्मानं कुर्वन् टीवीके-नेतृत्वे नूतन-सर्वकारस्य गठनस्य समर्थनं कर्तुं संवैधानिकं दायित्वम् अस्ति।

तेन उक्तम् यत् काङ्ग्रेस-पक्षेण तमिलनाडु-राज्ये टीवीके-पक्षाय सर्वकार-निर्माणार्थं पूर्णसमर्थनं दातुं निर्णयः कृतः, किन्तु एकः महत्त्वपूर्णः शर्तः स्थापितः—यत् काचिदपि साम्प्रदायिकी शक्तिः या भारतीय-संविधानम् न विश्वसिति, सा अस्मिन् गठबन्धने न सम्मिलिष्यते।

तेन अपि उक्तम् यत् अस्य गठबन्धनस्य उद्देश्यं के-कामराजस्य स्वर्णिम-शासनस्य पुनः स्थापना, ईवी-रामासामी-पेरियारस्य सामाजिक-न्याय-सिद्धान्तानां तथा डॉ-बीआर-अम्बेडकरस्य संवैधानिक-मूल्यानां प्रवर्धनम् अस्ति। एतत् अपि उक्तम् यत् एतत् गठबन्धनं केवलं सर्वकार-गठनपर्यन्तं सीमितं न भविष्यति, अपि तु स्थानीय-निकाय-निर्वाचनं, लोकसभा-राज्यसभा-निर्वाचनयोः अपि महत्त्वपूर्ण-राजनीतिक-सन्धिरूपेण प्रवर्तिष्यते।

अन्ते उक्तम् यत् राहुल-गान्धी तथा सी-विजयः उभावपि तमिलनाडु-जनानां जनादेशस्य सम्मानं कृत्वा तेषां अपेक्षाः पूरयितुं संकल्पं कृतवन्तौ।

हिन्दुस्थान समाचार / अंशु गुप्ता