Enter your Email Address to subscribe to our newsletters
कोलकातानगरम्, ०६ मईमासः (हि.स.)। विधानसभानिर्वाचने नूतन-सर्वकार-निर्माणस्य सम्भावनायाः मध्ये पश्चिम-बङ्गाल-राज्ये दीर्घकालात् अवरुद्धानां अनेकानां रेल-परियोजनानां पूर्णतायाः आशा वर्धिता अस्ति। अधिकारिणां मतानुसारं, अधुना राज्ये ‘द्वि-इञ्जन-सर्वकारः’ स्थापनेन भूम्यधिग्रहण-समस्या निवर्तितुं शक्यते तथा च परियोजनानां कार्ये वेगः आगमिष्यति।
रेलवे-विभागस्य सूचनानुसारं राज्ये प्रायः अष्टषष्टि-सहस्र-कोटि-रूप्यकाणां व्यये द्विचत्वारिंशत् रेल-परियोजनाः घोषिताः सन्ति। किन्तु एतासां परियोजनानां कृते अपेक्षितभूमेः केवलं सप्तविंशतिः प्रतिशतं भागः एव अद्यावधि प्राप्तः अस्ति। अवशिष्टः त्रिसप्ततिः प्रतिशतं भागः, यः प्रायः चतुःसहस्र-षट्-शत्-द्विषष्टि-हेक्टेयर-परिमाणः अस्ति, दीर्घकालात् अधिग्रहणे अवरुद्धः अस्ति।
प्रमुखासु परियोजनासु कोलकाता-नगरे मेट्रो-रेलस्य ‘ऑरेंज-रेखा’ (कवि-सुभाष-स्थानात् विमानपत्तनं प्रति) निर्माणकार्यं अपि अन्तर्भवति। चिंग्डीघाटा-क्षेत्रे प्रायः ३७७ मीटर-परिमिते भागे स्तम्भ-स्थापनस्य असम्भवत्वात् एतत् कार्यं दीर्घकालात् स्थगितम् अस्ति। रेल-अधिकारिणां कथनेन, अनेकेषु अवसरिषु यातायात-निरोधं कृत्वा कार्यारम्भस्य प्रयासः कृतः, किन्तु राज्य-सर्वकारतः अनुमतिः न प्राप्ता।
तदनन्तरं तारकेश्वर–बिष्णुपुरः (८३ कि.मी.) रेल-परियोजना अपि भूमिविवादकारणात् अवरुद्धा अस्ति। गोघाट–कामारपुकुर-खण्डे २०१६ वर्षात् आरभ्य स्थानीय-आन्दोलनकारणात् निर्माणकार्यं निरुद्धम् अस्ति। तथा देशप्राण–नन्दीग्राम (१८.५ कि.मी.) रेल-परियोजना अपि २००९-१० वर्षात् आरभ्य भूम्यधिग्रहण-समस्यया बाधिता अस्ति।
नैहाटी-रानाघाट-नगरयोः मध्ये तृतीय-रेल-रेखायाः निर्माणकार्यम् अपि भूमिसम्बन्धि-समस्यया अग्रे न गच्छति। एषा शाखा अत्यन्तं व्यस्ता मन्यते, तथा च रेलयानानां संख्यावृद्ध्यर्थं तृतीया रेखा अत्यावश्यकाऽस्ति।
रेलवे-स्रोतसाम् अनुसारं चाण्डिल–अनारा–बर्नपुर-शाखायां तृतीय-रेखा-निर्माणकार्यं तथा जलेश्वर-स्थानात् दीघा-नगरं यावत् नूतन-रेल-रेखा-निर्माणम् अपि भूमेः अभावे अवरुद्धम् अस्ति। नवद्वीप-घाट-स्थानात् नवद्वीप-धाम-स्थानं यावत् रेल-रेखा-परियोजना अपि दीर्घकालात् अपूर्णा एव अस्ति।
पूर्वं रेलमन्त्री अश्विनी-वैष्णवेन सह रेलवे-संघस्य अधिकारिणः आरोपं कृतवन्तः यत् राज्य-सर्वकारस्य विरोधात् एतासां परियोजनानां कृते अपेक्षिता भूमिः न लभ्यते स्म।
हिन्दुस्थान समाचार / अंशु गुप्ता